မတ်မလီု၊ သိပ်တေမ်ပါ ၂၁
အပ္ဍဲတွဵုရးမန် ဍာန်ဟွံလုပ်သၞောဝ် ဒၞာဲတတ်ကၠောံဂၠံၚ်ကွဳပၟတ် မတ်မလီု-လ္ဂုၚ်တံဂှ် ညံၚ်ဂွံကၟာတ်ထောံညိ နူကဵုအလဵုအသဳ တွဵုရးမန် ဌာနဝန်ဇၞော်ပရေၚ်ဓါတ်လလဳကွတ်စက်ကဵု ပရေၚ်ဆက်စၠောံဂၠံၚ်ဍာန် ဝန်ဇၞော် ဥူဇေယျာဥူ ကဵုလဝ် စၞောန်ပ္ညုၚ်ရ။
စပ်ကဵုပရေၚ်ဂၠံၚ်ကွဳပၟတ်တံတုဲ အဟိန် ဝန်ဇၞော် ဥူဇေယျာဥူ ဌာနဝန်ဇၞော် ပရေၚ်ဓါတ်လလဳကွတ်စက်ကဵု ပရေၚ်ဆက်စၠောံဂၠံၚ်ဍာန် အာစိုပ်စၟဳစၟတ် ပွိုၚ်ဍုၚ်သဓီုကဵုပွိုၚ်ဍုၚ်ပံၚ်တံဂှ် ကဵုလဝ်စၞောန်ပ္ညုၚ် အတိုၚ်ဏံရောၚ်။
အတိုၚ်ဂၠံၚ်ကွဳပၟတ် မတ်မလီု-လ္ဂုၚ် ဍာန်ဟွံလုပ်သၞောဝ် တတ်ကၠောံ ဂၠံၚ်ကွဳပၟတ် အကြာမတ်မလီုကဵု တိၚ်ဇြယာတ်တံကီု ဍာန်ဟွံလုပ်သၞောဝ် ကၠောံဂၠံၚ်ကွဳပၟတ် ပွိုၚ်ဍုၚ်ပံၚ်ကဵု ပွိုၚ်ဍုၚ်သဓီုတံကီု သွက်ဂွံကၟာတ်ထောံညိဂှ် ကဵုလဝ်စၞောန်ပ္ညုၚ်ရောၚ် ဂွံတီရ။
ဟိုတ်နူပရေၚ်ဍာန်ဟွံလုပ်သၞောဝ် တတ်ကၠောံဂၠံၚ်ကွဳပၟတ်တံနွံမံၚ်ဗီုဏံတုဲ ညံၚ်ဟွံဂွံတေက်ဇီုဒးညးသ္ကံကဵုကွဳစက်ယာန်တံဂှ်ရ ဗွဲမပြဟ်ညံၚ်ဂွံကၟာတ်ထောံ ဍာန်ဟွံလုပ်သၞောဝ် တတ်ဂၠံၚ်ကွဳပၟတ်တံညိဂှ် ကဵုလဝ်စၞောန်ပ္ညုၚ်ရောၚ် ဂွံတီရ။
တုဲပၠန် စပ်ကဵုပရေၚ်ဍာန်ဟွံလုပ်သၞောဝ် တတ်ကၠောံဂၠံၚ်ကွဳပၟတ်တံတုဲ အန္တရာဲဗီုကတဵုဒှ်အာမာန်တံဂှ်လေဝ် သွက်ဂွံကဵုအာပရေၚ်ပညာကု ညးဍုၚ်ကွာန်တံအိုတ်ညိဂှ် ကဵုလဝ်စၞောန်ပ္ညုၚ်ကဵု သ္ကိုပ်ပရေၚ်အုပ်ဓုပ် အရာပ်/ကွာန်တံရောၚ်။
ညးဍုၚ်ကွာန်တံအတိုၚ်အာကၠုၚ်မံၚ်ဓမ္မတာဂှ် သ္ပထောံ ဂၠံၚ်ဍာန် တတ်ဂၠံၚ်ကွဳပၟတ်တုဲကၟာတ်ထောံမ္ဂး ပရေၚ်အာကၠုၚ်တံ ဒှ်တိုန်တၚ်ဝါတ်ဂါတ်မာန်ကီု စၞးကၟာတ်ထောံ ဂၠံၚ်တတ်တံဂှ် အခိၚ်ကွဳပၟတ်အာကၠုၚ်မ္ဂး စွံလဝ်ပရေၚ်ဒၞာတာမွဲမွဲထေက်ရောၚ် ညးဒေသလ္ၚဵုတံ သ္ဂးရ။
ပ္ဍဲဂိတုဂျောန်ပထမသတ္တဟတေံလေဝ် သွက်ကွဳပၟတ်အသိၚ်မြက် DEMU ဂွံဂြိပ် မတ်မလီု-လ္ဂုၚ်မာန်ဂးတုဲ ဒၞာဲဍာန်ဟွံလုပ်သၞောဝ် တတ်ဂၠံၚ်ကွဳပၟတ် နွံမံၚ် ၁၀၀ ပြၚ် အပ္ဍဲကဵုသ္ကုတ်ဂၠံၚ်တံဏံဂှ် အလဵုအသဳတွဵုရးမန် စဵုဒၞာဲထောံဒပ်တုဲ ကၟာတ်လဝ်နွံရ။
အပ္ဍဲဒေသတံဏံဝွံ ပွိုၚ်ဍုၚ်ပံၚ်မ္ဂး ဍာန်ဟွံလုပ်သၞောဝ် ဒၞာဲတတ်ကၠောံဂၠံၚ်ကွဳပၟတ်တံ နွံမံၚ်ဂၠိုၚ်အိုတ်မွဲဒှ်တုဲ လၟေၚ်ၚ်သၞာံမ္ဂး ပရေၚ်ကွဳပၟတ်လိုန်ဒးဇီုဒးတုဲ ချိုတ်ဒးလဝ်ဝပ်တံ မဒှ်ပွိုၚ်ဍုၚ်ဂၠိုၚ်အိုတ်မွဲရောၚ် ဂွံတီရ။
ပ္ဍဲကဵုတွဵုရးမန် စနူသၞေဟ်ကွဳပၟတ်မတ်မလီု ဒဵုစိုပ်သၞေဟ်ကွဳပၟတ် တိၚ်သယာတ်ဂှ် ဒၞာဲတတ်ဂၠံၚ်ကွဳပၟတ် ၁၅၇ ဒၞာဲနွံတုဲ အပ္ဍဲဏံ ဒၞာဲတတ်ဂၠံၚ်ကွဳပၟတ်လုပ်သၞောဝ် ၁၆ ဒၞာဲ၊ သှ်ေမံၚ်တံဂှ် ဒှ်ဂၠံၚ်တတ်ဟွံလုပ်သၞောဝ်ရောၚ် အလဵုအသဳပၞာန် ဟီုလဝ်ရ။
ပရိုၚ်-သြၚ်လောန်တိုၚ်မ်
Photo – MOI