နယူဒေလဳ၊ သိပ်တေမ်ပါ ၂၆
နူကဵုဍုၚ်အိန္ဒိယမွဲအဆံၚ် လုပ်စိုပ်ဍုၚ်ဗမာ အာကဵုလဝ်တန်ဗတောန်ကု ဂကောံလွဟ်တံ ညးဒးဒုၚ်စောဲစပ်လဝ် ကောန်ပၞာန်အမေရိကာန်စလိၚ် အာရမ်ဗာန်ဒိုက် ကေုာံ ကောန်ဍုၚ်ယူခရုၚ် ၆ တၠတံဂှ် နူကဵုရုၚ်သၞောဝ်ဓဝ် ဗလးထောံကဵု ပရေၚ်ဒုၚ်လျိုၚ် မဒှ်ရ။
ကဵုလဝ်တန်ဗတောန်ကု ဂကောံပကီုပရာတ် ဍုၚ်ဗမာတံဂးတုဲ နူကဵုအေဂျေၚ်သဳ ပရေၚ်စၟဳစၟတ်ကောန်ဂကူ ဍုၚ်အိန္ဒိယ NIA ရပ်ထိၚ်လဝ် အာရမ်ဗာန်ဒိုက် ကေုာံ ကောန်ဍုၚ်ယူခရုၚ် ၆ တၠတံ မဒှ်ရ။
သွက်ဗာန်ဒိုက် ဂွံဆဵုညာတ်ကၟိန်အိန်ထံၚ်တံမာန် နူကဵုရုၚ်သၞောဝ်ဓရ်တၟေၚ် NIA ကဵုအခေါၚ်စဴအာ ဍုၚ်အမေရိကာန် မဒှ်ရ။
ကောန်ဍုၚ်ယူခရုၚ် ၆ တၠတံဂှ်လေဝ် အတိုၚ်ပရေၚ်ကမၠောန်နာနာ နူကဵုရုၚ်သၞောဝ်ဓဝ် ဗလးတုဲ ကဵုအခေါၚ်စဴအာ ဍုၚ်ယူခရုၚ်ရ။
တၞးလိက်အုပ်ကၠောံဍုၚ်တံဂှ် ညံၚ်ဂွံကလေၚ်ပတိတ်ကဵုဏာ နူကဵုရုၚ်သၞောဝ်ဓရ် ကဵုလဝ်စၞောန်ရ။
နကဵုပရေၚ်ဥပဒေ ဒးဂွံထေက်တံဂှ် ကဵုဏာအခေါၚ်ပရေၚ်ဒုၚ်တာလျိုၚ် ကောန်ဍုၚ်သအာၚ် သီုကဵု ၇ တၠတံရောၚ် ပ္ဍဲသိပ်တေမ်ပါ ၂၅ ဂှ် NIA လလောၚ်တြးရ။
ညးဒးစောဲစပ်တံ ၇ တၠဂှ် ကောန်ဍုၚ်အမေရိကာန် မက်တရူ အာရမ် ဗါန်ဒိုက်၊ ကောန်ဍုၚ်ယူခရုၚ် ဟူဗါ ပက်ထရို၊ သလိုၚ်ဗဳယက် တာရက်သ်၊ အဳဗဗ် သူခမာန်နိုက်သကဳ၊ သတဳဗၚ်ကိဗ် မာရဳယန်၊ ဟန်ချာရုခ် ကေုာံ ကာမေန်သကဳ ဗေတ်တဝ်တံ မဒှ်ရ။
ညးတံသီုဖအိုတ်ဂှ် လုပ်စိုပ်ကၠုၚ်ဍုၚ်အိန္ဒိယ နကဵုလိက်အာတရဴ လုပ်သၞောဝ်ကီုလေဝ် နူညးတာလျိုၚ် ဟွံဂွံအခေါၚ်မွဲသာ် အာလဝ်ဒေသဧသာန် ဒၞာဲဒေသတာဒၞာလဝ်ဂှ်တုဲ ဒးဒုၚ်စောဲစပ်ပရေၚ်ဟွံလုပ်သၞောဝ် နကဵုဥပဒေတံ ဗွဲကိုပ်ကၠာ ဒးဒုၚ်စောဲစပ်လဝ် မဒှ်ရ။
ကောန်ဍုၚ်သအာၚ်တံဏံ ဗတောန်ကဵုလဝ်ကွတ်နဲကဲပညာ ပရေၚ်ဒဳဒရုၚ်၊ ဗဂပ်စက်ဒရုၚ် ကေုာံ ပရေၚ်ဒၞာတာဒရုၚ် ကု ဂကောံရပ်လွဟ်ဍုၚ်ဗမာတံရောၚ် NIA စောစပ်တၚ်လဝ်ဒုဟ်ရ။
ရပ်ဂွံဗာန်ဒိုက် ပ္ဍဲကဵုသၞေဟ်ၜၚ်ကျာ ကိုလ်ကတ္တာတုဲ ညးသအာၚ်တံဂှ် ရပ်ဂွံလဝ် ဒၞာဲသၞေဟ်ၜၚ်ကျာ တၞဟ်ဟ်တံ မဒှ်ရ။
အတိုၚ်ဗွဲကိုပ်ကၠာတေံ လ္တူညးတံ နကဵုပရေၚ်ပကီုပရာတ်NIA တၚ်ဒုဟ်စောဲစပ်စၟဳစၟတ်ဟွံဂွံတုဲ နူကဵုရုၚ်သၞောဝ်ဓဝ် ကဵုဏာပရေၚ်ဒုၚ်လျိုၚ်ရောၚ် ဂွံတီရ။
Ref:TimesofIndia