နေပျဳဒဝ်၊ သိပ်တေမ်ပါ ၁၇
သွက်ဂွံသောၚ်ကလးပရေပရံၚ်အာ အခက်အခုဲပရေၚ်ဍုၚ်ကွာန် ရးနိဂီုဍုၚ်ဗမာမ္ဂး လၟေၚ်ပရေၚ်ကမၠောန် ညးဂမၠိုၚ်သီုဖအိုတ် ညံၚ်ဂွံပါလုပ်မာန်တုဲ ထမံက်အာရုပ်ရဴညိဂှ် ကမ္မတဳပရေၚ်ကေၚ်ကာ ဗဟဵု ဗော် NLD ဗတိုက်ဖအောဝ်မံၚ် ထပ်ကဵုထပ်ရ။
အပ္ဍဲအရာသောၚ်ကလးအာ ပရေၚ်ပြဿနာဍုၚ်ဗမာမံက်တိုန်ကၠုၚ် နူကဵုဟိုတ်ပရေၚ်သီအဝဵုတံဟီုတှ်ေ က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ ယဝ်ရဟွံပါမ္ဂး သွက်ဂွံပရေပရံၚ်အာမာန် ဟွံသေၚ်ပုဟ်ဂှ် နူကဵုဗော်ညးတံ ဟီုပတိတ်လဝ် နူကၠာတေံတုဲတုဲရောၚ်။
လ္တူပရေၚ်ဏံ အတိုၚ်တၚ်ရန်တၟံပရေၚ်ဍုၚ်ကွာန် ဒဝ်အံၚ်သာန်သုကျဳ မ္ဂး စၞးသ္ဒးစကာဇြဟတ်တုဲ သောၚ်ကလးပြဿနာ ပရေၚ်ဍုၚ်ကွာန်တံဂှ် သောၚ်ကလးအာ နဲကဲပရေၚ်တက်ကျာသဳကၠဳၜိုဟ်ဟ်တံညိဂှ် နူကဵုဗော် NLD ထပ်ကဵုကၠုၚ်သမ္တီ မဒှ်ရ။
ကမ္မတဳသ္ပစၞးစၠတ်ထဝ်ကၟိန် CRPH သ္ကိုပ်သ္ကတုဲ ကၠောန်လဝ် အခန်ကၞာတ္ၚဲဒဳမဝ်ကရေသဳဂှ် နူကဵုကမ္မတဳ ရေၚ်တၠုၚ်ကေၚ်ကာဗဟဵု ဗော် NLD ပလံၚ်ဗစိုပ်ဏာလဝ် လိက်သဝဏ်ဂှ် ချူထမံက်ပတိတ်လဝ်ရောၚ်။
သွက်ဂွံသောၚ်ကလးအာ ပရေၚ်အခက်အခုဲပရေၚ်ဍုၚ်ကွာန် ပ္ဍဲအကာဲအရာပြဟ်ဟ်ဏံမာန်ဂှ် ပရေၚ်ပကီုပရာတ် လတူညးဍုၚ်ကွာန်တံ ညံၚ်ဂွံယအ်စှ်ေအာ၊ ကောန်ထံၚ်ပရေၚ်ဍုၚ်ကွာန်တံ ညံၚ်ဂွံဗၠးတိတ်မာန် ကေုာံ ဂကောံဇြဟတ်ပရေၚ်ဍုၚ်ကွာန်ကီု၊ ဂကောံကောန်ဍုၚ်အရၚ် ညးဆေၚ်စပ်သီုဖအိုတ်တံပါလုပ်တုဲ ပရေၚ်ဆဵုဂဗတက်ကျာ နွံကဵုအဓိပ္ပါယ်ပေၚ်ၚ် ညံၚ်ဂွံမံက်ဂတဝ်ကၠုၚ် ဒးကၠောန်အာရောၚ် သ္ဂးရ။
