သဓီု၊ သိပ်တေမ်ပါ ၂၁
အပ္ဍဲတွဵုရးမန် ပွိုၚ်ဍုၚ်သဓီု ဒၞာဲကွဳပၟတ်ကေၚ်တေက်ဇီုလဝ် ဍာန်တတ်ဂၠံၚ်ကွဳပၟတ် အကြာကွာန် သေန်ဖျူကျောန်ကဵု ဂၠံၚ်အာဍုၚ်သဓီုတံဂှ် ကၟာတ်ထောံဂှ်တုဲ ပရေၚ်အာကၠုၚ် ညးဍုၚ်ကွာန်ၜါကွာန်ဏံ ဒှ်မံၚ်အခက်ခုဲဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုသိပ်တေမ်ပါ ၁၉ တေံ အကြာမိုင်တိုၚ်ကွဳပၟတ် ၁၃၆/၂ ကဵု ၁၃၆/၄ ဒၞာဲဍာန်တတ်ဂၠံၚ်ကွဳပၟတ် ကွာန်သေန်ဖျူကျောန်ကဵု ဂၠံၚ်အာဍုၚ်သဓီုဂှ် ကွဳပၟတ်မြက်စၟတ် ၈၁ ကဵု ကွဳစက်လိုက်ထရာတ်တံ တေက်ဇီုလဝ်ဂှ် ညးဒဳကွဳစက်ဒးအာဘဲဝပ်ဂှ်ရ စိုပ်အခိၚ်သဝ်တ္ၚဲဂှ်တှ်ေ နကဵုပသဲဂၠံၚ်ကွဳပၟတ် ကၠုၚ်ကၟာတ်ဂစိုတ်ထောံ ဒၞာဲဍာန်တတ်ဂၠံၚ် ကွဳပၟတ်ဂှ်ရောၚ် သ္ဂးရ။
ဟိုတ်နူ ဒၞာဲဍာန်တတ်ဂၠံၚ်ကွဳပၟတ် ဒးဒုၚ်ကၟာတ်ထောံဂှ်ရ ရဲကွာန်ပဝ်တဝ်မူ လပါ်သၟဝ်ကဵု ကွာန်သေၚ်ဖျူကျောန်တံကီု သီုကဵုကွးဘာတံ ပရေၚ်အာကၠုၚ် ညးဒေသတံသီုဖအိုတ်ဂှ် ဒှ်အာအခက်ခုဲရ။
သွက်ဂွံကလေၚ်ပံက်ကဵုဂၠံၚ်ဂှ် ညးဍုၚ်ကွာန်တံနွံမံၚ်ပၟိက်တုဲ ဂတးနူဏံ အန္တရာဲညံၚ်ဟွံဂွံဒှ်ဂှ် ညးနွံတာလျိုၚ်တံ ညံၚ်ဂွံစဳဇန်ဖန်ဖက်ကဵုဂှ် ပရေၚ်အာတ်မိက်တံ နွံမံၚ်ရ။
နူကဵုဒၞာဲဍာန်တတ်ဂၠံၚ်ကွဳပၟတ်ဏံ ညးဍုၚ်ကွာန်တံ အာကၠုၚ်တတ်ကၠောံမံၚ် ဟွံအောန်နူ ၃၀ သၞာံနွံကၠုၚ်တုဲ နူကဵုကွာန် သေန်ဖျူကျောန် သွက်ဂွံအာဍုၚ်သဓီု ဂၠံၚ်ဂွံဂေတ်အာလပါ် တၞဟ်ဟ်ဂှ်လေဝ် ဟွံမွဲပုဟ် သ္ဂးရ။
ဒၞာဲဍာန်တတ်ဂၠံၚ်ကွဳပၟတ်ဏံ နူကဵုကွာန်ပဝ်တဝ်မူလ ပါ်သၟဝ်၊ ကွာန်သေၚ်ဖျူကျောန် လၟိဟ်မၞိဟ် ၁၉၀၀ ပြၚ်နွံတုဲ သွက်ပရေၚ်ပညာ၊ ပရေၚ်ထတ်ယုက်၊ ပရေၚ်ပိုန်ဒြပ်မၞိဟ်တံဂှ် ဒးစကာသုၚ်စောဲမံၚ် ဂၠံၚ်ဏံဂှ်ကီု တိဗ္ၚဧက ၆၀၀၀ ပြၚ် သြောံတိတ်မံၚ် နူဒေသဏံဂှ် ဒးဖ္ဍိုက်ပလံၚ်မံၚ် နူကဵုဂၠံၚ်ဏံဖအိုတ် မဒှ်ကီုရ။
တုဲပၠန် ကွးဘာနူကဵုကွာန်တံဏံ ၁၀၀ ပြၚ်တံဂှ် ဒးအာတိုန်စှ်ေမံၚ် ဘာတန်သၠုၚ်တန်ဒေါဝ် လ္တူဍုၚ်သဓီု နူကဵုဂၠံၚ်ဏံ အရိုဟ်ဟ်တ္ၚဲနွံရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