မတ်မလီု ၊ သိပ်တေမ်ပါ ၂၃
သွက်တိုၚ်ခဳသ္ပစၞးညးဗြဴ ကံၚ်သဳပၠတရဴဖိတ်ဒရေဝ် SCEF မ္ဂး နဒဒှ် ဂကောံသ္ပစၞးသ္ဇိုၚ်ဂကောံ ပရေၚ်ဍုၚ်ကွာန်ညးဗြဴဂှ် ဂဥုပ်ဂကောံ ညးဗြဴ(ဍုၚ်ဗမာ) ကေုာံ ဂကောံပံၚ်ကောံညးဗြဴ ဂကောံပရေၚ်ဍုၚ်ကွာန်တံဂှ် သွက်ဂွံဗလးဏာ ညးသ္ပစၞး ညးဗြဴတံ နွံရ။
ဂိတုသိပ်တေမ်ပါ ၁၉ ဏံ သွက်ဂွံထမံၚ်ရုပ်ရဴ တိုၚ်ခဳသ္ပစၞးညးဗြဴ SCEF ဂှ် နူကဵုဂကောံညးအုပ်ကာကေုာံ ကမ္မတဳယာယဳ ဂကောံပံၚ်ကောံညးဗြဴ ဂကောံပရေၚ်ဍုၚ်ကွာန် SCEF တံ ကၠောန်လဝ်ကောံဓရီုရဂှ် လလောၚ်ပတိတ်လဝ် ပရိုၚ်ရ။
ဂကောံညးအုပ်ကာ SCEF သ္ကိုပ်ပ္ညဳပ္ညပ် ဒံက်တာဇြဝ်ဝေသိုဝ် ဟီုဏာဂလာန်ပ္ဍဲကောံဓရီုတုဲ စပ်ကဵုပရေၚ်တိုၚ်ခဳညးဗြဴ တၚ်သဳကၠဳ ပလေဝ်အာတံဂှ် ဂကောံညးအုပ်ကာ SCEF ဒဝ်ဇြူပဒုမ္မာကေုာံ နူကဵု ကမ္မတဳယာယဳ ဂကောံပံၚ်ကောံညးဗြဴ ဂကောံပရေၚ်ဍုၚ်ကွာန် SCEF သွက်ဂွံပံက်အာတိုၚ်ခဳ သ္ပစၞးညးဗြဴဂှ် ဒဝ်ဧသံၚ်၊ နဝ်သေဝ်ဝ်တံ ပတိုန်ထ္ၜးလဝ်ရ။
နူကဵုတၚ်နၚ်သဳကၠဳလဝ်ဏံ စပ်ကဵုပရေၚ် တိုၚ်ခဳသ္ပစၞးညးဗြဴ SCEF မ္ဂး ညးစၞး သ္ဇိုၚ်ဂကောံပရေၚ်ဍုၚ်ကွာန် ညးဗြဴတံ ပါလုပ်အာတုဲ ပရူပရာ သွက်ဂွံထပ်ပ္ညဳပ္ညပ်သဳကၠဳအာတံ ညံၚ်ဂွံဆက်သဳကၠဳအာမာန် ဂွံလဝ်တၚ်တုပ်စိုတ်တံနွံရ။
ဣဏံဂှ် သွက်ကၟိန်ဍုၚ်ဖိတ်ဒရေဝ်ဒဳမဝ်ကရေသဳ ဂွံမံက်ဂတဝ်အာမာန် ဒှ်ပရေၚ်သ္ပစၟတ်သမ္တီကဵု ပရေၚ်အထံက်ပၚ် ဇြဟတ်အစောန်ညးဗြဴတံရောၚ် နူကဵုဂဥုပ်ဂကောံညးဗြဴ(ဍုၚ်ဗမာ) က္ဍိုပ်သ္ကိုပ်ပရေၚ်စန်ဒက် နာၚ်မိုအ်အ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဗွဲတၟေၚ် ပ္ဍဲကဵု