မတ်မလီု၊ သိပ်တေမ်ပါ ၁၇
ဒပ်ပၞာန်ပြံၚ်လှာဲဗီုပြၚ်အလဵုအသဳတုဲ အုပ်ဓုပ်ပကၚ်ရၚ်လဝ် တွဵုရးမန်ဂှ် သၟတ်စိုပ်အာယုက်တံဟွံက စနူကဵုသၟတ် အာယုက်ဟွံပေၚ်ဏီတံလေဝ် စကာသုၚ်စောဲမံၚ်ဂဥုဲၜူမာဲ ဂၠိုၚ်တိုန်မံၚ်ဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပရေၚ်စကာသုၚ်စောဲဂဥုဲၜူမာဲတံ ဒဒှ်ရ ဂွံဂၠိုၚ်တိုန်ကၠုၚ်ဟီုဂှ် ရာန်ကေတ်ဂဥုဲၜူမာဲတံ ဂွံလောဲသွာမံၚ်ဂှ်ကီု၊ အပ္ဍဲကဵုတွဵုရး ဂဥုဲၜူမာဲလၟိဟ်ကဵုဗဳလဳယာန်တံ လုပ်စိုပ်ကၠုၚ်၊ ရဲတြးသွံကဵုမံၚ်တံ ပဵုဂၠိုၚ်တိုန်ကၠုၚ်မံၚ် ဟိုတ်နူပရေၚ်တံဏံ သ္ဂးရ။
အခိၚ်ကၠာတေံ ဂဥုဲချေံ WY မွဲမ သြန်လက်ပြၚ်ဒးရာန်ကီုလေဝ် ပ္ဍဲလက်ထက်ဂကောံပၞာန်ဏံ ဂဥုဲချေံမွဲမ ၜိုတ် ၁၅၀၀- ၃၀၀၀ ဒကေဝ်ဂှ် ရာန်ကေတ်လောဲလောဲဂွံမာန် မဒှ်ရ။
အပ္ဍဲဂိတုသိပ်တေမ်ပါ ၁၄ ဏံ လ္တူဍုၚ်မတ်မလီု အရာပ်မျေနဳကုၚ်ဂှ် ဒပ်ဗၠာဲသၟိၚ်တံရပ်ဂွံဏာ ရဲသုၚ်စောဲဂဥုဲချေအ် သၟတ် ၆ တၠဂှ်တှ်ေ ရဲအာယုက်ဟွံပေၚ် ပါမံၚ်ၜါတၠရ။
ဆဂး ပ္ဍဲအကြာဒေသ စနူကဵုဘာသ္ဇိုၚ်ပရေၚ်ပညာတံဂှ် ပရေၚ်သုၚ်စောဲဂဥုဲၜူမာဲနွံမံၚ်ကီုလေဝ် စပ်ကဵု ညးသွံတြးကဵုမံၚ်တံဂှ် နူကဵုအလဵုအသဳပၞာန်တံ ပရေၚ်ရပ်စပ်ထမံက်ပတိတ်ဂွံလဝ် အောန်ကွေံကွေံရောၚ်။
အတိုၚ်ညးဒေသမန်တံ ဟီုမ္ဂး အကြာကွာန်တံဂှ် သၟတ်ဍောတ်တ်တံ ကောံတုဲ ပရေၚ်သုၚ်စောဲဂဥုဲၜူမာဲနွံကၠုၚ်ဂှ်ကီု စပ်ကဵုပရူပရာ ဗီုတံဏံမ္ဂး ဒပ်ဗၠာဲသၟိၚ်တံကီု ဂကောံပရေၚ်အုပ်ဓုပ်တံကီု ရပ်စပ်ကေတ်အရေဝ် ဟွံမွဲကွေံကွေံပုဟ် သ္ဂးရ။
နူကဵုအလဵုအသဳ ရပ်ဂွံမံၚ်ဂဥုဲၜူမာဲ ပ္ဍဲကဵုတွဵုရးမန် လၟိဟ်ကဵုလက်နွံမံၚ် မွဲဏှမွဲဏှရဂှ် ပတိတ်လဝ်ပရိုၚ်ကီုလေဝ် သောၚ်ကလးအာပြသၞာ ပရေၚ်စကာသုၚ်စောဲ ဂဥုဲၜူမာဲသၠဲလးကၠုၚ်မံၚ်တံဂှ် ဟွံမာန်ဏီပုဟ်။
ပ္ဍဲကဵုပရေၚ်သွံတြးမံၚ် ဂဥုဲၜူမာဲတံမ္ဂး ဒပ်ပၞာန်၊ ဒပ်ဗၠာဲသၟိၚ်ကဵု ညးတာလျိုၚ် ပရေၚ်အုပ်ဓုပ်လ္ၚဵုတံ ပါလုပ်ဆက်စပ်မံၚ်နွံတုဲ ဂကောံရပ်လွဟ်တံ ယိုက်ဖ္ဍိုက်ပလံၚ်မံၚ်ကဵု ဂဥုဲၜူမာဲ ဗွဲမဂၠိုၚ်တံဂှ်ရောၚ် ညးဒေသတံ ဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media