နေဗျဳဒဝ် ၊ သိပ်တေမ်ပါ ၂၆
သွက်ကောန်ဍုၚ်အရၚ်သီုဖအိုတ် ပံၚ်တောဲမံၚ်စံၚ်တန်တဴညးသ္ကံ မွဲစွံတုဲ ညံၚ်ဂွံဂါံကွာ်ဒက်ပတန်အာ ဒေသတၟေၚ် ပရေၚ်အုပ်ဓုပ်ကိုဝ်ကဍာံဍာံဂှ် ကေမ်ရပ်လဝ်ရောၚ် ပ္ဍဲကဵုပေါဲသဳကၠဳတက်ကျာကု အလဵုအသဳပၞာန်ဂှ် MNDAA ဟီုဏာရ။
ပရေၚ်ဒစးဒုၚ် အာတ်မိက်ဟီုဂးလဝ်ဟွံမွဲ အတိုၚ်အလဵုအသဳပၞာန်ကော်ဘိက်လဝ်တုဲ ပ္ဍဲကဵုဂိတုသိပ်တေမ်ပါ ၂၄ ဏံ ကမ္မတဳပ္ညဳပ္ညပ်ပရေၚ်ၜိုဟ်လလမ် NSPNC ကဵု ဗော်ပရေၚ်ဓဝ်ဍာံကောန်ဂကူကေုာံ ဍုၚ်ဗမာ (MNTJP/ MNDAA) တံ အလန်ပထမကၠာအိုတ် ဆဵုဂဗတက်ကျာ ပ္ဍဲကဵုနေဗျဳဒဝ်ရ။
ပ္ဍဲကဵုပေါဲတက်ကျာဏံ နူကဵု NSPNC ဥက္ကဌ ဒုသ္ကိုပ်ပၞာန်ဇၞော် ယာပျေအ်၊ ညးအုပ်ကာ ဒုသ္ကိုပ်ပၞာန်ဇၞော် မေန်နိုၚ်၊ ဂကောံကမ္မတဳ ပ္ညဳပ္ညပ်တံကဵု နူလပါ် ဂကောံကိုဝ်က ဥူဖုၚ်ဝေၚ်နိုင် သ္ကိုပ်သ္ကလဝ် ညးစၞးဌာနစုၚ်ၚ်တံ တိုန်စိုပ်ရ။
လ္တူဂၠံၚ်တရဴ ထမံက်မံၚ်ရုပ်ရဴ ပရေၚ်ၜိုဟ်လလမ် ဗီုပြၚ်ဒစးဒုၚ်အာတ်မိက်ဟီုဂးလဝ် ဟွံမွဲဂှ် ဗွဲတၟေၚ်ဒုၚ်တၠုၚ်ဏာရဂှ် နူကဵု ဂကောံကိုဝ်က MNTJP ပဝ်လေတ်ဗျူရို၊ ညးအုပ်ကာနာနာ လၟေၚ် (၂)၊ သ္ကိုပ်ဌာနဆက်ဆောံ ဥူဖုၚ်ဝေၚ်နိုင် ဟီုဂးဏာ ပ္ဍဲကဵု ပေါဲတက်ကျာသဳကၠဳဂှ်ရ။
ပရေၚ်ၜိုဟ်လလမ်ဟီုဂှ် ဒှ်တၚ်ရန်တၟံဘုံ အလုံညးဍုၚ်ကွာန်တံတုဲ သွက်ပရေၚ်ညိၚ်ဝပ်ရးနိဂီု၊ ပရေၚ်ဖောအ်ဗြဳတောတက် ကေုာံ ညးဍုၚ်ကွာန်အလုံသီုဖအိုတ်တံ ညံၚ်ဂွံမံၚ်စံၚ်အာ ၜိုဟ်ဟ်သြိုဟ်ဟ်မာန်ဂှ် ဒှ်သ္ဇိုၚ်ပနက်သေဝ်ရောၚ် သ္ဂးရ။
အတိုၚ်နဲကဲ ပရေၚ်တက်ကျာဆဵုဂဗလဝ်တံဂှ် သွက်ဂွံထိၚ်ဒဝ်စဵုဒၞာမၚ်မွဲအာ ပရေၚ်ညိၚ်ဝပ်တံကီု နူကဵုဏံ သွက်ဂွံထမံက်အာရုပ်ရဴပရေၚ်ၜိုဟ်လလမ် ကေုာံ ပရေၚ်ညိၚ်ဝပ်တံတုဲ သွက်ပေါဲသဳကၠဳ တက်ကျာပရေၚ်ဍုၚ်ကွာန်ဂှ် ဖန်ဗ္ဒျ်အာအခေါၚ်အရာခိုဟ်တံ မာန်ရောၚ် ညးဆက်ဟီုရ။
