ဗြဝတဳ၊ သိပ်တေမ်ပါ ၁၇
အပ္ဍဲတွဵုရးကရေၚ် ဍုၚ်ဗြဝတဳ ရဲနူကဵုဒေသဌာန်သ္ၚောဲတံ ကၠုၚ်ကၠောန်မံၚ်ကမၠောန်တံကီု သၟတ်ဒေသတံကီု သွက်ပရေၚ်ယိုက်ဝန်ပၞာန် ဂကောံပၞာန်တံ တံၚ်ပဝ်တာရပ်ချုက် ကၠေၚ်လဝ် ၁၀၀ တၠပြၚ်နွံရောၚ် တမ်ရိုဟ်ကၞက်ပရိုၚ်ဒေသတံ ဟီုရ။
ဒၞာဲဒေသပယျဵုသေံ-ဗမာ လ္တူဍုၚ်ဗြဝတဳဂှ်မ္ဂး စိုပ်အခိၚ်ဗ္တံ ၉ နာဍဳ ပြၚ်တှ်ေ ဂကောံပၞာန်တံ ဗက်ဂေတ်အာကဵုကွဳစက်တုဲ ဒၞာဲသ္ၚိဌာန် သၟာကမၠောန်တံမံၚ်စံၚ်ကီု ဒၞာဲအပ္ဍဲရုၚ်ကမၠောန်တံကီု ဗက်ဂၠာဲရပ်ကေတ်မံၚ်သၟတ်တံ မွဲဏှမွဲဏှရောၚ် ရဲလ္တူဍုၚ်ဗြဝတဳတံ သ္ဂးရ။
တုဲပၠန် လ္တူဍုၚ်ဗြဝတဳဂှ် ရဲပၠံၚ်ၜးကမၠတ်တံကီု မၞိဟ်သုၚ်အရက်ဗၜူဒလူမံၚ် အကြာအရာပ်တံကီု ရပ်ကေတ်သီုဖအိုတ်တုဲ ချုက်စွံလဝ်မွဲဒၞာဲ အတိုၚ်စရၚ်ဂွံမိၚ်လဝ်ပရိုၚ်ဂှ်တှ်ေ ညးဒးဒုၚ်ရပ်ကၠေၚ်ချုက်လဝ်တံ နွံမံၚ်အကြာ မွဲကၠမ် ၜါကၠမ် ဒှ်မာန်ရောၚ် ရဲလ္တူဍုၚ်တံ ဟီုရ။
ရဲဂကောံပၞာန် ဍုၚ်ဗြဝတဳတံဝွံ ရပ်ချုက်ကၠေၚ်လဝ်မၞိဟ်တံတုဲ အာပလံၚ်ဗစိုပ်ဏာ ဂကောံပကောံကောန်ပၞာန်တၟိ သွက်ယိုက်ဝန်ပၞာန် တွဵုရးကရေၚ်တုဲ ကဵုအာတိုန်မံၚ်ဘာပၞာန်ရောၚ် ဂွံတီလဝ် နူကဵုရိုဟ်ကၞက်ပရိုၚ် လ္တူဍုၚ်တံရ။
သွက်ဘာပရေၚ်ယိုက်ဝန်ပၞာန် တုဲကၠုၚ်လၟေၚ် ၂၈ တေံလေဝ် ရပ်လဝ်ပဝ်တာသၟတ် နူကဵုတွဵုရးကရေၚ် ဟွံအောန်နူကဵု ၅၀ တံဂှ် ပလံၚ်ဏာဘာယိုက်ပၞာန်ကီု၊ ပ္ဍဲကဵုလၟေၚ်ဘာပၞာန် ပရေၚ်ယိုက်ဝန်ပၞာန် တွဵုရးကရေၚ် သွက်ဇၟာပ်ပ်ဂိတုမ္ဂး အတိုၚ်ရန်စွံလဝ် လၟိဟ်ကွးဘာတံဟွံပေၚ်မွဲလှ်ေတုဲ ညံၚ်ဂွံရပ်ပဝ်တာဂှ် နူကဵုအလဵုအသဳပၞာန် တွဵုရးကဵုလဝ်အမိၚ်ရ။
သၟတ်အဝဲဍောတ်တ်တံ ကၠေံအာနူလ္တူဍုၚ်ဗြဝတဳဂှ် စိုပ်အာပ္ဍဲဘာ ယိုက်ဝန်ပၞာန် တွဵုရးကရေၚ်တုဲ မိမကၟိန်သ္ၚိဌာန်ညးတံ မိက်ဂွံကလေၚ်နုက်ကေတ် ကဵုသြန်ကီုလေဝ် ကလေၚ်နုက်ကေတ် ဟွံဂွံပုဟ် ဂွံတီရ။
အကြာတွဵုရးကရေၚ် ဟိုတ်နူ ပရေၚ်ရပ်ပဝ်တာ သွက်ယိုက်ဝန်ပၞာန်တံနွံမံၚ်တုဲ ပ္ဍဲဍုၚ်ဘာအၚ်ကီု သီုကဵုဍုၚ်လ္ၚဵုလ္ၚဵု တံမ္ဂး စိုပ်အခိၚ်ဗ္တံ သၟတ်တံဗွဲမဂၠိုၚ် ဟွံဂံၚ်တိတ်မ္ၚးအိုတ်တုဲ ဍုၚ်လေဝ်ကှ်ကေဲမံၚ် ပရေၚ်ညးအာကၠုၚ်လေဝ်ဟွံမွဲ ရဲကၠုၚ်ဝေၚ်တွဵုရးတံလေဝ် အောန်စှ်ေအာနူကဵုအခိၚ်ကၠာတေံရဂှ် ဂွံတီလဝ် နူကဵုညးဒေသတံရ။
ပရိုၚ်-သြၚ်လောန်တိုၚ်မ်
Photo – CJ