နေပျဳဒဝ် ၊ သိပ်တေမ်ပါ ၁၆
အခိၚ်ပရေၚ်သီအဝဵုဏံ သီုကဵုဒၞာဲဌာန်ဂအုပ်ပၞာန်ဗမာ မကျဗြောံအာၜါဒၞာဲလုပ်ဝင်ကီု သီုကဵုဒၞာဲဌာန်ရးပၞာန် အလုံဖအိုတ်တံမ္ဂး ရဲကၠုၚ်လုပ်ဖျေံလွဟ် ၅၆၀၀ ပြၚ်အာယျရောၚ်ဂှ် နူကဵုဌာန်ပရိုၚ် အလဵုအသဳပၞာန် ထိၚ်ချုက်လဝ်တံ ချူထမံက်လဝ်ရ။
ဟိုတ်နူကၠိုဟ်ခၠၚ်တီကၠးကၠုၚ် လ္တူလၟေၚ်ကမၠောန် ပရေၚ်ၜိုဟ်လလမ် ရးနိဂီုဍုၚ်ကဵုဒပ်ပၞာန်တံတုဲ ကောန်ဂကောံ PDF တံကီု ဂကောံကောန်ဍုၚ်အရၚ်ရပ်လွဟ်တံကီု ကေတ်နၚ် သီုကဵုလွဟ်မကမ်တံတုဲ လုပ်ကၠုၚ် အပ္ဍဲဗွိုၚ်သၞောဝ်ရဂှ် အပ္ဍဲကဵုလိက်ပရိုၚ်တံ တြးလဝ်ဝါဒရ။
စနူကဵု သၞာံ ၂၀၂၁ ဒဵုကဵုအခိၚ်လၟုဟ် ပရေၚ်သီလဝ်အဝဵု အကြာ ၅ သၞာံ ဂှ် ပ္ဍဲကဵုဌာန်ဂအုပ်ရးပၞာန် ၁၄ ဒၞာဲမ္ဂး ညးတြုံညးဗြဴ ၅၆၇၂ တံ သီုကဵုလွဟ်နာနာ ၆၉၂ ဇကိုအ်ကီု ကပေါတ်ဆက်စပ်တံလေဝ်ပါ လုပ်ဖျေံလဝ်လွဟ် သ္ဂးရ။
ပၞောဝ်ကဵုဌာန်ရးပၞာန်ဂမၠိုၚ်မ္ဂး ပ္ဍဲကဵုဌာန်ရးပၞာန်အဒေါဝ် ရဲကၠုၚ်ဖျေံလွဟ် ၂၉၂၀ ပြၚ် သီုကဵုလွဟ် ၂၂၉ ဇကိုအ် ဂၠိုၚ်အိုတ် ပထမ မဒှ်တုဲ ပ္ဍဲကဵုဌာန်ရးပၞာန်ဧသာန်မ္ဂး ရဲကၠုၚ်ဖျေံလွဟ် ၈၉၀ ပြၚ် ဒုတိယဂၠိုၚ်အိုတ် မဒှ်ရ။
နကဵုတၚ်တၟေၚ်ဟီုမ္ဂး ဌာန်ဂအုပ်ရးပၞာန်ဧသာန် ဖျေံသ္ဇိုၚ်ဍုၚ်ဠာယှိုဝ် ဝွံ ပ္ဍဲကာလပရေၚ်လဝေၚ်ပၞာန် ၁၀၂၇၊ သၞာံ ၂၀၂၄ ဂိတုအဝ်ဂတ်မံက် ဂှ် ဒပ်ကိုဝ်က MNDAA တံ ထိၚ်ချုက်ဂွံအာလဝ်ပေၚ်ၚ်ရောၚ်။ ဆဂး ဟိုတ်နူပရေၚ်အလဵုအသဳကြုက်တံ လုပ်ပ္ညဳပ္ညပ်အကြာၜါလပါ်တုဲ ဒပ်ပၞာန်ဗမာ ကလေၚ်ဂွံအခေါၚ် ပရေၚ်ထိၚ်ချုက် ပ္ဍဲဂိတုဧဗရာ သၞာံ ၂၀၂၅ ဂှ်ရ။
တုဲပၠန် ဌာန်ဂအုပ်ရးပၞာန်ပလိုတ် ဖျေံသ္ဇိုၚ်ဍုၚ်အာမ်ဂှ်လေဝ် သၞာံ ၂၀၂၄ ဂိတုဒဳဇြမ်ပါဂှ် ဒပ်ပၞာန်အာရက္ခတံ သီဂွံလဝ်ပေၚ်ၚ်တုဲ ပြဟ်ဟ် ဏံ စပ်ကဵုပရေၚ်ယန္တရာပၞာန်တံမ္ဂး ဖျေံလဝ်သ္ဇိုၚ် ဍုၚ်သေတ်တွိုဲတုဲ ဗဂေတ်ကၠောန်အာမံၚ် ပရေၚ်ကောပ်ကာဲတံရောၚ်။
ပ္ဍဲအကာဲအရာဏံ အတိုၚ်အလဵုအသဳပၞာန်တြးမံၚ်ဝါဒမ္ဂး နူကဵုဌာန်ဂအုပ်ရးပၞာန်ပလိုတ်တေံ ညးလုပ်ဖျေံလွဟ် ၁၂ တၠနွံတုဲ ပ္ဍဲကဵုဌာန်ရးပၞာန်ဗာယပ်မ္ဂး ရဲကၠုၚ်ဖျေံလွဟ် ၅၈၀ ကေုာံ လွဟ်စုၚ်ၚ် ၁၃၃ ဇကိုအ်နွံတုဲ ဒှ်တတိယဂၠိုၚ်အိုတ် မဒှ်ရ။
