တနၚ်သဳ၊ သိပ်တေမ်ပါ ၁၉
အပ္ဍဲကဵုရးရတနၚ်သဳ ကွာန်နွံမံၚ် ပွိုၚ်ဍုၚ်တနၚ်သဳတံဂှ် အကြာတ္ၚဲတံဏံ ဟိုတ်နူဒပ်ပၞာန်ဗမာ ဗတိုက်လဝ်ကဵုဒရုၚ်တုဲ ညးဒေသၜါတၠ ဒးအာလဝ်ဝပ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူကဵုဂိတုသိပ်တေမ်ပါ ၁၁ စဵုကဵု ၁၇ ဂှ် ပ္ဍဲပွိုၚ်ဍုၚ်တနၚ်သဳ ကွာန်ပျဳဧ၊ တာန်တိုက်၊ ကျံက်ဖျာအေၚ်ကဵု ကွာန်တကူဂှ်မ္ဂး ဒပ်ပၞာန်ဗမာတံ ဗတိုက်မံၚ်ကဵု ဒရုၚ်ဂစိုတ်ဇကု မဒှ်ရ။
ဟိုတ်နူ ဒးဒုၚ်ဗတိုက်လဝ်ဘဲဒရုၚ်ဂစိုတ်ဇကု ဒပ်ပၞာန်ဗမာတုဲ ကောန်ကွာန် ကျံက်ဖျာအေၚ် သၟတ်အာယုက် ၁၉ ၜါတၠ ဒးအာဝပ်ကီု သ္ၚိဌာန်ပန်မကဵု တၞံခၞေဝ်ကေဝ်စဂွံတံဂှ်လေဝ် လီုလာ်အာလဝ်နွံကီု သ္ဂးရ။
မွဲလပါ်ပၠန် နူကဵုတမ်ဒမ် ဖျေံသ္ဇိုၚ် ဒေသတနၚ်သဳတံလေဝ် အကြာကွာန်မၞိဟ်မံၚ်စံၚ်မံၚ်ဂှ် အခိၚ်ဗ္တံဗ္တံ ဗက်ပန်စုတ်မံၚ်လွဟ်ဇၞော်တံ မဒှ်ရ။
ဟိုတ်နူ ပရေၚ်ဒပ်ပၞာန်ဗမာတံ ဗတိုက်မံၚ်ကဵုဒရုၚ် ကေုာံ လွဟ်ဇၞော်တံတုဲ ညးဒေသ ရဲကွာန်ပျဳဧ၊ တာန်တိုက်၊ ကျံက်ဖျာအေၚ် ကဵု ကွာန်တကူတံဖေက်တုဲ ဂြိပ်ပါဲအာ ဒၞာဲဗၠးဘဲတံဂှ်ရ။
စနူဂိတုသိပ်တေမ်ပါ ၁ ဂှ်တုဲ ကရပ်ကွာန်နွံမံၚ် အကြာသ္ကုတ်ဂၠံၚ် မဝ်တံၚ်-တနၚ်သဳတံဂှ် ဒပ်ပၞာန်ဗမာကဵု ဒပ်ပံၚ်တောဲပၠန်ဂတးတံ ပေါဲဗတိုက်ကလေၚ်ဒှ်ပၠန်တုဲ အကာဲအရာပရေၚ်ပၞာန်ၜါလပါ်တံ ကြံၚ်မ္ၚိုဟ်မံၚ်ရောၚ် ဂွံတီရ။
ပရိုၚ်-သြၚ်လောန်တိုၚ်
Photo -Social Media