ဗီုပြၚ်ဒက်ပတန် ပရေၚ်အာက္ဍိုပ်ဂှ် စုတ်လဝ်လုပ်ဗဗွဲသၞောဝ် ဟီုလဝ်ဂှ်တှ်ေ ညးဗြဴတံဂှ် ဒှ်မံၚ်ဂကောံဇြဟတ်ပရေၚ်ဍုၚ်ကွာန်မွဲရောၚ် ပရေၚ်သ္ပစၟတ်သမ္တီဟွံက စပ်ကဵုအခေါၚ်အရာပရေၚ်ဍုၚ်ကွာန် အဝဵုပရေၚ်ဍုၚ်ကွာန်တံမ္ဂး အဆံၚ်တုပ်မံၚ်ကဵု ပရေၚ်ပၠန်ဂတး ညးတြုံတံအာမံၚ်က္ဍိုပ်ကီုရောၚ် သ္ပလဝ်စၟတ်သမ္တီဂှ် အဲညာတ်ရ။ ဟိုတ်ဂှ်တှ်ေ ပရေၚ်ဏံ ၜိုတ်ကဵုကိစ္စဇၞော်ရောဟီုတှ်ေ သွက်ညးဗြဴပိုဲသၟးဟွံသေၚ်ဏီ ကာလ ကၟိန်ဍုၚ်ဖိတ်ဒရေဝ်ဒဳမဝ်ကရေသဳ မံက်တိုန်မ္ဂး ဒှ်ပရေၚ်စကၠောန်ကၠာတဲရောၚ် ပိုဲတံပတေဟ်ကေတ်လဝ်” သာ်ဝွံ သ္ဂးရ။
နူကဵု ဂဥုပ်ဂကောံညးဗြဴ(ဍုၚ်ဗမာ) ဂှ် သွက်တိုၚ်ခဳသ္ပစၞးညးဗြဴမ္ဂး ရုဲစှ်ကဵုလဝ်ညးစၞး မပါလုပ်ကၠုၚ်လဝ် ညးဆဵုဂဗနွံနွံ စပ်ကဵုပရေၚ်ဖိတ်ဒရေဝ်တံတုဲ ဂကောံဇြဟတ်ညးဗြဴ သှ်ေမံၚ်တံဂှ်လေဝ် နကဵုဂကောံဇြဟတ်မွဲပေၚ်ၚ် ပါလုပ်အာကီုရောၚ် ညးဆက်ဟီုရ။
ပြဟ်ဟ်ဏံ ဒှ်မံၚ်ပရေၚ်ကာလ စကၠောန်ကၠာတဲတုဲ သွက်ဂွံဒှ်အာ တိုၚ်ခဳသ္ပစၞးညးဗြဴ နွံကဵုပရေၚ်ညးဗြဴအာက္ဍိုပ် ဗွဲမသၠးပွး နွံကဵုအဓိပ္ပါဲ ပေၚ်ၚ်မာန်မ္ဂး ပရေၚ်ကိစ္စအဆံၚ်တုပ်သၟဟ်ကဵု ပရေၚ်သ္ပစၞးတိုၚ်ခဳ တၞဟ်ဟ်တံဂှ်လေဝ် သွက်ဂွံဆက်ပ္ညဳပ္ညပ်အာပၠန်ရောၚ် နာၚ်မိုအ်အ် သောၚ်ကလးလဝ်ရ။
SCEF ဂှ် ဒက်ပတန်လဝ်ကဵု တိုၚ်ခဳသ္ပစၞး တွဵုရး/ ယူနေတ်ဖိတ်ဒရေဝ်/ EROs၊ တိုၚ်ခဳသ္ပစၞးညးဍုၚ်ကွာန် ကေုာံ ပရေၚ်သ္ပစၞးညးဗြဴ/ ညးစၞးနာနာ ဒုၚ်သ္ဇိုၚ်ကဵု တိုၚ်ခဳပိတိုၚ်ဏံတုဲ သၞာံ ၂၀၂၆ ဂိတုမာတ် ၃၀ ဂှ် ဒက်ပတန်လဝ်ရောၚ်။
