မတ်မလီု ၊ သိပ်တေမ်ပါ ၂၁
အပ္ဍဲတွဵုရးမန် ဍုၚ်မတ်မလီု မဝ်တဝ်ပဳကေဝ် နွံသၟဝ်တဲ အလဵုအသဳပၞာန်တံဂှ် လ္တူညးဒဳကွဳစက်တံ ထၜးဟိုတ်နာနာသာ်တုဲ ကၠောန်မံၚ်ပရေၚ်ဂၠာဲစသြန် ကြီုကွေံကွေံရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စပ်ကဵု စေဝ်ပၞောန်ပရေၚ်ဂၠံၚ်ဍာန်၊ ထိၚ်ဒဝ်ပရေၚ်စေဝ်ပၞောန်ဂၠံၚ် ထၜးဟိုတ်တုဲ ပ္ဍဲဒၞာဲဂၠံၚ်ပန်သွာၚ်တံကီု ပွေက်ပၟတ် ဒၞာဲလုပ်တိတ်ဍုၚ် ဒၞာဲဟွံထေၚ်ခယျလဝ်တံဂှ် မဝ်တဝ်ပဳကေဝ်တံ ဗက်စၟဳစၟတ်မံၚ်အိုတ်ရ။
ပ္ဍဲပရေၚ်ရပ်ကွဳစက်ဏံတှ်ေ စၟဳစၟတ်လိုၚ်သေၚ်ကွဳစက်၊ လိုၚ်သေၚ်မၞိဟ်၊ ယဝ်ရ ကွဳစက်အိုဝ်ဝေမ္ဂး လိုၚ်သေၚ်ကွဳစက် လိုၚ်သေၚ်မၞိဟ်သၟးဟွံက ကွဳစက်လိၚ်စတှ်ေ လိုၚ်သေၚ် ပရေၚ်ကမၠောန်၊ ပတိုန်လဝ်မၞိဟ်အပဵုနွံဟွံမွဲ၊ ပတိုန်လဝ်ကပေါတ်မ္ဂး ဖဍိုက်လဝ်လျိုၚ်ပဵုပဵု ထၜးဟိုတ်နာနာတုဲ ဓရတ်အာတ်ကေတ်မံၚ်သြန် အတေၚ်အဓ္ဓမ မဒှ်ရ။
ၜိုန်ရလိုၚ်သေၚ်ဍိုက်က်ပေၚ်ၚ် ပါမံၚ်ကီုလေဝ် ပတိုန်မၞိဟ်အပဵုကီု ပတိုန်လဝ်ကပေါတ်တံကီုမ္ဂး မဝ်တဝ်ပဳကေဝ်တံရပ်တုဲ အာတ်ကေတ်သြန်နွံမံၚ်ရောၚ် ညးဒဳကွဳစက်အိုဝ်ဝေမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ရဲဍိုက်အိုဝ်ဝေဂှ် လက်ကရဴပိတၠ ဂတးဂှ်ညးဒဳကွဳစက်မွဲ ဆဏံရ။ ပတိုန်မၞိဟ်အပဵုဟွံဂွံပုဟ်။ ပတိုန်ဒးမၞိဟ်ဂတး မဝ်တဝ်ပဳကေဝ်ဆဵုတှ်ေ ရပ်ဏောၚ်။ ကပေါတ်ပါဂၠိုၚ်တှ်ေ ဗက်ဂုဲအာဂုဲကၠုၚ်၊ မွဲအမှု ဒးကဵု (၃၀၀၀၀/၃၅၀၀၀) ဏောၚ်” သာ်ဝွံသ္ဂးရ။
တုဲပၠန် လိုၚ်သေၚ်ပါမံၚ်ဍိုက်က်ပေၚ်ၚ်လေဝ် မဝ်တဝ်ပဳကေဝ်တံ ဗက်ဂၠာဲဒုဟ်မွဲမွဲသာ်တုဲ အာတ်ကေတ်သြန်လေဝ်နွံမံၚ်တုဲ ကဵုသြန်ပြဟ်ဟ်ဟွံမာန်မ္ဂး ထပိုတ်ချလာန်တုဲ ကဵုအာလေဲသြန်ဒဏ် ပ္ဍဲကဵုဇရေၚ် ရုၚ်သၞောဝ်ဓဝ်တံလေဝ် ကၠောန်မံၚ်ကီုရောၚ် ညးဆက်ဟီုရ။
မွဲလပါ်ပၠန် ကွဳလိုန်ဓါတ်တံမ္ဂး လိုၚ်သေၚ်ကွဳ၊ လိုၚ်သေၚ်မၞိဟ်၊ ဂတဵုမုက်မဂၞန်၊ ဒ္ၚောဝ်၊ စနူကဵုခမံက်ကွဳလိုန်ဓါတ်ဂှ် မဝ်တဝ်ပဳကေဝ်တံ ကၠောန်မံၚ်ပရေၚ်စၟဳစၟတ်တုဲ ဟွံပေၚ်မွဲမွဲသာ်မ္ဂး အောန်အိုတ် နူကဵု ၃၅၀၀၀ ဒဵုကဵု ကရပ် ၅၀၀၀၀ ဒးကဵုဏာရောၚ်။
ယဝ်ရ ရပ်ဂွံဏာ ကွဳလိုန်ဓါတ်လိုၚ်သေၚ်ဟွံမွဲမ္ဂး တန်တဴကဵုဂကူကွဳလိုန်ဓါတ်တုဲ အာတ်မိက်သြန်ဟွံတန်ကဵုဆနွံကီု ကဵုသြန်ဟွံမာန်မ္ဂး သီုထောံကွဳလိုန်ဓါတ် ရပ်ထောံဏာသီုမၞိဟ်ကီု ကၠောန်သ္ပမံၚ်ရ။
အခိၚ်ကၠာတေံ ယဝ်ရကလိလောန် ပရေၚ်စေဝ်ပၞောန်ယာန်၊ စေဝ်ပၞောဝ်ဂၠံၚ်မွဲမွဲသာ်မ္ဂး မဝ်တဝ်ပဳကေဝ်တံ ထပိုတ်ကဵုချလာန်တုဲ ကဵုအာလေဲသြန်တပ်ဒဏ် ပ္ဍဲကဵုရုၚ်သၞောဝ်ဓဝ်ကီုလေဝ် လၟုဟ်မ္ဂး ဒးကဵုသြန်ပြဟ်ဟ်တုဲ ဍေံတံဂၠာဲစမံၚ်သြန် သွက်ဍေံတံသၟး ဒှ်မံၚ်ရောၚ် ညးဒေသတံ ပါ်ပါဲမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – Social Media