လၟေၚ်ပရေၚ်ကမၠောန်ညးသီုဖအိုတ်တံ ပါလုပ်အာဗီုဏံမာန်ကီုမှ သွက်ရးနိဂီုဍုၚ်ဗမာဂှ် ပရေၚ်ၜိုဟ်လလမ်၊ အရာကလေၚ်သွက်ဂွံပ္ညဳပ္ညပ် ကေုာံ သွက်ပရေၚ်ဒက်ပတန်ကၟိန်ဍုၚ် သ္ဇိုၚ်ကၟောန်န် ဖန်ဖက်ဂွံမာန်ရောၚ်ဂှ် ကမ္မတဳရေၚ်တၠုၚ်ကေၚ်ကာဗဟဵု ဗော် NLD တံ စၟဳညာတ်လဝ်ရောၚ်။
စပ်ကဵုပရေၚ်သဳကၠဳ ဆဵုဂဗတက်ကျာတုဲ ပ္ဍဲအကြာသၞာံတံဏံ နူလပါ်ဗော် NLD ဟီုမံၚ်မွဲဏှမွဲဏှကီုလေဝ် ပ္ဍဲလၟေၚ်ကမၠောန် ပရေၚ်ၜိုဟ်လလမ် အလဵုအသဳပၞာန်ထမံက်မံၚ်ရုပ်ရဴတံဂှ် တးပါဲလဝ် ဗော် NLD, NUG ကဵု CRPH တံ မဒှ်ရ။
ဒုၚ်သ္ဇိုၚ်ကဵု သွဟ်ပရေၚ်ပေါဲရုဲမာဲ ၂၀၂၀ တုဲ ဒက်ပတန်လဝ် ကမ္မတဳသ္ပစၞးစၠတ်ထဝ်ကၟိန် CRPH ကေုာံ အလဵုအသဳ ညဳသၟဟ်ကောန်ဂကူ NUG တံလေဝ် ပံၚ်တောဲလဝ်ကရောံ မဟာမိတ်ကောန်ဍုၚ်အရၚ်တံတုဲ ကွာ်ဂါံမံၚ်ဂၠံၚ်တရဴ ပရေၚ်ရပ်လွဟ်ရောၚ်။
သွက်ပရေၚ်အပြံၚ်အလှာဲ ဂိုတ်ဂစာန်မံၚ် ရးနိဂီုဍုၚ်ဗမာ နဲကဲနာနာသာ် ဗီုတံဏံဂှ် နကဵုပရေၚ်ဍုၚ်ကွာန် ညံၚ်ဂွံဂွံအခေါၚ်အရာပါလုပ်အာမာန် ဗော် NLD ဂစာန်မံၚ်ရောၚ် ညးလ္ၚတ်ပရေၚ်ဍုၚ်ကွာန်ဗမာ ဒံက်တာသိုၚ်ကျဳဇြေန်သိုဝ် သ္ၚဳဂၠိပ်လဝ်ရ။
“လၟုဟ် NUG တံ CRPH တံ မုဒှ်ဒှ် ညးတံပံၚ်တောဲအာကဵု လပါ်ဂၠံၚ်တရဴရပ်လွဟ် ဒှ်အာဗီုပြၚ်ဏံဂှ်တှ်ေ ရဲ NLD သှ်ေမံၚ် အပ္ဍဲဍုၚ်တံ ဂစာန်မံၚ် နကဵု Political Spaces (အခေါၚ်ချဳဒရာၚ်ပရေၚ်ဍုၚ်ကွာန်) ရ။ NLD ဂှ် အကာဲအရာပြဟ်ဟ်ဏံ Register လေဝ်ဟွံမွဲဏီပုဟ်။ ပေါဲရုဲမာဲတုဲကၠုၚ်(ဒပ်ပၞာန်ကၠောန်လဝ်) ဂှ်လေဝ် ပရေၚ်ပါလုပ်ကၠုၚ်လဝ် ဟွံမွဲပုဟ်။ တုဲပၠန် ဗော်ဂှ်လေဝ် ကလေၚ်ပကောံဒက်ပတန်လဝ်ဟွံမွဲဏီတုဲ သွက်ဂွံထိၚ်အာ Party Legacy (ဗော် ကေုာံ ဂၠံၚ်တရဴက္ဍိုပ်သ္ကိုပ်ဗော်ဖျေံကဵုလဝ်တမ်မူလ) တံဂှ် ညးတံဂစာန်မံၚ် ညာတ်ဏောၚ်တှ်လေဝ် ညာတ်ကဵုဂွံဏောၚ်” သာ်ဝွံ သ္ဂးရ။
