သွက်ဂွံဒေါအ်ပေါဲပၞာန် ပရေၚ်အဳရာန်ပတိုန်လဝ် အမေရိကာန် ဟီုပတိတ်ဗွဲလုပ်သၞောဝ်

တဳဟဳရန်၊ အံက်တဝ်ပါ ၁

သွက်ဂွံဒေါအ်အာ ပရေၚ်ပေါဲပၞာန် ဒေသအဒေါဝ်ဗမံက်တုဲ လပါ်အဳရာန်ပတိုန်လဝ်ဂှ် အမေရိကာန် ဟီုပတိတ်လဝ် ဗွဲလုပ်သၞောဝ်နွံရောၚ် နူကဵုအလဵုအသဳအဳရာန် ဟီုလဝ် ပ္ဍဲသိပ်တေမ်ပါ ၃၀ ရ။

တၚ်နၚ်အမေရိကာန်တံ ကလေၚ်နၚ်ပရိုၚ်ဂှ် နူကဵုဝန်ဇၞော်ပရေၚ်ဍုၚ်သအာၚ် ပတိုန်ထၜးလဝ်ကု သမ္မတ မာသံက် ပဳဇက်ခဳယန် ကီုလေဝ် တၚ်နၚ်သောဲသောဲဗြောဲဗြောဲတံဂှ် ဟွံဟီုပတိတ်လဝ်ဏီပုဟ်။

ပရေၚ်ပဋိပက္ခ က္တဵုဒှ်လံကၠုၚ် ပွိုၚ်ၜိုတ် ၇ ဂိတုတံ သွက်ဂွံဒေါအ်ထောံမာန်ဂှ် အကြာသဘၚ်သဳကၠဳဇၞော် ကုလသမဂ္ဂ တုဲကၠုၚ်သတ္တဟတေံ နကဵုပရေၚ်ပ္ညဳပ္ညပ်ဍုၚ်ကာတာတုဲ အမေရိကာန်ကဵု အဳရာန်တံ ကလေၚ်သဳကၠဳလဝ် မွဲအဆံၚ်ပၠန် မဒှ်ရ။

စပ်ကဵုတၚ်နၚ် လပါ်အဳရာန်ပတိုန်လဝ်မ္ဂး သွက်ဂွံကလေၚ်ပံက်ကဵု ပ္ၚံက်ၜဳဟဝ်မုဇ်ဂှ်တုဲ ပရေၚ်ပေါဲဗတိုက် အကြာဒေသပွဳဗွိုၚ်အဒေါဝ်ဗမံက်တံ ညံၚ်ဂွံဒေါအ်ထောံ၊ ပရေၚ်အမေရိကာန် ဖျေံလဝ်ဒဏ်မာတ်ဆိုအ်သၞေဟ်ၜၚ်အဳရာန်တံဂှ် သွက်ဂွံကလေၚ်ရုပ်သီထောံ၊ သြန်ဍုၚ်အဳရာန် ဒးဒုၚ်ထိၚ်ချုက်လဝ်တံ ညံၚ်ဂွံကလေၚ်ကဵုအခေါၚ်  သုၚ်စောဲစကာအာ ကေုာံ သွက်ဂွံယှအ်ဖျေံကဵု ပရေၚ်မာတ်ဆိုအ် ဆေၚ်စပ်ကဵုကဏ္ဍကၠေၚ်ဍေၚ်တံ ပါလုပ်ရ။

တၚ်နၚ် လပါ်အဳရာန်ပတိုန်လဝ်မူလဂှ် သမ္မတအမေရိကာန် ဒဝ်နေဝ်ထရ တးပါဲလဝ်ကီုလေဝ် ဂၠံၚ်ဍာန်တၠုၚ်လအာ ပရေၚ်တက်ကျာ နနဲအမာတ်ကလုတ်တံဂှ် မာတ်လဝ်ဟွံမွဲပုဟ်။ တၚ်သဳကၠဳလဝ်ပြဟ်ဟ်ဏံ အဓိကတၞဟ်ခြာမံၚ်မွဲတၚ်ဂှ်တှ်ေ အဆံၚ်ပရေၚ်တၚ်တုပ်လဝ်စိုတ်တံဂှ် ဒှ်အစဳဇန် နူလပါ်လဵု စထမံက်အာရုပ်ရဴ ကၠာအိုတ်ရော နူကဵုဌာန်ပရိုၚ်ရိုက်တာ ချူလဝ်ရ။

ပြဟ်ဟ် စပ်ကဵုပရေၚ်အမေကာန် ကလေၚ်နၚ်လဝ်ပရိုၚ်တုဲ ဗီုလဵုအဳရာန်တံ ဖျေံအာသ္ဂုတ်သွာတ်ဂှ် ဟွံဂွံတီဏီတုဲ ဒှ်ပရေၚ်ဒေါအ်ပၞာန်ဟာ ကေုာံ ပရေၚ်တက်ကျာသဳကၠဳ သွက်ဂွံကလေၚ်ပံက် ပ္ၚံက်ၜဳဟဝ်မုဇ်ဂှ်ဟာ ဒးမၚ်ရံၚ်အာကၠာ မဒှ်ရ။

Ref:AFP