ၜဳကလေၚ် ၊ သိပ်တေမ်ပါ ၂၁
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ပေါဲဗတိုက်ဟွံမွဲမွဲသာ် ပ္ဍဲကွာန်ကျတံၚ်သိက်ဂှ် ဒပ်ပၞာန်ဗမာကြဳဖျေံဗုမ်ဂှ်ရ ဘာဗတောန်လိက်ကဵု သ္ၚိဌာန် ကြပ် ၄၀ မ လီုလာ်အာလဝ်ရဂှ် ညးအုပ်ကာ ခရိုၚ်သဓီု KNU ပဒိုသဝ်ဧနိုၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ် ဂိတုသိပ်တေမ်ပါ ၁၉ ၜိုတ်အခိၚ်ဗတံ ၁၁ ဂှ် ၜၚ်ကျာ ဂျက်ဖိုက်တာ ဒပ်ပၞာန်ဗမာမွဲမ ကြဳဖျေံဏာဗုမ် ပံၚ် ၅၀၀ ပန်မ လ္တူကွာန် ကျတံၚ်သိက်ဂှ်ရောၚ်။
ဟိုတ်နူ ပရေၚ်ဒပ်ပၞာန်ဗမာ ကြဳဖျေံဗုမ်တုဲ နူကဵုဌာနပရေၚ်ပညာ ဗော်သွးကောန်ဂကူကရေၚ် KNU ပံက်စွံလဝ် ဘာတန်မူလကဵု တန်မူလောန် ၂ မ ဗဒမ် ၄ မကဵု သ္ၚိဌာန် ၃၈ မ လီုလာ်အာအိုတ်ရ။
ဟိုတ်နူပရေၚ်ကြဳဗုမ်ဏံ ဒှ်အာဂှ်ရ ဘာၜါမ ဒးကၟာတ်လဝ်ယာယဳတုဲ ညးဍုၚ်ကွာန်တံလေဝ် ဒးဂြိပ်ပါဲတိတ်အာ နူကွာန်ဂှ်ရ။
ဒပ်ပၞာန်ဗမာဝွံ ညံၚ်ညးဍုၚ်ကွာန်တံ ဟွံဂံၚ်မံၚ်အပ္ဍဲကွာန်ကီု ကောန်ၚာ်တံ ညံၚ်ဟွံဂွံဗတောန်လိက်ကီု ပရေၚ်ဗတိုက်ကၠုၚ်ကြဳထောံလဝ်ဗုမ်ဏံ ကၠောန်မံၚ်သက်က်ရောၚ် ညးအုပ်ကာ ခရိုၚ်သဓီု KNU ပဒိုသဝ်ဧနိုၚ် ဟီုရ။
ဒၞာဲကွာန်ကျတံၚ်သိက် ဒပ်ပၞာန်ဗမာ ကြဳဖျေံလဝ်ဗုမ်ဂှ်တှ်ေ ဒှ်ဒၞာဲတိဍာ်ပရေၚ်အုပ် ခရိုၚ်သဓီု KNU မဟာဒပ် (၁) တုဲ ဒပ်ပၞာန်ဗမာတံ ကၠုၚ်ပန်ဗတိုက်မံၚ်ကဵု ၜၚ်ကျာပၞာန်၊ သီုကဵုလွဟ်ဇၞော်တံဂှ်ရ ညးဒေသကွာန်ကျတံၚ်သိက်တံ ဒးဂြိပ်ပါဲမံၚ်ဘဲပၞာန် မွဲဏှမွဲဏှရ။
ဆဂး ပရေၚ်ကြဳဗုမ် ပ္ဍဲကဵုအလန်ဏံမွဲဝါဂှ် သ္ၚိဌာန်ရဲကွာန်ကျတံၚ်သိက်တံဗွဲမဂၠိုၚ် လီုလာ်အာလဝ်တုဲ ပရေၚ်မံၚ်စံၚ်သွက်ညးဍုၚ်ကွာန်တံလေဝ် ဒှ်ကၠုၚ်အခက်အခုဲ မဒှ်ရ။
ဟိုတ်နူကဵုဒပ်ပၞာန်ဗမာ ပရေၚ်ကြဳဖျေံဗုမ်၊ ပန်လွဟ်ဇၞော် ပ္ဍဲကဵုဒၞာဲတိဍာ် ပရေၚ်အုပ်ခရိုၚ်သဓီု KNU မဟာဒပ် (၁) လၟိုန်န်နွံမံၚ်တုဲ ညးဍုၚ်ကွာန်တံ ဒးမံၚ်စံၚ်တန်တဴအာမံၚ် နကဵုပရေၚ်စိုတ်ဒဝိၚ်ဖေက်တံ မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media