အတိုၚ်သၞောဝ်ဥပဒေ ပတိုန်စရၚ်စၟတ်သမ္တီ ဗော်ပရေၚ်ဍုၚ်ကွာန် လက်ထက်ကံၚ်သဳပၞာန်တေံ ခၞံကဵုလဝ်တေံဂှ် ဗော် NLD ကလေၚ်ပတိုန်စရၚ် အခေါၚ်ဒက်ပတန်ဗော်ပရေၚ်ဍုၚ်ကွာန်ဟွံမွဲတုဲ နူကဵုစရၚ်ဗော်ပရေၚ်ဍုၚ်ကွာန်ဂှ် အလဵုအသဳပၞာန် ပလှ်ပတိတ်ထောံလဝ်ရောၚ်။
မွဲလပါ်ပၠန် စနူအခိၚ်သီအဝဵု ဒဵုကဵုအခိၚ်လၟုဟ် အလဵုအသဳပၞာန် ရပ်ထိၚ်လဝ် ဥက္ကဌဗော် ဒဝ်အံၚ်သာန်သုကျဳတုဲ အခေါၚ်ကဵုဆဵုကု ကၟိန်အိန်ထံၚ်တံကီု ဂကောံသၟာဥပဒေတံကီု ညးစၞးဂၠးကဝ်တံကီုဂှ် ကၟာတ်လဝ်ရ။
သ္ပပ္တမ်နူကဵု ဗတိုက်သရိုဟ်သၞောတ်တၠအဝဵုပၞာန်တုဲ သွက်ကၟိန်ဍုၚ် ဖိတ်ဒရေဝ်ဒဳမဝ်ကရေသဳ ညံၚ်ဂွံမံက်ဂတဝ်တိုန်အာဂှ် ရဲကွာ်ဂါံမံၚ် ဂၠံၚ်တရဴ ပရေၚ်ရပ်လွဟ် NUG, CRPH ကဵု မဟာမိတ်ကောန်ဍုၚ်အရၚ်တံ လုပ်မံၚ်ပေါဲဗတိုက်ရောၚ်။
ဒုၚ်သ္ဇိုၚ်ကဵုပရေၚ်သီအဝဵုတုဲ ကၠောန်ပေါဲရုဲမာဲ ဒက်ပတန်လဝ်အလဵုအသဳပၞာန်တုဲ ဂါံကွာ်မံၚ် လ္တူပရေၚ်ဂၠံၚ်တရဴ ဒဳမဝ်ကရေသဳရောၚ် ကညာၚ်ဟီုမံၚ်ကီုလေဝ် နတဲမ္ဂးပရေၚ်ကေမ်ဇျှာပ်ရပ်လဝ် အဝဵုကၟိန်ဍုၚ်ဂှ် ဟွံပဵုၜက်နူကဵု နနဲပြံၚ်လှာဲဗီုပြၚ်ကောန်အရာပ်တံပုဟ်။
ပရေၚ်ဒဳမဝ်ကရေသဳဟီုဂှ် သၞောတ်ပရေၚ်ဍုၚ်ကွာန် ဒုၚ်သ္ဇိုၚ်ကဵု ပရေၚ်ရုဲစှ် ဆန္ဒရမျှာၚ်ညးဍုၚ်ကွာန်တံတုဲ အခေါၚ်အရာမၞိဟ် ပရေၚ်အုပ်လဒမ်သၞောဝ်ဓဝ်၊ ပရေၚ်ညဳသၟဟ်တံကဵု ပရေၚ်ညးသီုဖအိုတ်တံပါလုပ်မာန်ဟီုဂှ် ဒှ်ပရေၚ်ၚုဟ်မးသ္ဇိုၚ် ဒဳမဝ်ကရေသဳရောၚ် သ္ဂးရ။