တုဲပၠန် လ္တူပရေၚ်ဍုၚ်ကွာန် စပ်ကဵုကၟိန်ဍုၚ် ညံၚ်ဟွံဒကးပြးဇးအာကေုာံ ပရေၚ်ညဳသၟဟ်ကောန်ဍုၚ်အရၚ်တံဂှ် ဒတူလိုၚ်အာခိုၚ်ၚ်ကၠိုက်က်တုဲ ကၟိန်ရပ်လဝ် ညံၚ်ဂွံဂါံကွာ်ဒက်ပတန်အာ ဒေသတၟေၚ် ပရေၚ်အုပ်ဓုပ်ကိုဝ်က ဍာံဍာံရောၚ် ဥူဖုၚ်ဝေၚ်နိုင် ဟီုလဝ်ဂှ် အလဵုအသဳပၞာန် လလောၚ်တြးလဝ်ရ။
အပ္ဍဲဒေသတၟေၚ် စၟတ်(၁) ဒေသလံက်ကိုၚ်ဂှ် သ္ပကဵုလဝ်စၟတ်သမ္တီ ဒေသတၟေၚ် ပရေၚ်အုပ်ဓုပ်ကိုဝ်ကတုဲ အကြာၜါလပါ် ဒက်ပတန်ကၠုၚ်လဝ် ဂလာန်ပတေဟ်တံမာန်ဂှ် ဥက္ကဌ NSPNC ဒုသ္ကိုပ်ပၞာန်ဇၞော် ယာပျေအ် ဟီုပတိတ်လဝ် အပ္ဍဲကဵု ဝိုၚ်တက်ကျာ ပရေၚ်ၜိုဟ်လလမ်ရ။
ပြဟ်ဟ်ဏံလေဝ် ကောန်ဂကူကိုဝ်ကတံဂှ် ဒှ်ကောန်ဍုၚ်အရၚ်ရးနိဂီုဍုၚ်ဗမာ ကဵုလဝ်အခေါၚ်ဒေသတၟေၚ် ပရေၚ်အုပ်ဓုပ်ကိုဝ်ကတုဲ ညံၚ်ဂွံဒက်ပတန်အာဂလာန်ပတေဟ် အကြာၜါလပါ်တံပၠန် ဒးဂၠာဲအာနဲကဲရောၚ် သ္ဂးရ။
သွက်ပရေၚ်ဍာ်ဇမၠိၚ် တၚ်နွံပၟိက် MNDAA တံကီု ဗီုပြၚ်အလဵုအသဳ သောၚ်ကလးကဵုအာမာန်တံဂှ် သဳကၠဳလဝ် သောၚ်ၚ်ကၠးကၠးတုဲ ဓဝ်ကၠိုဟ်ခၠၚ်နွံနွံ သွက်ဂွံဒက်ပတန်အာဂလာန်ပတေဟ်တံဂှ် မ္ဒးနွံကဵု ပရေၚ်ဗ္ဒာဲဒလာဲညးသ္ကံရောၚ် ညးဆက်ဟီုရ။
တုဲပၠန် တၚ်နွံပၟိက် လပါ်ညး လပါ်အဲတံဂှ်လေဝ် ပ္ညဳပ္ညပ်ဖန်ဖက်အာရောၚ် ဒုသ္ကိုပ်ပၞာန်ဇၞော်ယာပျေအ် ဟီုလဝ်ရောၚ်။
အတိုၚ်သ္ဇိုၚ်ဥပဒေ ၂၀၀၈ မ္ဂး အပ္ဍဲရးနိဂီုဍုၚ်ဗမာ ဒေသဂွံအခေါၚ် ပရေၚ်အုပ်ဓုပ် ဇကု ၅ ဒၞာဲ၊ ရးဒေသ ဂွံအခေါၚ်ပရေၚ်အုပ်ဓုပ်ဇကု မွဲဒၞာဲ ခၞံစုတ်လဝ်ကီုလေဝ် သွက်ဒေသတၟေၚ် ပရေၚ်အုပ်ဓုပ်ဇကုဂှ် ခုတ်စၟတ်ကဵုလဝ် ဟွံမွဲဏီပုဟ်။
ပ္ဍဲကဵုတွဵုရးဒေသသၟဝ်ကျာ ဍုၚ်လံက်ကိုၚ်ကဵု ဍုၚ်ကုၚ်ကျာန်တံဂှ် သ္ပလဝ်စၟတ်သမ္တီ နဒဒှ် ဒေသတၟေၚ် ပရေၚ်အုပ်ဓုပ်ကိုဝ်ကရောၚ်။ ပ္ဍဲကဵုပရေၚ်လဝေၚ်ပၞာန် ၁၀၂၇ ဂှ် MNDAA ထိၚ်ချုက်ဂွံလဝ်လံက်ကိုၚ်၊ ချေၚ်ယှိုဲဟဝ်၊ ကောန်လုၚ်၊ တိၚ်နဳ၊ တာမိုဝ်ညာ၊ ပါန်သာန် ကဵု ဍုၚ်ကုၚ်ကျာန်တံရ။
