တိုကျို၊ သိပ်တေမ်ပါ ၁၆
အပ္ဍဲကဵုဍုၚ်ဂျပါန် ညးအာယုက် ၁၀၀ ပြၚ် လၟိဟ်မၞိဟ်သၞာံဏံ အလန်ပထမ နွံမံၚ်မွဲကိုတ်ပြၚ်အာယျ နူကဵုဌာနပရေၚ်ထတ်ယုက် ဂျပါန် လလောၚ်တြး ပ္ဍဲကဵု သိပ်တေမ်ပါ ၁၅ ရ။
စိုပ်သိပ်တေမ်ပါ ၁ ပ္ဍဲသၞာံဏံ အတိုၚ်စရၚ်မ္ဂး ပ္ဍဲကဵုဍုၚ်ဂျပါန် ညးအာယုက်ပေၚ်အာ ၁၀၀ ပြၚ် အပံၚ်ဖအိုတ် ၁၀၇,၆၇၇ ဒှ်အာတုဲ ဂၠိုၚ်နူကဵုသၞာံအာတေံ ၇,၉၁၄ တၠ မဒှ်ရ။
အပ္ဍဲဏံ ညးဗြဴ ၉၄,၂၉၈ တၠနွံတုဲ ညးပေၚ်အာယုက် ၁၀၀ ပြၚ်ဗွဲမဂၠိုၚ်တံဂှ် ဒှ်ညးဗြဴတံရ။
ပ္ဍဲကဵုသၞာံဏံ ညးပေၚ်အာယုက် ၁၀၀ သၞာံတံကီု ကၠာဟွံစိုပ်သၞာံ ၂၀၂၇ ဂိတုမာတ် ၃၁ ညးပေၚ်အာယုက် ၁၀၀ ဂှ် ဒှ်အာ ၅၄,၂၉၄ တၠတုဲ အပ္ဍဲဏံ ညးဗြဴ ၄၅,၇၆၉ တၠတံ ပါလုပ်ရ။ ညးပေၚ်အာယုက် ၁၀၀ တံဂှ် သ္ကိုပ်ဝန်ဇၞော်ဂျပါန် ပလံၚ်ဗစိုပ်လိက်ပတိုန်စရာဲတုဲ ခေါ်သြန်တံဂှ်လေဝ် ကဵုအာပရၚ်တဲကီုရောၚ်။
ပ္ဍဲဍုၚ်ဂျပါန် ညးပေၚ်အာယုက် ၁၀၀ ပြၚ်တံ ဂၠိုၚ်တိုန်မံၚ် အရိုဟ်သၞာံ ဆက်ဆက် မဒှ်ရ။ ပ္ဍဲသၞာံ ၁၉၆၃ တေံ ညးပေၚ်အာယုက် ၁၀၀ နွံ ၁၅၃ တၠပြၚ်ကီုလေဝ် ပ္ဍဲ ၁၉၈၁ ဂှ် ၁၀၀၀ ပြၚ်၊ ၁၉၈၈ ဂှ် ၁၀,၀၀၀ ပြၚ်၊ ၂၀၁၂ ဂှ် ဒဵုကဵု ၅၀,၀၀၀ ပြၚ် ဂၠိုၚ်တိုန်ရ။
လၟုဟ် ပ္ဍဲဍုၚ်ဂျပါန် ညးအာယုက်ဇၞော်အိုတ် ဖူယို ကဳယှဳမိုတို နွံမံၚ်ဍုၚ်တိုကျိုဂှ် ပ္ဍဲဒဳဇြမ်ပါတုဲကၠုၚ်ဏံ ပေၚ်အာယုက် ၁၁၄ သၞာံ မဒှ်ရ။ ညးတြုံအာယုက်ဇၞော်အိုတ် ဟဳကာရူ ကာတို နူကဵုဍုၚ်ကူမာမိုတိုဂှ် ပ္ဍဲဂိတုမေဏံ ပေၚ်စိုပ်အာယုက် ၁၁၂ သၞာံရ။
အပ္ဍဲဂၠးကဝ်မ္ဂး ဂကူဂျပါန်တံ ဒှ်ဍုၚ်အာယုက်ဂၠိုၚ်မွဲတုဲ ဗၞတ်အာယုက်ညးတြုံတံ ၈၁ ဒဿမ ၂၅ သၞာံ၊ ညးဗြဴတံ ၈၇ ဒဿမ ၃၃ နွံရ။ ဗၞတ်အာယုက်ညးဗြဴဂၠးကဝ် အဆံၚ်ပထမ မဒှ်ရ။
ဂကူဂျပါန်တံ ပရေၚ်အာယုက်ဂွံဂၠိုၚ်ဂှ် စၞစကိတ်ညဳကဵုပရေၚ်ထတ်ယုက်တံ၊ ညးတြောအ်အ်တံအောန် ကေုာံ မၚ်မွဲရံၚ်စံၚ်ကဵု သွက်ပရေၚ်ထတ်ယုက်ဇၟာပ်ပ်မၞိဟ်တံမာန်ဂှ် ဒှ်ရိုဟ်ကၞက်အဓိကရောၚ် ညးစီုသကီုတံ သ္ၚဳဂၠိပ်ရ။
ညးအာယုက် ၁၀၀ ပြၚ်တံ ဂၠိုၚ်ဟဍၚ် ညံၚ်ဂွံမံၚ်စံၚ်အာ အာယုက်ဂၠိၚ်ၚ် ပရေၚ်ထတ်ယုက်နွံနွံမာန်အာဂှ် နူကဵုအလဵုအသဳဂျပါန် စွံကၠုၚ်အာရီု နကဵုတၚ်ရန်တၟံ အဆံၚ်ပရေၚ်ကောန်ဂကူရ။
စိုပ်သၞာံ ၂၀၄၀ မ္ဂး သီုညးတြုံသီုညးဗြဴ အာယုက်မံၚ်စံၚ်အာပရေၚ်ထတ်ယုက်နွံနွံ ညံၚ်ဂွံဂၠိုၚ်တိုန်အာနူ ၂၀၁၆ တေံ ၃ သၞာံပၠန် နူကဵုသၞာံ ၂၀၁၉ တေံ အလဵုအသဳဂျပါန် ရန်တၟံလဝ်ရ။
Ref:japantimes