ပ္ဍဲကဵုဂၠံၚ်တရဴ ပရေၚ်ဒဳမဝ်ကရေသဳ ရးနိဂီုဍုၚ်ဗမာဂှ် နကဵုပရေၚ်အခက်အခုဲနာနာသာ် ဒုၚ်ဂိကၠုၚ်လဝ်တုဲ ညးဍုၚ်ကွာန်တံ ဒးတတ်ကၠောံကၠုၚ် ပရေၚ်ဇီုကပိုက်နာနာသာ်ရောၚ်။
အပ္ဍဲကဵုမွဲဒမြိပ်တရဴဂၠံၚ်တံဏံ လ္တူဂလာန်ပတေဟ် ပရေၚ်ဒဳမဝ်ကရေသဳဂှ် သွက်အခေါၚ်အရာမၞိဟ်၊ သွက်ပရေၚ်သၞောဝ်ဥပဒေအုပ်လဒမ်မာန် ဒုၚ်သ္ဇိုၚ်ကဵုဆန္ဒညးဍုၚ်ကွာန်တံတုဲ ဒဝ်အံၚ်သာန်သုကျဳ ဒတူဒလိုၚ် ဂိုတ်ဂစာန်ကၠုၚ်လဝ်ဆက်က်ရ။
အတိုၚ်လညာတ် တၚ်စၟဳစွံလဝ်ပရေၚ်ဍုၚ်ကွာန် ဒဝ်အံၚ်သာန်သုကျဳ မ္ဂး သၞောတ်ဒဳမဝ်ကရေသဳ သ္ပအဲပရဲကဵုဆန္ဒညးဍုၚ်ကွာန်တံကီု၊ ပရေၚ်အုပ်လဒမ်သၞောဝ်ဓဝ်ကေုာံ ဒုၚ်သ္ဇိုၚ်ကဵုပရေၚ်ညဳသၟဟ် ကောန်ဂကူတံတုဲ သွက်ဂွံဒက်ပတန်အာပရေၚ်ၜိုဟ်လလမ်ဍာ်ဇမၠိၚ် ကေုာံ ဒဵုစိုပ်အာ ကၟိန်ဍုၚ်ဒဳမဝ်ကရေသဳ ဖိတ်ဒရေဝ်တေံရောၚ်။
ဟိုတ်ဂှ်တုဲ စွံပရေၚ်ဇြိုဟ်နက်ကဵု ပရေၚ်ဆဵုဂဗတက်ကျာ၊ နဲကဲပရေၚ်ဍုၚ်ကွာန် ၜိုဟ်ဟ်သြိုဟ်ဟ်တံတုဲ သောၚ်ကလးအာပရေၚ်ဍုၚ်ကွာန်တံဂှ် ဒှ်အတိုၚ်လညာတ်တၚ်စၟဳစွံလဝ် ပရေၚ်ဍုၚ်ကွာန်တေံမွဲအခန်ကီုရောၚ် ပ္ဍဲလိက်သဝဏ် NLD ချူကဵုလဝ်သမ္တီ မဒှ်ရ။
ဗော် NLD အတိုၚ်တတ်ကၠောံလဝ် ပရေၚ်ဆဵုဂဗပရေၚ်ဍုၚ်ကွာန်ကီု တန်တဴကဵုအကာဲအရာလၟုဟ်ဏံတုဲ စကာသုၚ်စော ပရေၚ်ဂၠံၚ်တရဴ ဒဝ်အံၚ်သာန်သုကျဳ ရောၚ် ညးလ္ၚတ်ပရေၚ်ဍုၚ်ကွာန် ဥူကျဳမျေအ် သ္ၚဳဂၠိပ်လဝ်ရ။
“အပ္ဍဲဍုၚ် ပကတိအကာဲအရာဒှ်မံၚ်လၟုဟ်ဂှ် မၞိဟ်နူကဵု NLD တံ သ္ပလဝ်စၞးတံ ပါမံၚ် NUG ဂှ် ဟွံမာန်လဝ်ပၞာန်ပုဟ်လေဝ်။ မုဒှ်ဟွံဇၞးပၞာန်ဂှ် ပြသၞာတၞဟ်ခြာစွံလဝ်ကၠာ။ ပြဟ်ဟ်ဏံ စိုပ်မံၚ်အကာဲအရာ ဗီုပြၚ်တံဏံတုဲ ဗော် NLD လေဝ် တတ်ကၠောံလဝ်ပရေၚ်ဍုၚ်ကွာန် ၃၀/၄၀ သၞာံ တုဲကၠုၚ်ရတှ်ေ တီတိုန်အကာဲအရာကီုရ။ ညးတံလေဝ် ညာတ်မံၚ်ကီု။ ပ္ဍဲအကာဲအရာဏံတှ်ေ ပရေၚ်ဆဵုဂဗတက်ကျာရ ကေမ်ရပ်အာ ဂၠံၚ်တရဴဒဝ်အံၚ်သာန်သုကျဳမှ ဒှ်ကမၠောန်ဏောၚ်။ အတိုၚ်ဏံ ညးဟွံမာန် အဲဟွံမာန် အာမံၚ်တှ်ေ ရးနိဂီုဍုၚ်လေဝ် လှေက်လှံၚ်အာမံၚ် အိုတ်စောန်ယျ” သာ်ဝွံ သ္ဂးရ။
စပ်ကဵု ပရေၚ်အခက်အခုဲဍုၚ်ဗမာဏံတုဲ ဂကောံဆက်စပ်မံၚ်သီုဖအိုတ် အလဵုအသဳပၞာန်ကီု ဂကောံဇြဟတ်ပၠန်ဂတးတံကီု ဂကောံကောန်ဍုၚ်အရၚ် ရပ်လွဟ်တံကီု ဂကောံဇြဟတ် ပရေၚ်ဍုၚ်ကွာန်သီုဖအိုတ်တံ ညံၚ်ဂွံဆဵုဂဗတက်ကျာညိဂှ် ရန်တၟံတုဲ နူကဵု NLD ဗတိုက်ဖအောဝ်မံၚ်ရောၚ် ဥူကျဳမျေအ် ထံက်ထ္ၜးရ။
မွဲလပါ်ပၠန် ကံၚ်သဳပၠတရဴဖိတ်ဒရေဝ် SCEF ဒက်ပတန်လဝ်ကဵု NUG, CRPH, ဂကောံပၠန်ဂတးတမ်ကညၚ် ကေုာံ ဂကောံမဟာမိတ်ကောန်ဍုၚ်အရၚ်တံ ကဵုလဝ်သတိဂှ်တှ်ေ စိုပ်မံၚ်အဆံၚ် သွက်ဂွံစကၠောန်အာ ပရေၚ်တက်ကျာသဳကၠဳ ပရေၚ်ဍုၚ်ကွာန် ဟွံမာန်ဏီပုဟ် သ္ဂးရ။
ပရေၚ်သီုညးဖအိုတ်တံ တတ်ကၠောံဇက်တိုန်ကၠုၚ် “ပၠန်ဂတးတမ်ကညၚ်” ဝွံ ဒှ်အရာပရေၚ်ဂိုတ်ဂစာန် သွက်ဂွံ ဒက်ပတန်အာ ရးနိဂီုဍုၚ်တၟိ “သၞောတ်ဖိတ်ဒရေဝ်ဒဳမဝ်ကရေသဳ” ရောၚ် သမ္မတယာယဳ အလဵုအသဳညဳသၟဟ်ကောန်ဂကူ NUG ဒူဝါလယှဳလ သ္ဂးရ။
တုဲပၠန် သွက်ဂွံ ကၟာၚ်ပတိတ်ထောံ ရိုဟ်ကၞက်သၞောတ်တၠအဝဵုပၞာန်တုဲ ပ္ဍဲကဵုဍုၚ် ရိုဟ်ကၞက်သၞောတ်တၠအဝဵုပၞာန် ဗာန်မံၚ်ဏံဂှ် တၞံဆုဒဳမဝ်ကရေသဳ ဂျိုၚ်တဴဇၞော်တိုန်ကၠုၚ်ဟွံမာန်ပုဟ် ခယျကေတ်ရောၚ် ပ္ဍဲကဵုအခန်ကၞာ တ္ၚဲဒဳမဝ်ကရေသဳဂၠးကဝ် CRPH ကၠောန်လဝ်ဂှ် ဟီုလဝ်ဂလာန်ရ။
ပရိုၚ်-သြၚ်လောန်တိုၚ်မ်
Photo – Social Media