နူကဵုအလဵုအသဳပၞာန် အတိုၚ်လၟိဟ်မဂၞန် တြးလဝ်ဝါဒတံမ္ဂး ညးကၠုၚ်ဖျေံလွဟ်သီုဖအိုတ် ၜိုတ် ၁၂ ဒဿမ ၂% ဟေၚ် ဂကူလွဟ်နာနာတံပါကၠုၚ်တုဲ တၚ်နၚ်ဗလးတိဇေတ်တ်မ္ဂး ဒှ်ဍာံဟွံဍာံဂှ် နူကဵုဌာန်ပရိုၚ်သြၚ်လောန်တိုၚ်မ် ဗွဲတၞဟ်ခြာ သ္ပဒတန်ဟွံမာန်ဏီပုဟ်။
တၚ်နၚ်နူကဵုဒပ်ပၞာန်ဗမာတံမ္ဂး ဒးကံက်ကေတ် လံက်ဗၠိုက်ဒှ်မံၚ်တုဲ အတိုၚ်မဂၞန်ချူလဝ်ဂှ်တှ်ေ အောန်အိုတ်နူကဵု ၅၆၀ ဂၠိုၚ်အိုတ် ပွဳပွူၜိုတ် ၁၀၀၀ ရ ဒှ်မာန်ရောၚ် ဗိုလ်ဇၞော် CDM ဇြေန်ယဝ် တော်ဆလဝ်ရ။
မွဲလပါ်ပၠန် သွက်ဂွံလုပ်အကြာအာသဳယာန်ကဵု ပွဳဗွိုၚ်ဂၠးကဝ်တံ နကဵုပရေၚ်ဍုၚ်ကွာန်လုပ်သၞောဝ်မာန်ဂှ် အလဵုအသဳပၞာန် ဂစာန်မံၚ်တုဲ စပ်ကဵုပရေၚ်ဂကောံပၠန်ဂတးတံကဵု ဂကောံကောန်ဍုၚ်အရၚ်လွဟ်တံမ္ဂး နကဵုတၚ်စောဲစပ်နာနာပလီုလဝ်ဗီုပြၚ်တံတုဲ PDF တံ ကၠုၚ်ဖျေံမံၚ်လွဟ်ရဂှ် တြးမံၚ်ဝါဒ မွဲဏှမွဲဏှရ။
လ္တူဏံ သွက်သ္ဂောံဂွံ ပရေၚ်ကလေၚ်ဟီုခၠေဝ်သှ် နူကဵုဂကောံကောန်ဍုၚ်အရၚ်ရပ်လွဟ်တံကဵု လပါ်ဂကောံပၠန်ဂတးတံတုဲ နူကဵုဌာန်ပရိုၚ်သြၚ်လောန်တိုၚ်မ် ကေတ်အဆက်ညးနွံအခေါၚ်ဟီုဂး ဂကောံလ္ၚဵုလ္ၚဵုတံကီုလေဝ် ကလေၚ်ကၠုၚ်လဝ်ပရိုၚ် ဟွံမွဲပုဟ်။
ပရေၚ်ကိုန်အစဳဇန်ပွိုၚ် ၁၀၀ တ္ၚဲ အလဵုအသဳပၞာန်ထမံက်မံၚ်ရုပ်ရဴ စပ်ကဵုလၟေၚ်ကမၠောန်ပရေၚ်ၜိုတ်လလမ်မ္ဂး ညံၚ်ဟွံဂွံစွံလဝ် ပရေၚ်ဒစးဒုၚ်မွဲသာ် သွက်ဂွံတက်ကျာသဳကၠဳအာကော်ဘိက်လဝ် ဂကောံကောန်ဍုၚ်အရၚ်ရပ်လွဟ်တံ မဒှ်ရ။
ဆဂး ဟိုတ်နူပရေၚ်သီအဝဵု ၂၀၂၁ တုဲ အလဵုအသဳညဳသၟဟ်ကောန်ဂကူ NUG ကဵု ဂကောံပၠန်ဂတး မံက်တိတ်ကၠုၚ်လဝ်တံဂှ်တှ်ေ သွက်ဂွံဖျေံလွဟ်ဟေၚ် ကော်ဘိက်မံၚ်တုဲ ပါဲတးလဝ်ဝိုၚ်ခုၚ်တက်ကျာသဳကၠဳဂှ် ပရေၚ်ဖျေံလွဟ်တံဏံ ဆက်တြးမံၚ်ဝါဒ အဆက်က်ရောၚ်။
မွဲလပါ်ပၠန် ပ္ဍဲကဵုဒေသဒၞာဲ အလဵုအသဳပၞာန်တံ ထိၚ်ချုက်လဝ်လ္တူဍုၚ်ကဵု အကြာကွာန်တံမ္ဂး သွက်ပရေၚ်ယိုက်ဝန်ပၞာန်ဂှ် ဒပ်ပၞာန်၊ ဒပ်ဗၠာဲသၟိၚ်ကဵု ဒပ်မၚ်ကွာန်တံ ဗ္တံတ္ၚဲဟွံရုဲ ဗက်ရပ်ကေတ်မံၚ်ပဝ်တာ သၟတ်ပၠိုၚ်ၚ်တံ ကၠောန်မံၚ်ဆက်က်ရောၚ် ဂွံတီနူကဵုညးဒေသတံရ။
ပရိုၚ်-သြၚ်လောန်တိုၚ်မ်
Photo – MOI