မတ်မလီု ၊ သိပ်တေမ်ပါ ၂၈
ပ္ဍဲကဵုဂၠံၚ်ဍာန် တွဵုရးမန် ညးဍုၚ်ကွာန်တံ ဒးအာကၠုၚ်သုၚ်စောဲမံၚ်ဂၠိုၚ်ၚ်တံ ၜိုန်ရလီုလာ် ပရေံမံၚ်အိုတ်စောန်လေဝ် အလဵုအသဳပၞာန် ဆၜိုတ် ဗက်ဍာပ်နာပ်ကေတ်ညိညိရ ကၠောန်မံၚ်ဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂၠံၚ်ဇၞောကၟိန်ဍုၚ်တံကီု ဂၠံၚ်ဇၞော်အပ္ဍဲဍုၚ်ဒၞာဲအဓိကတံကီု ဂၠံၚ်အကြာ ဂၠံၚ်ဇျှော်ဟရော်နာနာတံ ဟိုတ်နူဗြဴဂူတုဲ ဒှ်အာခလံက်ဟနက် လီုလာ်မံၚ်အိုတ်စောန်ဂှ် ပရေၚ်အာကၠုၚ်တံ ဒှ်အာအခက်အခုဲရောၚ်။
ပရေၚ်ဂၠံၚ်ဍာန် လီုလာ်မံၚ်အိုတ်စောန်လေဝ် ရဲဌာနဂၠံၚ်ဍာန် ပရေၚ်ဗဂဵုလဟဵု သၟဝ်အလဵုအသဳတွဵုရးမန်တံ ကေုာံ ကာန်ပနဳ ဂွံလဝ်သၞောတ် BOT တံ စၞးဒးထပ်လးကဵုဂၠံၚ်ဂှ် ဆၜိုတ်ကၠောန်အာ ပရေၚ်ဗက်ဍာပ်နာပ်ကေတ် ညိညိညညနွံရ။
ဒၞာဲဂၠံၚ်ဍာန်ဗွဲမဂၠိုၚ် ၜိုတ်ပိဂအုံ ၜါဂအုံ လီုလာ်မံၚ်ဂှ် ဒၞာဲပထောၚ် ထောၚ်ဂှ်ရ ဗက်ဍာပ်နာပ် ကၠောန်ကေတ်မံၚ်တုဲ ပရေၚ်ဂၠံၚ်လီုတံ ဒှ်မံၚ်မွဲဏှမွဲဏှရောၚ် ညးဒေသမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဒၞာဲဂၠံၚ်ဍာန် ၜိုတ်ပိဂအုံ ၜါဂအုံ လီုအာတုဲ အကာဲအရာ ပရေၚ်ဂၠံၚ်ဍာန်လၟုဟ်တံဂှ် ဟီုလဴကဵုလေဝ် ဟွံလေပ်ရပုဟ်။ ဒၞာဲပထောၚ် ထောၚ်မံၚ်တံဂှ် ဗက်နာပ်ကေတ်အာ။ ဆၜိုတ်ဏံရ။ ဍေံတံ ဗက်ဍာပ်နာပ်အာ လက်ကရဴဂှ် လီုဗက်အာ၊ ဂတးတေံ နာပ်အာ လက်ကရဴဂှ် လီုအာ။ ဂၠံၚ်ဍာန်လီုတှ်ေ သွက်ရဲဒဳတံ အန္တရာဲဂၠိုၚ်ကွေံကွေံ၊ ဝါတ်ကွေံကွေံလေဝ်” သာ်ဝွံ သ္ဂးရ။
တုဲပၠန် အတိုၚ်ဂၠံၚ်မွဲလီုလာ်မံၚ်ဂှ် ဟွံကလေၚ်ပလေဝ်အာတုဲ ဆၜိုတ်ကၠောန်အာ ပရေၚ်နာပ်ဍာပ်တံသၟးဂှ် ကွဳစက်ဇၞော်ဇၞော်တံ အာမ္ဂး အတိုၚ်ခလံက်ဟနက်ဂှ် သှ်ေမံၚ်ပၠန်တုဲ ပရေၚ်ဂၠံၚ်ဍာန် ဂွံကလေၚ်ခိုဟ်အာ ဟွံမွဲပုဟ် ညးဆက်ဟီုရ။
