သိုဝ်၊ သိပ်တေမ်ပါ ၂၁
ရဲဂကောံဂၠာဲပရေၚ်သၞတၚ်တံ ဂစာန်တာဒၞာဲမံၚ် ပရေၚ်ပံၚ်တောဲရေၚ်တၠုၚ် နူကဵုဍုၚ်တၞဟ်ဟ်တံကဵု ကိုဝ်ရဳယာသၟဝ်ကျာဂှ် အေၚ်ဒုၚ်အာဟွံသေၚ်ပုဟ် နူကဵုကိုဝ်ရဳယာသၟဝ်ကျာ ဟီုရ။
ပရေၚ်ဖောအ်ဗြဳကိုဝ်ရဳယာသၟဝ်ကျာ ကေုာံ လ္တူပရေၚ်ဖဵုဂုဏ်ပရေၚ်ပိုန်ဒြပ်တံဂှ် မုပရေၚ်ကၟာတ်ဆိုအ်တၟိတၟိ သာ်လဵုလေဝ် ဗဒေါအ်အာဟွံမာန်ပုဟ် အတိုၚ်လဟီု ညးနွံတာလျိုၚ်ဌာနဝန်ဇၞော်ဍုၚ်သအာၚ်ဂှ် နိဿဲတုဲ နူကဵုဌာန်ပရိုၚ်ကိုဝ်ရဳယာသၟဝ်ကျာ KCNA ချူလဝ်ပရိုၚ်ရ။
စပ်ကဵုပရေၚ်ကၟာတ်ဆိုအ် ဂကောံမၚ်ရံၚ် ပရေၚ်ကဵုဒဏ်ကၟာတ်ဆိုအ် ဂကောံကုလသမဂ္ဂ ၁၁ ဍုၚ်တံ ဟွံလုပ်သၞောဝ်ပုဟ် ဌာန်ပရိုၚ် KCNA သ္ဂးရ။
အကာဲအရာ ပရေၚ်ကိုဝ်ရဳယာသၟဝ်ကျာ စိုပ်မံၚ်ဗီုပြၚ်ဓမ္မတာတုဲ ဟိုတ်နူ ပရေၚ်ပံၚ်တောဲရေၚ်တၠုၚ် နူကဵုဍုၚ်တၞဟ်ဟ်တံကဵု ကိုဝ်ရဳယာသၟဝ်ကျာဂှ် အကြာၜါလပါ် ညံၚ်ရဴဒှ်မံၚ်ကလောန် ပရိုၚ်ရန်တၟံလဝ်တံ မံက်တိတ်မံၚ်ရ။
ပရေၚ်တၚ်သ္ဂုတ်သွာတ် ကံၚ်သဳပရေၚ်ဂီုကၠီုတံ ဖျေံလဝ်ဂှ် ကိုဝ်ရဳယာသၟဝ်ကျာ ဖံက်ပကဝ်လဝ်တုဲ ဆက်ပလံၚ်ဗစိုပ်ဏာမံၚ်သၟာကမၠောန် ဍုၚ်သအာၚ်တံရောၚ် ဂကောံမၚ်ရံၚ် ပရေၚ်ကဵုဒဏ်ကၟာတ်ဆိုအ်တံ ဟီုရ။
နူကဵု ပရေၚ်ကိုဝ်ရဳယာသၟဝ်ကျာ ပလံၚ်ဏာမံၚ်သၟာကမၠောန်ဍုၚ်သအာၚ်တံဂှ် ပ္ဍဲသၞာံ ၂၀၂၅ ဂွံလဝ်သြန်ဒဝ်ဠာ ၄၅၀ ဒဵုကဵု ၈၀၀ ပြကောတိကိုတ်ရောၚ် တော်လဝ်ရ။
နူကဵုသြန်တံဏံ ထံက်ပံၚ်ကဵုလဝ်သြန်ဂအုံ သွက်လွဟ်နျူကလဳယာ ကေုာံ ကိုန်အစဳဇန်ကမ်သၠောဝ်ထိၚ်သၞေဝ်တံရောၚ် ဂွံတီရ။
အဓိက ပ္ဍဲကဵုဍုၚ်ကြုက်ကဵု ရတ်ယှာ အောန်အိုတ် ၁၇ ဍုၚ်တံဂှ် သၟာကမၠောန်ကိုဝ်ရဳယာသၟဝ်ကျာ အကြာ ၃၅၆၀၀-၁၀၁၂၈၀ နွံမံၚ်ရောၚ် ပရေၚ်တော်ခယျလဝ်တံ နွံရ။
လ္ပထပ်ပတိတ်ကဵုပါမေတ်ပရေၚ်ကမၠောန် ကလေၚ်ပလံၚ်ဖျဴ သၟာကမၠောန်ကိုဝ်ရဳယာသၟဝ်ကျာတံတုဲ အတိုၚ်သ္ဂုတ်သွာတ် ကုလသမဂ္ဂဂှ် ညံၚ်ဂွံမၚ်မွဲအာ နူကဵုဂကောံမၚ်ရံၚ်တံ ဗတိုက်ဖအောဝ်လဝ်ကီုရ။
ပ္ဍဲဂကောံမံၚ်ရံၚ်ဏံ အဝ်သတေလျ၊ ကနေဒါ၊ ပြၚ်သေတ်၊ အဳတလဳ၊ ဂျပါန်၊ နေဝ်တာလေန်၊ နယူဇြဳလာန်၊ ကိုဝ်ရဳယာသၠုၚ်ကျာ၊ အဂႅလိက်ကဵု အမေရိကာန်တံ ပါလုပ်မံၚ်ရ။
Ref:Reuters