မတ်မလီု၊ သိပ်တေမ်ပါ ၂၆
အလဵုအသဳပၞာန် ဟိုတ်နူပရေၚ်ယှအ်ထပၠုပ်နၚ် ကၠေၚ်စက်တုဲ အကြာပွိုၚ်မွဲၜါတ္ၚဲဏံ ၚုဟ်ကၠေၚ်စက် မွဲလေတ် ၜိုတ် ၇၀၀ ဒကေဝ် သၠုၚ်တိုန်အာ ၜက်အာနူသၞောတ်ဗၜတ်တံရ။
အပ္ဍဲကဵုဗွဝ်ဖျာကၠေၚ်စက် တွဵုရးမန်မ္ဂး ပ္ဍဲဂိတုသိပ်တေမ်ပါ ၂၄ ဂှ် ကၠောန်ဓါတ် 95 မွဲလေတ် ၄၁၉၀ ဒကေဝ်၊ ကၠောန်ဓါတ် 92 မွဲလေတ် ၄၀၅၀ ဒကေဝ်၊ ကၠေၚ်ဒဳဇြေလ်မွဲလေတ် ဆၜိုတ် ၅၂၇၀ ဒကေဝ်ဟေၚ် ဒှ်ကၠုၚ်လဝ်ရောၚ်။
ဆဂး ဂိတုသိပ်တေမ်ပါ တ္ၚဲ၂၅ ဂှ် ကၠောန်ဓါတ် 95 မွဲလေတ် ၄၈၆၀ ဒကေဝ်၊ ကၠောန်ဓါတ် 92 မွဲလေတ် ၄၇၀၅ ဒကေဝ်၊ ကၠေၚ်ဒဳဇြေလ် မွဲလေတ် ဒဵုကဵု ၆၀၂၀ ဒကေဝ် သၠိုက်တိုန်အာရ။
အကြာပွိုၚ်မွဲတ္ၚဲဓဝ် ပရေၚ်ၚုဟ်မးကၠေၚ်စက် ဂွံသၠိုက်တိုန်အာ ၜက်အာ သၞောတ်ဗၜတ်တံဂှ်တှ်ေ အလဵုအသဳပၞာန် ဟိုတ်နူ ပရေၚ်ထပၠုပ်နၚ် ကၠေၚ်စက် ထပ်ယှအ်ဖျေံလဝ်ဂှ်ရောၚ် တၠကမၠောန်ကၠေၚ်စက်တံ သ္ဂးရ။
ဟိုတ်နူကဵု သမ္မတဥူမေန်အံၚ်လှိုၚ် ကဵုယှအ်ထောံအခေါၚ် ထပၠုပ်နၚ်ကၠေၚ်စက်ဂှ် သြန်ဒဝ်ဠာအမေရိကာန် သက်သာအာ သွက် ၃ ဗဳလဳယာန်ရောၚ် ပ္ဍဲကဵုသိပ်တေမ်ပါ ၂၁ ကၠောန်လဝ် ပေါဲပရေၚ်သဳကၠဳ ရုၚ်ကမၠောန် စပ်ကဵုကဏ္ဍဝါဗ္ၚ နေဗျဳဒဝ်ဂှ် ဟီုဂးလဝ်နွံရ။
ဟိုတ်နူ ထပ်ယှအ်ဖျေံလဝ် ပရေၚ်ထပၠုပ်ကၠေၚ်စက်ဂှ်တုဲ စိုပ်အခိၚ်မုဟ်ကျာ ဥတုတၟးဇးဏံမ္ဂး ပရေၚ်ကၠေၚ်စက်ပိုတ်ကဵု ဒဏ်ၚုဟ်မးသၠုၚ်ၚ်တံဂှ် ညးဍုၚ်ကွာန်တံ ဒးကလေၚ်ထပ် ဇီုကပိုက် ဒုၚ်စသိုၚ်အာမာန်ရောၚ် တၠပညာပရေၚ်ကၠေၚ်စက်တံ ဟီုဂးထံက်ထ္ၜးလဝ်ရ။
ပရိုၚ်-သြၚ်လောန်တိုၚ်မ်
Photo – MOI