ရးတနၚ်သဳ ၊ သိပ်တေမ်ပါ ၂၆
အပ္ဍဲရးတနၚ်သဳ ဒၞာဲဒပ်ပၞာန်သီအဝဵု ထိၚ်ချုက်လဝ် ညးဒေသ ဍုၚ်မဝ်တံၚ် ၜိုတ် ၁၅၀၀ တံ ဖေက်ဒးယိုက်ဝန်ပၞာန်တုဲ စဵုကဵုအခိၚ်လၟုဟ် ဟွံဂံၚ်ကလေၚ်စဴသ္ၚိဌာန်ဏီပုဟ် ဂွံတီလဝ် နူဂကောံသုတေသနဒေသ FE5 Thanintharyi ရ။
ဒၞာဲဒပ်ပၞာန်ဗမာ ထိၚ်ချုက်ဂွံလဝ် ဍုၚ်မဝ်တံၚ်ကဵု ညးဒေသကွာန် ပွဳဗွိုၚ် ၜိုတ် ၁၅၀၀ တံ ကလေၚ်စဴသ္ၚိဌာန်ဟွံမာန်ဏီတုဲ ဒးဂြိပ်ပါဲမံၚ် ပ္ဍဲဂြိုပ်ဒဵု မွဲဒမြိပ်ပယျဵု သေံ-ဗမာတံ ဖိုဟ်ရ။
ရဲပါဲဘဲပၞာန် ဍုၚ်မဝ်တံၚ် ဗွဲမဂၠိုၚ်တံဂှ် ဟိုတ်နူဒပ်ပၞာန် ပကောံကေတ်မံၚ် ပရေၚ်ယိုက်ဝန်ပၞာန် အတေၚ်အဓ္ဓမကီု၊ ပျူသဝ်ထဳတံလေဝ် ပကောံမံၚ်မၞိဟ်ကီု ကမၠောန်ကၟိတ်လေဝ် ဟွံမွဲ ကွေံကွေံတုဲ ကလေၚ်စဴသ္ၚိဌာန် ဟွံမာန်ဏီဒှ်မံၚ်ရောၚ် ညးဒါန်လိက် FE5 Tanintharyi မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ညးဒေသ ဍုၚ်မဝ်တံၚ်တံဝွံ မဒှ်ကောန်ဂကူကရေၚ်တုဲ ဘဲအန္တရာဲ နူကဵုဒပ်ပၞာန်ဗမာ မၚ်ရံၚ်မံၚ် နကဵု မတ်သံယယဇၞော်ဇၞော်လေဝ် နွံမံၚ်ရောၚ် ညးဆက်ဟီုရ။
ညးဒေသ ကလေၚ်စဴကၠုၚ်လဝ်တံဂှ်လေဝ် ညံၚ်ရဴဒပ်ပၞာန် ပတိတ်လဝ် အမိၚ်ဗီုပြၚ် မာယှေဝ်လဝ် ကုတ်လဝ်အခိၚ်တုဲမှ ကဵုလဝ်အခေါၚ် တိတ်မ္ၚးဍုၚ်ဂွံဂှ်ကီု၊ ကဵုကၠောန်မံၚ် ပရေၚ်ပျူသဝ်ထဳ ကီု ကမၠောန်ကၟိတ်လေဝ် ဂၠာဲဝါတ်မံၚ်ကီုတုဲ ဗက်ရပ်မံၚ် ညးတြုံဍောတ်တ် ပၠိုၚ်ၚ်တံလေဝ် နွံကၠုၚ်မံၚ်ရောၚ် သ္ဂးရ။
တုဲပၠန် ယဝ်ရအာဒၞာဲ ရဲပါဲဘဲပၞာန်တံနွံ ဆဵုညာတ်မ္ဂး ပန်ဂစိုတ်ရောၚ် ဘပဠလဝ်နွံတုဲ ပရေၚ်သွံရာန်ဖျာတံလေဝ် ဟွံကဵုကၠောန်သၟးဟွံက ပရေၚ်တိတ်အာ ဒၞာဲဌာန်တၞဟ်ဟ်ဂှ်လေဝ် ကၟာတ်လဝ်အခေါၚ်ရ။
ပြဟ်ဟ်ဏံ ဒှ်မံၚ်အခိၚ်ဥတုဗြဲဏီဂှ်ရ တၚ်နွံပၟိက် ပရေၚ်ဇွောံမစၞစ ကေုာံ ဂဥုဲဇဗ သွက်ရဲပါဲဘဲပၞာန်တံနွံဂၠိုၚ်မံၚ်တုဲ သွက်ကၟဳဒၞာဲ ဂွံဒၞာစဵုအာတံဂှ်လေဝ် နွံမံၚ်ပၟိက်ညိညိညည သ္ဂးရ။
တုဲကၠုၚ်ဂိတုမေ ၁၉ တေံ ဒပ်ပၞာန်ဗမာ ကလေၚ်ထိၚ်ချုက်ဂွံအာ ဍုၚ်မဝ်တံၚ်တုဲ ကပေါတ်နွံမံၚ်အပ္ဍဲသ္ၚိဌာန် ၚုဟ်မးနွံနွံ ဗွဲမဂၠိုၚ် တံဂှ်လေဝ် ဖံက်ကေတ်ဏာလဝ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media