မတ်မလီု၊ သိပ်တေမ်ပါ ၂၁
အပ္ဍဲတွဵုရးမန် ရဲတိုန်လဝ်ဘာယိုက်ဝန်ပၞာန် လၟေၚ် ၅ ကောန်ပၞာန် ကြပ်ဖအိုတ်စဴကၠုၚ်သ္ၚိမာန်ဂှ် အလဵုအသဳပၞာန် တြးလဝ်ဝါဒရ။
ကောန်ပၞာန်စှ်ေလဝ်ဘာပရေၚ်ယိုက်ဝန်ပၞာန် လၟေၚ် ၅ တံ ယိုက်ဂၠေၚ်တာလျိုၚ် ပေၚ်စိုပ်အာ ၂ သၞာံတုဲ ပ္ဍဲကဵုဌာန်ဂအုပ်ရးပၞာန်အဂၞဲ ဍုၚ်မတ်မလီု ဂိတုသိပ်တေမ်ပါ ၁၈ ဂှ် ဒဒှ်ရပရေၚ်ယိုက်ဂၠေၚ် တာလျိုၚ်တုဲဒှ်အာတုဲ အာပ်ပြာပ်ကဵု တၞးလိက်စၟတ်သမ္တီ (ဗီုပြၚ်-၁၂) ရ။
အတိုၚ်ဗီုရုပ် ဂကောံအလဵုအသဳပၞာန်တွဵုရးမန် လလောၚ်ပတိတ်လဝ်မ္ဂး တၞးလိက်စၟတ်သမ္တီ ယိုက်ဂၠေၚ်တာလျိုၚ် တုဲဒှ်တံဂှ် အာပ်ပြာပ်ကဵုလဝ် ကောန်ပၞာန် ၁၅၀ တၠ စှ်ေလဝ်ဘာယိုက်ဝန်ပၞာန် လၟေၚ် ၅ တံရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်မ္ဂး ပ္ဍဲသၞာံ ၂၀၂၄ ဂိတုသိပ်တေမ်ပါ ၃ ဂှ် နူကဵုတွဵုရးမန် ပံက်လဝ်ဘာယိုက်ဝန်ပၞာန် လၟေၚ် ၅ တုဲ ကွးဘာပၞာန် ကရပ် ၁၆၀ တံ တိုန်လဝ်ရ။
အတိုၚ်တၚ်နၚ် နူကဵုအလဵုအသဳလလောၚ်တြးလဝ်ဂှ်တှ်ေ ကောန်ပၞာန်တိုန်လဝ်ဘာယိုက်ဝန်ပၞာန်လၟေၚ် ၅ ပ္ဍဲတွဵုရးမန်တံ ကြပ်သီုဖအိုတ် ပရေၚ်ဒးဝပ်ချိုတ်လဝ်အောန်တုဲ ကလေၚ်စဴကၠုၚ် သ္ၚိဌာန်မာန်ကၠုၚ် မဒှ်ရ။
အခိၚ်ကာလ ကောန်ပၞာန်ပရေၚ်ယိုက်ဝန်ပၞာန် လၟေၚ် ၅ တံ စှ်ေဘာတုဲ စနူဂိတုဒဳဇြမ်ပါ သၞာံ ၂၀၂၄ တေံမ္ဂး ပ္ဍဲတွဵုရးမန်ကဵုတွဵုရးကရေၚ် အကြာဒပ်ပၞာန်ဗမာကဵု ဒပ်ပၠန်ဂတးတံ ပေါဲဗတိုက်ဇၞော်ကဵုဇြဟတ်ဒှ်ကၠုၚ်လဝ်ရောၚ် ဂွံတီရ။
အတိုၚ်လိက်ဒုၚ်စဳရေၚ် ဂကောံလ္ၚတ်ပရေၚ်ပၞာန် ဆေၚ်စပ်ကဵုပရေၚ်ဂီုကၠီု MDSI မ္ဂး ပ္ဍဲဒပ်ပၞာန်သီအဝဵု နွံတိုန်မံၚ်ပၟိက် ဇြဟတ်ကောန်ပၞာန်ဇၞော်ကဵုဇြဟတ်ကီု ဟိုတ်နူအကာဲအရာပရေၚ်တိဍာ် ဒးကၟာတ်ကၠုၚ်လဝ် ဘာပၞာန်လ္ၚဵုတံဂှ် ကလေၚ်ပံက်ဏာတုဲ ဒုၚ်တဲထပ်ထပဵု ကဵုမံၚ်ပရေၚ်ခန်လ္ၚတ်တံရောၚ် လလောၚ်တြးလဝ်ရ။
ပ္ဍဲတွဵုရးမန် ဒပ်ပၞာန်ဗမာ ပံက်လဝ်ဘာပရေၚ်ယိုက်ဝန်ပၞာန် စိုပ်ကၠုၚ်လၟေၚ် ၂၈ တုဲ အပ္ဍဲဏံ ကောန်ပၞာန်စှ်ေလဝ်ဘာယိုက်ဝန်ပၞာန် နူကဵုလၟေၚ် ၁ စိုပ်လၟေၚ် ၅ တံဂှ် ပတိတ်ကဵုလဝ် တၞးလိက်စၟတ်သမ္တီ ပရေၚ်ယိုက်ဂၠေၚ်တာလျိုၚ်တုဲဒှ်အာယျဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – MOI