ကအ်သံၚ်၊ သိပ်တေမ်ပါ ၂၄
အပ္ဍဲရးတနၚ်သဳ ပွိုၚ်ဍုၚ်ကအ်သံၚ် ဟံၚ်ပြာ်ပတိတ်ဂွံနၚ် သၟတ်ဒးဒုၚ်တံၚ်ရပ်လဝ်ပဝ်တာ ၜါတၠကဵု ကောန်ပၞာန်ယိုက်ဝန်ပၞာန်မွဲတၠရဂှ် ဂကောံစဵုဒၞာညးဍုၚ်ကွာန် ပွိုၚ်ဍုၚ်ကအ်သံၚ် လလောၚ်ပတိတ်လဝ်ပရိုၚ်ရ။
တုဲကၠုၚ်ဂိတုသိပ်တေမ်ပါ ၁၅ တေံ ပ္ဍဲကဵုရုၚ်သ္ကိုပ်ပရေၚ်အုပ်ဓုပ် ကွာန်မလိဝါန်ဂှ် မောၚ်ကျဝ်မေန်ဥူ အာယုက် ၂၁ သၞာံကဵု မော်ကျဝ်မေန်ခ အာယုက် ၂၄ မဒှ်ဌာန်ဒၟံၚ်ကအ်သံၚ်တံ ဒးဒုၚ်ရပ်လဝ်ပဝ်တာဂှ် ဂကောံပကဖ ကအ်သံၚ်တံ ဟံၚ်ပြာ်ကေတ်ပတိတ်ဂွံနင်လဝ်ရ။
သၟတ်ၜါတၠ ဒးဒုၚ်ရပ်လဝ်ပဝ်တာတံ ဖံက်အချုက် ရုၚ်ပရေၚ်အုပ်ဓုပ် ကွာန်မလိဝါန် ဂြိပ်တိတ်ကၠုၚ်လဝ်ဂှ် နူကဵု ဂကောံစဵုဒၞာညးဍုၚ်ကွာန် ပွိုၚ်ဍုၚ်ကအ်သံၚ်တံ အာရီုဗၚ်ဟံၚ်ပြဟ်ဂွံနၚ် မဒှ်ရ။
ပ္ဍဲဂိတုသိပ်တေမ်ပါ ၁၃ သၟတ်ၜါတၠဏံ အဟိန်အာပရေၚ်ကမၠောန် လပါ်ကွာန်မလိဝါန်ဂှ် ဒပ်ပၞာန်ဗမာရပ်ဂွံတုဲ သွက်ဂွံယိုက်ဝန်ပၞာန် ချုက်စွံလဝ်ပ္ဍဲကဵုရုၚ်အချုက် သ္ကိုပ်ပရေၚ်အုပ်ဓုပ် ကွာန်မလိဝါန်ဂှ်ရ။
တုပ်ကဵုပရေၚ်ဏံကီု ပ္ဍဲဂိတုသိပ်တေမ်ပါ ၁၀ ဂှ်လေဝ် ကောန်ပၞာန် ပရေၚ်ယိုက်ဝန်ပၞာန် ဇြဝ်ကိုကို ဂြိပ်တိတ်ကၠုၚ် နူကဵုတမ်ဒပ် ခလရ ၂၆၂ ဖျေံသ္ဇိုၚ်ကအ်သံၚ်ဂှ် ရဲဂကောံပကဖ ကအ်သံၚ်တံ ဟံၚ်ပြာ်ပတိတ်နၚ် ပ္ဍဲဂၠံၚ်မွဲဒၞာဲကီုရ။
ကောန်ပၞာန်ယိုက်ဝန်ပၞာန် ဇြဝ်ကိုကို မဒှ်ရဲဇာတိ နာတ်မံက် ရးမဂွေဝွံ ပ္ဍဲသၞာံ ၂၀၂၅ ၜိုတ်ဂိတုဂျောန်ဂှ် သွက်ပရေၚ်ယိုက်ဝန်ပၞာန် ဒးဒုၚ်တံၚ်ဏာပဝ်တာ တိုန်ဘာပၞာန်လၟေၚ် ၂၀ တုဲ စှ်ေတာလျိုၚ် ပ္ဍဲကဵုတမ်ဒပ်ခလရ ၂၆၂ မဒှ်ရ။
ကောန်သ္ဂံၚ် စိုပ်မံၚ်တဲဒပ်ပၞာန်ဗမာတံ ညံၚ်ဂွံဂတးကလေၚ်ကၠုၚ် လပါ်ညးဍုၚ်ကွာန်တံဗွဲမပြဟ်တုဲ အဟိန်ကၠုၚ်ဂှ် ကေတ်နၚ်သီုလွဟ်မကမ်တံမ္ဂး ဖျေံကဵုလာပ်သြန် ထေက်က်တန်န်ရောၚ် ဂကောံပကဖ ကအ်သံၚ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – ပကဖ ကအ်သံၚ်