နေပျဳဒဝ် ၊ သိပ်တေမ်ပါ ၁၈
စပ်ကဵုပရေၚ်ဂကောံပၞာန် ဂစိုတ်ကဠက်လဝ်ဂကူမၞိဟ် ပ္ဍဲကဵုရးနိဂီုဍုၚ်ဗမာ ပံၚ်တောဲပါလုပ်လဝ်မွဲကသပ်ကီုရောၚ် စောဲစပ်တုဲ ဒပ်ဗၠာဲသၟိၚ်နဝ်ဝေ တေၚ်စပ်စောဲဏာအမှုကု ကာန်ပနဳတေဝ်လဳနဝ် ရဂှ် ဂွံတီနူကဵု တၚ်လလောၚ်တြး Justice For Myanmar JFM ရ။
အခိၚ်သီပၞာန်အဝဵု က္တဵုဒှ်လဝ် သၞာံ ၂၀၂၁ တုဲဗွဲကြဴဏံ နူကဵုအဝ်ပရေတာ ပရေၚ်ဆက်စၠောံတေဝ်လဳနဝ်တံ ဟိုတ်နူ သၠောဲကဵုလဝ်တၚ်နၚ် ပရေၚ်ပူဂဵုညးသုၚ်စောဲလဝ် ဖုၚ်မိုဗိုၚ်လ် ဇရေၚ်ဂကောံပၞာန်တံမွဲအဆံၚ်ဂှ်ရ ပရေၚ်ဒးဒုၚ်ဂိဆောံလေၚ် သွက်ကောန်ဍုၚ်ဗမာတံ ကဵုဒှ်ကၠုၚ်လဝ်ရောၚ် သ္ဂးရ။
ဟိုတ်ဂှ်တုဲ နကဵုပွမဖံက်ပကဝ်လဝ် ပရၚ်ကဵုတပ်ဒဏ်မာတ်ဆိုအ်ကီု ပ္ဍဲကဵုရးနိဂီုဍုၚ်ဗမာ ပရေၚ်ရာဇဝတ်ဂကောံပၞာန်တံကၠောန်လဝ်ဂှ် ဟိုတ်နူပံၚ်တောဲပါလုပ်မွဲကသပ်ကီုတုဲ နကဵုတင်သ္ဂုတ်သွာတ် ဒပ်ဗၠာဲသၟိၚ်နဝ်ဝေ စောဲအမှု လ္တူတေဝ်လဳနဝ်ရဂှ် နူကဵု JFM ကေုာံ ICJ Norway တံ ဒုၚ်တၠုၚ်ဏာရ။
အပ္ဍဲသိပ်တေမ်ပါ ၁၅ ဂှ် စောဲဏာအမှုတုဲ နူကဵုဒပ်ဗၠာဲသၟိၚ်နဝ်ဝေ မွဲအခိၚ်ဓဝ်လုပ်သလိပ်ဂၠိုက်ဂၠာဲ ရုၚ်ကာန်ပနဳတေဝ်လဳနဝ်ရ။ စပ်ကဵုပရေၚ်ဏံတုဲ ပ္ဍဲကဵုသၞာံ ၂၀၂၄ ဂိတုဒဳဇြမ်ပါတေံ နူကဵု JFM ကေုာံ ICJ Norway တံတေၚ်စပ်လဝ် ဒပ်ဗၠာဲသၟိၚ်နဝ်ဝေတုဲ ပရေၚ်ရပ်စပ်ကေတ်အရေဝ်ဏံ မံက်တိတ်ကၠုၚ် မဒှ်ရ။
လ္တူဍုၚ်ဗမာ ပရေၚ်ကေတ်အရေဝ် ဍုၚ်နဝ်ဝေ “(‘Myanmarforskriften’) မျာန်မာ ဖဝ်ယှခရေတ်တာန်” အတိုၚ်ဖျေံလဝ် ပရေၚ်တပ်ဒဏ်မာတ်ဆိုအ်တံဂှ် နူကဵုကာန်ပနဳ ဖံက်ပကဝ်လဝ် အကြာနူကဵုသၞာံ ၂၀၁၈ – ၂၀၂၂ တံနွံတုဲ စောဲလဝ်အမှုဂှ် ဂွံဆဵုရ။
