မတ်မလီု ၊ သိပ်တေမ်ပါ ၂၆
အပ္ဍဲတွဵုရးမန် ကွဳစက်ကွဳလိုန်ဓါတ် လိုၚ်သေၚ်ဟွံမွဲတံဂှ် နူကဵုရဲဌာနပံၚ်ကောံ သၟဝ်တဲအလဵုအသဳပၞာန် ဗက်ရပ်ကေတ်မံၚ်ဒဵုစိုပ်သ္ၚိ ဒှ်ကၠုၚ်မံၚ်ယျဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵု ဂိတုသိပ်တေမ်ပါ ၂၃ ဏံတုဲ ဖျေံလဝ်ကိုန်အစဳဇန် ဗက်ရပ်မံၚ်ကွဳစက်ယန် လိုၚ်သေၚ်ဟွံမွဲတံကီု ပ္ဍဲဒၞာဲလုပ်တိတ်ဍုၚ်၊ ဒၞာဲကွဳစက်ယန် ပရေၚ်အာကၠုၚ်ဂၠိုၚ်၊ ဒၞာဲဂၠံၚ်ပန်သွာၚ်ကီု ပေက်ပၟတ်တံကီု အလဵုအသဳပၞာန် ဖျေံလဝ်ဇြဟတ်မၞိဟ်ဂၠိုၚ်ၚ်တုဲ ဗက်ရပ်စပ်မံၚ်ရောၚ်။
ရဲဂကောံဌာနစုၚ်ပံၚ်ကောံ သၟဝ်တဲအလဵုအသဳပၞာန်တံ ဗက်ရပ်မံၚ်ကွဳစက်ယန် လ္တူဂၠံၚ်တံသၟးဟွံက နူအကြာအရာပ်ကွာန်တံ ကဵုပရိုၚ်မ္ဂး ဒဵုစိုပ်သ္ၚိလုပ်ရပ်ကေတ်မံၚ်ဂှ် ဂွံတီရ။
ပြဟ်ဟ်ဏံ ကွဳစက်ယန်လိုၚ်သေၚ်ဟွံမွဲတံဂှ် ဗက်ရပ်မံၚ်လ္တူဂၠံၚ်တံသၟးဟွံက သ္ကိုပ်ပရေၚ်အုပ်ဓုပ်တံ ပံၚ်ကဵုက္ဍိုပ်အရာပ်တံတုဲ ဗက်ရပ်ကေတ်မံၚ် အပ္ဍဲသ္ၚိတံကီုရောၚ် ညးလ္တူဍုၚ်မတ်မလီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ် ရပ်မံၚ်သၟးဟွံသေၚ်။ အုပ်ဇၞော်တံ ပံၚ်ကဵုက္ဍိုပ်အရာပ်တုဲ သ္ၚိလဵုဂှ် ကွဳလိုၚ်သေၚ်ဟွံမွဲ နွံရော။ ဗီုဒမၠဗတိုက်ကေတ် ဍေံတံလုပ်အာသီကေတ်မံၚ်။ ဍေံသၟာန်လဝ် သောၚ်ၚ်ရ။ မၞိဟ်မိက်ဂွံစှ်ေထံၚ်ဟာ။ ဒုၚ်ဆောံကပေါတ်ဟာ သောၚ်ဂှ်ဟွံသေၚ် သီုကပေါတ် သီုမၞိဟ် မိက်ဂွံဆောံအာဟာ။ လၟုဟ်အကြာအရာပ် သ္ၚိကွဳစက်လိုၚ်သေၚ်ဟွံမွဲတံ ညံၚ်ဂွံကိတ်ညဳကဵု က္ဍိုပ်အရာပ်ဂှ် ဒးပံၚ်ဖက်လဝ်။ ဟွံကိတ်ကဵု က္ဍိုပ်အရာပ်တှ်ေ က္ဍိုပ်အရာပ်ဂှ်ထမံက်စတှ်ေ သ္ၚိဂှ်ပါအာသၟးသၟးဏောၚ်။ အကာဲအရာတံ ဒှ်အာဗီုဏံယျ” သာ်ဝွံ သ္ဂးရ။
အခါရ ဗက်အာသီကေတ် ကွဳစက်လိုၚ်သေၚ်ဟွံမွဲအကြာသ္ၚိမ္ဂး ရဲထပက်သြန်မာန်ဂှ် ကွဳစက်သၟးဟေၚ် ဆၜိုတ်သီကေတ်ဏာတုဲ ယဝ်ရကဵုသြန်ဟွံမာန်မ္ဂး ရပ်ဏာသီုမၞိဟ်ရောၚ် ညးဆက်ဟီုရ။
ပရေၚ်ရပ်မံၚ်ကွဳစက်ယန်တံဂှ် သၟဝ်တဲအလဵုအသဳပၞာန် ရဲဌာနစုၚ် ပံၚ်ကောံလဝ် မဝ်တဝ်ပဳကေဝ်၊ ရုၚ်အုပ်ဓုပ်၊ ဒပ်ပၞာန်၊ ဒပ်မၚ်ကွာန်၊ ဂကောံဂီုကၠီုညးဍုၚ်ကွာန်ကဵု ဗတိုက်သရိုဟ်ပကီုပရာတ်တံ သၟးဟွံက ရဲဌာနဆေၚ်စပ်လ္ၚဵုတံလေဝ် ပါလုပ်ကီုရ။
ယဝ်ရ ပရေၚ်ဒးဒုၚ်သီက္တဵုဒှ်အာမ္ဂး ကွဳစက်၊ ကွဳလိုန်ဓါတ် လိုၚ်သေၚ်ဟွံမွဲတံဂှ် သီကေတ်ဏာသၟးဟွံက ညးဒဳကွဳစက်ယန်ဂှ်လေဝ် နကဵုဥပဒေ ပရေၚ်ပၠုပ်ပလံၚ်ကပေါတ် နူကဵုအလဵုအသဳပၞာန် ကေတ်မံၚ်အရေဝ်ဂှ် ဂွံတီရ။
မွဲလပါ်ဂှ်ပၠန် ကၠာဟွံစိုပ်ပေါဲရုဲမာဲတေံလေဝ် အလဵုအသဳပၞာန် တွဵုရးမန်ဂှ် နကဵုက္ဍိုပ်လိက်ပရေၚ်ကိုန်အစဳဇန် ဗတိုက်သရိုဟ်ကပေါတ် ပရေၚ်ကူသာန်သွံရာန် ဟွံလုပ်သၞောဝ်ဂးတုဲ ကေၚ်ရပ်စပ်ကၠုၚ်လဝ်နွံရ။
ပ္ဍဲကဵုတွဵုရးမန် နူကဵုအလဵုအသဳပၞာန် ကၠောန်မံၚ်ပရေၚ်ရပ်စပ် ကွဳစက်လိုၚ်သေၚ်ဟွံမွဲကီုလေဝ် သၞာဲဒါယိုက်ဝန် သၟဝ်ဌာနဍေံတံ ကၠောန်မံၚ်ပရေၚ်အာကၠုၚ် ဍိုက်မံၚ်ကွဳစက်ယာန်တံနွံမံၚ်တုဲ ပရေၚ်ပါ်ပါဲ အကြာညးဒေသတံ သၠုၚ်တိုန်မံၚ် မဒှ်ရ။
ပရိုၚ်-သြၚ်လောန်တိုၚ်မ်