ပရေၚ်ဂၠံၚ်ဍာန်တံလီုလာ်ဂှ် နွံမံၚ်ကဝက်ပြၚ်ကီုလေဝ် ဂၠံၚ်ဍာန်တံသီုဖအိုတ် လီုအာမှ ရဲဌာနသၟဝ်တဲအလဵုအသဳပၞာန်တံ ပလေဝ်ကဵုတုဲ ဆၜိုတ်ဒှ်ညိညိညညမ္ဂး ဆၜိုတ်နာပ်ဍာပ်ကဵုအာ ဒၞာဲပထောၚ်ခလံက်ဟနက်တံနွံ ညးဒေသမန် မွဲတၠပၠန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဂၠံၚ်လီုမံၚ် ကဝက်ပြၚ်ၚ်၊ လီုလာ်မံၚ် အကာဲအရာပရေံကွေံ။ ကလေၚ်ဒှ်အာ အတိုၚ်ဗီုကၠာတေံပၠန်။ အာလပါ်ဂၠံၚ်တိပရံၚ်ဂှ်လဝ် ဂၠံၚ်ထောၚ်မံၚ်ပၠန်။ ဂၠံၚ်ဍာန်ကွဳစက်လပါ်ပိုဲဏံ လီုဂၠိုၚ်မှ ဍေံတံပလေဝ်ကဵု။ ညိညိညညတှ်ေ ဆၜိုတ်ဗၠအ်ကဵုပထောၚ် သၟး။ မွဲအဟူတေံရ ဗက်ဗၠအ်အာမံၚ် ဂၠံၚ်ဇၞော်တေံ”သာ်ဝွံ သ္ဂးရ။
ပ္ဍဲအကြာဒေသမ္ဂး ဂၠံၚ်ဍာန်ဗွဲမဂၠိုၚ်လီုမံၚ်အိုတ်တုဲ ကွဳလိုန်ဓါတ်ဒဳအာတံ စှ်ေအာကတိုၚ်ဟလံက်ဟနက်တုဲ ဟကပ်အာလဝ်ကီု ညးလ္ၚဵု ဒးပါဲဟလေတ် ဟလံက်ဟနက်ကတိုင် ဒဳအာတုဲ ဒှ်ကၠုၚ်ပရေၚ်ကွဳစက်ယန် တေက်ဇီုတံလေဝ် နွံရ။
ဂၠံၚ်ဗွဲမဂၠိုၚ်လီုလာ်စာ်ထောၚ်မံၚ်ဂှ် နကဵုအစဳဇန် အလဵုဇကုညးဒေသတံ ထပေၚ်စုတ်ကဵုမံၚ်တိလေဝ်နွံ စုတ်ကဵုဗတဳကဵုတၟအ်တံကီု ဒဒှ်ရဂၠံၚ်လီုမံၚ်ဂှ် ညးဒဳကွဳစက်တံဂွံတီ ကၠောန်စွံကဵုလဝ် သကေႅတမွဲမွဲလေဝ် နွံမံၚ်ရောၚ်။
ပ္ဍဲလက်ထက် အလဵုအသဳကၠာတေံ ယဝ်ရဂၠံၚ်ဍာန်လီုလာ်မ္ဂး အတိုၚ်မွဲဂၠံၚ်ဂှ် လးကဵုဏာ ကတ္တရာနိုင်လောန်တံကီု သီုကဵုဂၠံၚ်ကောန်ကရေတ်တံလေဝ် လးကဵုလဝ်နွံရ။
ပ္ဍဲတွဵုရးမန် လက်ထက်အလဵုအသဳပၞာန်ဏံ သွက်ပရေၚ်ဘဏ္ဍာသၞာံ ၂၀၂၆-၂၇ ဏံ အခေါၚ်ဂွံသုၚ်စောဲဗာတ်ဂျက် ၇၆၄၀၀ ပြကောတိကိုတ်နွံတုဲ သွက်ဌာနပရေၚ်ဂၠံၚ်ဍာန်ကဵု ပရေၚ်ဗဂဵုလဟဵုတံ ဂွံအခေါၚ်သုၚ်စောဲသြန်ဗာတ်ဂျက် မွဲမွဲဠက်ပြကောတိကိုတ်ပြၚ် ဂွံစကာသြန်ဂၠိုၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – MOI