ပ္ဍဲသၞာံ ၂၀၂၂ အခိၚ် တေဝ်လဳနဝ် တိတ်အာလဝ်နူဍုၚ်ဗမာဂှ် သၠောဲပြံၚ်ပအပ်ကဵုဏာလဝ် ရဲဆက်စပ်ဒပ်ပၞာန်ဗမာ ညးရာန် ကပေါတ် မၚ်ရံၚ်ထံၚ်ပရိုၚ် ဒးဒုၚ်လဝ် ပရေၚ်မာတ်ဆိုအ်တံရောၚ်ဂှ် စောဲစပ်လဝ်ရ။
စပ်ကဵုပရေၚ်တေၚ်စပ်ဏံတုဲ မုလေဝ်ဟွံစၟဳစၟတ်ဂၠိုက်ဂၠာဲမွဲသာ် ဒးဒုၚ်တးပါဲထောံတုဲ ဗွဲကြဴဏံ ပ္ဍဲသၞာံ ၂၀၂၅ ဂိတုအံက်တဝ်ပါ ၁၀ ဂှ် နူကဵု JFM ကေုာံ ICJ Norway တံ ထပ်တေၚ်စပ်လဝ် ကဵုညးတာလျိုၚ်အဆံၚ်လ္တူတံ မဒှ်ရ။
နူကဵုတေဝ်လဳနဝ် ဟိုတ်နူပါ်ပရအ်တြးကဵုလဝ် ဇရေၚ်ဂကောံပၞာန်ဗမာတံ စပ်ကဵုတၚ်နၚ်ပရေၚ်ကိစ္စဇၞော်ဇၞော် ဆက်စပ်မံၚ်ကဵုပရေၚ်အခေါၚ်မၞိဟ်တံတုဲ ကဵုမံၚ်ဇြဟတ်ကဵု ပရေၚ်ရာဇဝတ် ဂစိုတ်ကဠက်ဂကူမၞိဟ်ဂှ် တေၚ်စပ်ပံက်လဝ်အမှု ရောၚ်။
ဟိုတ်ဂှ်တုဲ ဂကောံဒပ်ပၞာန်ဗမာတံ ပရေၚ်ရပ်စပ်ပျဲပျာံဂစိုတ်လဝ် ဟွံမွဲကဵုဗဗွဲဓဝ်တံဂှ် ကဵုလဝ်ဇြဟတ်သၟးဟွံက ညံၚ်ကောန်ဍုၚ်ဗမာတံဂွံဒးဒုၚ်ဂိအာလဝ် ပရေၚ်တၚ်ယုတ်ဒေက်ဒှ်ကၠုၚ်လဝ်နာနာသာ်တံဂှ် နူကဵုတေဝ်လဳနဝ် ဒးဒုၚ်ကေတ်အာတာလျိုၚ်ပေၚ်ၚ်ရောၚ် JFM ဟီုရ။
စပ်ကဵုတၚ်စောဲစပ်လဝ်တံတုဲ နူလပါ် ကာန်ပနဳတေဝ်လဳနဝ်တံလေဝ် ပံၚ်တောဲရေၚ်တၠုၚ်ကၠောန်အာကဵု ကရောံညးဂၠိုၚ်ဂၠာဲစၟဳစၟတ်တံကီုရောၚ် ဟီုလဝ်ရ။
အပ္ဍဲသၞာံ ၂၀၂၃ ဂှ် တေဝ်လဳနဝ် စလုပ်ကၠုၚ်ဍုၚ်ဗမာတုဲ ဒပ်ပၞာန်ဗမာကလေၚ်သီအဝဵုတုဲ စိုပ်သၞာံ ၂၀၂၂ ဂိတုမာတ်ဂှ် သွံထောံပရေၚ်ကမၠောန်အလုံအိုဿီုတံတုဲ တိတ်အာနူကဵုရးနိဂီုဍုၚ်ဗမာရ။
ပရိုၚ်-သြၚ်လောန်တိုၚ်မ်
ဓာတ်ပုံ-Social Media