အကြာပရေၚ်သဳကၠဳၜါလပါ်တံဂှ် သွက်ဂွံကလေၚ်ပံက်အာ ဂိက်သၞေဟ်ကၚ် ဒေသပယျဵုတံ၊ သွက်ဂွံထမံက်အာရုပ်ရဴ ပရေၚ်ကိုန်အစဳဇန် တတ်အာဒေသပယျဵု၊ သွက်ဂွံပံၚ်တောဲ ကၠောန်အာ ပရေၚ်လီဠာန်အန်လိုၚ်ကဵု ဂဥုဲၜူမာဲတံဂှ် သဳကၠဳလဝ်ရောၚ် အလဵုအသဳပၞာန် သ္ဂးရ။
သွက်ဂွံပံၚ်တောဲကၠောန်အာ ပရေၚ်ဂီုကၠီုရးနိဂီုဍုၚ်ကဵု ပရေၚ်ကမၠောန်ဖောအ်ဗြဳနာနာတံကီု၊ အကြာၜါလပါ် ညံၚ်ဂွံဒက်ပတန်အာ ပရေၚ်ဂလာန်ပတေဟ် ခိုၚ်ၚ်ကၠိုက်က်မာန်ကီု ဒက်ပတန်ပံက်ဗော်ပရေၚ်ဍုၚ်ကွာန်တုဲ ကိစ္စညံၚ်ဂွံလုပ်ပြိုၚ်မာဲတံဂှ် သၠာဲဂတးသဳကၠဳလဝ် ညးသ္ကံရ။
သွက်ဂွံဆက်ပ္ညဳပ္ညပ်သဳကၠဳအာ နနဲပရေၚ်ဍုၚ်ကွာန်ကီု ကိစ္စသွက်ဂွံထမံက်အာရုပ်ရဴ ပရေၚ်ဖောအ်ဗြဳဒေသကဵု ပရေၚ်ညိၚ်ဝပ်တံကီု အတိုၚ်သမ္မတ ကဵုလဝ်ဂၠံၚ်စၞောန်တံဂှ် နူကဵု NSPNC ပတိုန်ထၜး MNDAA တုဲ လ္တူတၚ်သဳကၠဳလဝ်တံဂှ် သွက်ဂွံသ္ပစၟတ်သမ္တီ ပ္ညဳပ္ညပ် ထပက်စၟတ်တဲ သ္ပလဝ်ဒတန်ညးသ္ကံရ။
ပြဟ်ဟ်ဏံ ပ္ဍဲကဵုအလဵုအသဳကော်ဘိက်လဝ် ပရေၚ်တက်ကျာသဳကၠဳ ပရေၚ်ၜိုဟ်လလမ်မ္ဂး ဂကောံထပက်စၟတ်တဲကဵု ဟွံထပက်လဝ်စၟတ်တဲတံသၟးဟွံက ဂကောံပါလုပ်ပရေၚ်လဝေၚ်ပၞာန် ၁၀၂၇ တအာၚ်ကဵုကိုဝ်ကတံလေဝ် တက်ကျာသဳကၠဳမံၚ်ကဵု NSPNC ကီုရောၚ်။
ဂကောံမဟာမိတ်ကောဒေံပိ ဂကောံတအာၚ်၊ ဂကောံကိုဝ်က ကဵု ဒပ်အာရက္ခ AA တံ ပံၚ်တောဲကဵု ဒပ်ပၠန်ဂတးတမ်ကညၚ် ဂကောံ PDF တံတုဲ ပ္ဍဲသၞာံ ၂၀၂၃ ဂိတုအံက်တဝ်ပါဂှ် ကၠောန်ပရေၚ်လဝေၚ်ပၞာန် ၁၀၂၇ တုဲ သီထိၚ်ချုက်ကေတ်ထောံ ဗဒိုပ်ဒပ်ပၞာန်ဗမာ ပ္ဍဲဒေသသေံသၟဝ်ကျာတံ ဗွဲမဂၠိုၚ်နွံရ။
ဆဂး ဟိုတ်နူပရေၚ်အလဵုအသဳကြုက်တံ လုပ်ပ္ညဳပ္ညပ်လဝ်အကြာဂှ်ရ ဂကောံတအာၚ်၊ ဂကောံကိုဝ်က ဒေါအ်ပန်ပှော်လဝ်ကဵု ဒပ်ပၞာန်ဗမာ နကဵု Bilateral တုဲ ဒေသလ္ၚဵုတံလေဝ် ဒးဗလးထောံတဲ၊ ဍိုက်ကဵုဇြဟတ် ဗတိုက်ပၞာန်ကျာ ကေုာံ ကဵုဇြဟတ်ဟရိုဟ် ပရေၚ်ဍုၚ်ကွာန်နာနာသာ်တုဲ စိုပ်ကၠုၚ်ဝိုၚ်တက်ကျသဳကၠဳဏံ မဒှ်ရ။
ပရိုၚ်-သြၚ်လောန်တိုၚ်မ်