မတ်မလီု ၊ သိပ်တေမ်ပါ ၂၃
အပ္ဍဲတွဵုရးမန် ကပေါတ်ကၠုၚ်နူသေံတံဂှ် ပလံၚ်ပါသေဝ် ဗစိုပ်ဏာ ဒေသတၞဟ်ဟ်တံဂှ် အလဵုအသဳပၞာန် ကၟာတ်ထောံအခေါၚ်ယျ သာ်ဝွံ တၠကမၠောန် ပရေၚ်ပလံၚ်ဗစိုပ်ကပေါတ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵုကပေါတ်စၞစသ္ဇိုၚ်၊ ဂဥုဲဂ္ဗနာနာ ကပေါတ်မၞိဟ်ရပ်စပ်သုၚ်စောဲ ပရေၚ်နာနာ ယဝ်ရ ကပေါတ်မလိက်သေံ ပါမံၚ်မ္ဂး မွဲဣဝဵုဒှ်ဒှ် မွဲဓုပ်ဍောတ်တ် ဒှ်ဒှ် ညိဟွံကဵုအခေါၚ်ပလံၚ်ရပုဟ် အလဵုအသဳပၞာန် ကဵုလဝ်စၞောန်ပ္ညုၚ်ရောၚ်။
ဟိုတ်နူ အလဵုအသဳပၞာန် ကဵုလဝ်စၞောန်ပ္ညုၚ်ဂှ်ရ ကပေါတ်မလိက်သေံ ပါမံၚ်မ္ဂး နူကဵုဌာနပရေၚ်ပလံၚ်ဗစိုပ် ကပေါတ်တံ ဟွံပလံၚ်ဗစိုပ်ကဵု တုဲ ကပေါတ်ကၠောန်ပတိတ်မံၚ် နူအပ္ဍဲဍုၚ်ဂှ်ဟေၚ် ဒးပလံၚ်ဗစိုပ် ကဵုမံၚ်ရ။
ကပေါတ်ကၠုၚ်နူသေံသီုဖအိုတ်ဂှ် ဟိုတ်နူ ပတေၚ်ဓရတ်လဝ် ပိုတ်တ် တုဲ ကပေါတ်ကၠုၚ်နူသေံ ဗီုလဵုဒှ်ဒှ် ပလံၚ်ဗစိုပ်ကဵုဟွံသေၚ်ပုဟ် တၠကမၠောန်ပရေၚ်ပလံၚ်ဗစိုပ် ကပေါတ် မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကပေါတ်နူသေံတံ ညိလ္ပပလံၚ်ကဵု လပါ်လ္ဂုၚ်ကီု ဒေသတၞဟ်ဟ်ကီု နူကဵုညးဆေင်စပ်တံ ကဵုလဝ်စၞောန်ပ္ညုၚ်နွံမံၚ်၊ ပိုဲတံ ပလံၚ်ကဵု ဟွံဂွံပုဟ်။ ညးတံဟီု မလိက်သေံပါမံၚ်မ္ဂး ခံက်သဲဟကှ်မွဲဓုပ်ဒှ်ဒှ် ကကဠာမွဲဗူဒှ်ဒှ် ညိလ္ပပလံၚ်ကဵု ဟီုလဝ်ဏောၚ်။ ဟီုလဝ်တုဲ ယဝ်ရပလံၚ်တှ် ဖေက်ဍေံသီကေတ်ထောံ ဖေက်ပရေၚ်ကမၠောန်ပိုဲလီုအာတုဲ ပိုဲဟွံပလံၚ်ကဵုပုဟ်” သာ်ဝွံ သ္ဂးရ။
တုဲပၠန် ပ္ဍဲဂိက်သၞေဟ်ကၚ်ကီု ဆဵုညာတ်အာ ကပေါတ်မလိက်သေံတံ မ္ဂး ရဲသၟဝ်တဲအလဵုအသဳပၞာန်တံ သီကေတ်ဏာသီုဖအိုတ်တုဲ ညးကေတ်နၚ်ကပေါတ်ဂှ်လေဝ် ပရေၚ်ကေတ်အရေဝ် နွံမံၚ်ကီုရောၚ် ညးဆက်ဟီုရ။
မွဲလပါ်တေံပၠန် ကပေါတ်ကၠုၚ်နူသေံတံဂှ် ဟွံလုပ်ဗဗွဲသၞောဝ် ထၜးဟိုတ်တုဲ ရဲသၟဝ်တဲအလဵုအသဳပၞာန်တံ ဗက်ရပ်မံၚ် ပ္ဍဲကဵုဂိက်သၞေဟ်ကၚ်လုပ်တိတ်ဍုၚ်ကီု၊ ဗက်ဂၠာဲရပ်မံၚ် ပၞော်ဂၠံၚ်ကပေါတ်သေံ လုပ်ကၠုၚ်၊ ဒၞာဲရုၚ်ခြိုၚ်စွံလဝ် ကပေါတ်သေံတံ သၟးဟွံက ပ္ဍဲဖျာဇၞော်တံလေဝ် ဗွဲဟွံထေၚ်ခယျလဝ်ဂှ် ဗက်ဂၠာဲရပ် သီကေတ်မံၚ်ရောၚ်။
ဟိုတ်နူ အလဵုအသဳပၞာန် ဗက်ပတေၚ်ရပ်ဓရတ် သီကေတ်မံၚ် ကပေါတ်သေံတံဂှ်ရ အပ္ဍဲဒေသကီု တွဵုရး၊ ရးဒေသဇၞော်တၞဟ်ဟ် တံလေဝ် ကပေါတ်သေံဗွဲမဂၠိုၚ် ပိုတ်အာအိုတ်တုဲ ၚုဟ်မးဍၚ်တိုန်အာ ဟွံတန်ကဵုဆ ဒှ်ကၠုၚ်မံၚ်ရောၚ် သၟာဗၞိက်တံ သ္ဂးရ။
သွက်ဂွံထပၠုပ်နၚ်ကပေါတ်သေံ လုပ်သၞောဝ်မာန်ဂှ် သၟာဗၞိက်တံ ကၠောန်မံၚ်ကီုလေဝ် ဟိုတ်နူအလဵုအသဳပၞာန် ပတေၚ်ဓရတ်လဝ် လိုၚ်သေၚ်ပၠုပ်ကပေါတ်တံတုဲ ပြဟ်ဟ်ဏံ ကပေါတ်တံဏံ ဒှ်အာပရေၚ်ပၠုပ်နၚ်လဝ် နူကဵုဂအာၚ်ဖျာဒမၠုတံ မဒှ်ရ။
ပရိုၚ်-သြၚ်လောန်တိုၚ်မ်
Photo – CJ