သၞောတ်တၠအဝဵုပၞာန်ကီု ယြဴသၞောတ်တၠအဝဵုလဵုဒှ်ဒှ် ညံၚ်ဂွံထပိုတ်အာ ရိုဟ်ကၞက်ဂးတုဲ အတိုၚ်တင်ရန်တၟံ ကေုာံ တၚ်ရန်တၟံမဟာဗျူဟာ SCEF ဂှ် စကၠောန်အာ တၠုၚ်လအာပရေၚ်ဍုၚ်ကွာန်တၟိမွဲရောၚ် လလောၚ်တြးလဝ် မဒှ်ရ။
ပ္ဍဲကဵုအရာဖျေံတင်သ္ဂုတ်သွာတ် ပရေၚ်ဍုၚ်ကွာန်တံမ္ဂး နကဵုလညာတ်သဘဴဓဝ် ပရေၚ်ပံၚ်ကောံ အာက္ဍိုပ် ဂကောံကောန်ဍုၚ်အရၚ်ရပ်လွဟ်တံကီု၊ ဂကောံဇြဟတ် ပၠန်ဂတးဒဳမဝ်ကရေသဳ၊ ဂကောံညးဗြဴ ကေုာံ ညးစၞးညးဍုၚ်ကွာန်တံဂှ် ထမံက်အာရုပ်ရဴရောၚ် ဟီုလဝ်ရ။
အခိၚ်စပံက်ကၠုၚ်လဝ်တေံမ္ဂး ပ္ဍဲကဵုတိုၚ်ခဳသ္ပစၞးညးဍုၚ်ကွာန်ဂှ် အလဵုအသဳညဳသၟဟ်ကောန်ဂကူ NUG ကဵု ကမ္မတဳသ္ပစၞးစၠတ်ထဝ် ကၟိန်ဍုၚ်တံနွံတုဲ အပ္ဍဲတိုၚ်ခဳသ္ပစၞး တွဵုရး/ ယူနေတ်ဖိတ်ဒရေဝ်/ EROs တံဂှ် KIO, KNU, CNF ကဵု ဍုၚ်ကရေၚ်ဍာဲတံ ပါလုပ်ရ။
ပြဟ်ဟ်ဏံ ဂကောံနူကဵုဒေသအညာ ယူနေတ်ဖိတ်ဒရေဝ်သဂိုၚ်၊ ယူနေတ်ဖိတ်ဒရေဝ် မဂွေ၊ ဒေသမာန္တလေဝ် ပံၚ်ကောံကၠုၚ် ပ္ဍဲကဵုတိုၚ်ခဳသ္ပစၞး တွဵုရး/ ယူနေတ်ဖိတ်ဒရေဝ်/ EROs တံ မဒှ်ရ။
ဟိုတ်ဂှ်တုဲ ပ္ဍဲ SCEF သွက်ဒၞာဲသၠးမံၚ် ပရေၚ်သ္ပစၞးညးဗြဴ/ ညးစၞးနာနာ တံဂှ် ညးစၞး နူကဵုဂကောံ ပရေၚ်ဍုၚ်ကွာန်သ္ပစၞးညးဗြဴတံ ညံၚ်ဂွံပါလုပ်ကၠုၚ် ကၠောန်ဗဒှ်ကောံဓရီုဏံရောၚ်။
ပ္ဍဲကောံဓရီုဝွံ နူကဵု SCEF ညးပါလုပ် ဂကောံညးအုပ်ကာတံကီု၊ နူကဵု ကမ္မတဳယာယဳ ဂကောံပံၚ်ကောံညးဗြဴပရေၚ်ဍုၚ်ကွာန် SCEF သွက်ဂွံပံက်အာတိုၚ်ခဳသ္ပစၞးညးဗြဴတံ ကေုာံ ညးတာလျိုၚ်တၞဟ်ဟ်တံဂှ် တိုန်စိုပ်လဝ်ရောၚ် နူကဵု SCEF လလောၚ်ပတိတ်လဝ် ပရိုၚ်ရ။
ပရိုၚ်-သြၚ်လောန်တိုၚ်မ်
Photo – SCEF