ကျာ်ထဝ်၊ သိပ်တေမ်ပါ ၂၉
ပ္ဍဲတွဵုရးမန် ပွိုၚ်ဍုၚ်ကျာ်ထဝ် ပရေၚ်ဒှ်လဝ်ပေါဲဗတိုက်ဟွံမွဲကီုလေဝ် ဟိုတ်နူၜၚ်ကျာဒပ်ပၞာန်ဗမာ ဗတိုက်တုဲ ညးဗြဴမွဲတၠချိုတ်၊ ပန်တၠဒးလဝ်ဝပ်နွံရောၚ် ဂွံတီနူ KNU ခရိုၚ်သဓီုရ။
ပ္ဍဲသိပ်တေမ်ပါ ၂၆ နူကဵုဒပ်ပၞာန်ဗမာ ကြဳလဝ်ဗုမ် ပ္ဍဲပွိုၚ်ဍုၚ်ကျာ်ထဝ် ကွာန်နာတ်သေၚ်၊ ကျံက်ဖျာ၊ ခမောက်ခွေ ကေုာံ ကွာန်ငပျဝ်တဝ်တံတုဲ နူကဵုဗလးတိပၠန် ဒပ်ပၞာန် ပန်ထဍိုၚ်ကဵုမံၚ်လွဟ်ဇၞော်ဆက်က်ရ။
ဟိုတ်နူဒးလဝ် ကမ်လွဟ်ဇၞော်ကဵု ဗုမ်ၜၚ်ကျာတံတုဲ ရဲနူကွာန်ငပျဝ်တဝ် ဒဝ်ပေဝ်တဳခိုၚ် အာယုက် ၅၈ သၞာံ ချိုတ်အာ၊ ဥူဝေယာန် ၄၀ သၞာံ၊ မစန္ဒာမျေအ်မန် ၂၅ သၞာံတံ ဒးအာဝပ် မဒှ်ရ။
တုဲပၠန် အကြာကွာန်ကျံက်ဖျာကဵု ခမောက်ခွေ ကောန်ကွာန်ဝေၚ်ကာန် ညးတြုံဒဳအာကွဳလိုန်ဓါတ် အဝဲ ၃၀ သၞာံပြၚ်ၜါတၠတံလေဝ် ဒးလဝ်ကီု သ္ၚိဌာန်ညးဍုၚ်ကွာန်တံလ္ၚဵုလေဝ် ဒးအာလဝ်ကီုရ။
ပေါဲဗတိုက်ဟွံမွဲ မွဲသာ်လေဝ် ဒၞာဲညးဍုၚ်ကွာန်ဂမၠိုၚ် မံၚ်စံၚ်တန်တဴမံၚ်တံဂှ် တၚ်ရန်တၟဳနွံနွံ ကြဳဗုၚ်ဗတိုက်လဝ်ဏောၚ် ညးဍုၚ်အာ KNU ခရိုၚ်သဓီု ပဒိုသဝ်ဧနိုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲသိပ်တေမ်ပါ ၂၄ ဂှ် ဒၞာဲဌာန်ဂအုပ်ပၞာန်ရးတၟေၚ် အလဵုအသဳညဳသၟဟ်ကောန်ဂကူ NUG ဂဇအ်လဝ် အကြာတွဵုရးမန်ကဵု ပယျဵုဗဂေါဝ် ဒးဒုၚ်ကြဳဗုမ်တုဲ တော်ဆလဝ်ဒၞာဲဂၠံၚ်ဍာန် ဒပ်ပၠန်ဂတးတံ ဆုတ်အာမာန်ဂှ် ဒပ်ပၞာန်စွံပွန် ဗတိုက်ဒှ်မာန်ရောၚ် ရဲရိုဟ်ကၞက်ပရိုၚ်တံ သ္ၚဳဂၠိပ်ရ။
ဟိုတ်နူ ပရေၚ်ဒပ်ပၞာန်ကြဳဗုမ်ကဵု ပန်လွဟ်ဇၞော်တုဲ ညးဒေသလၟိဟ်ကဵုလ္ၚီပြၚ် နူကွာန်နာတ်သေၚ်၊ ကျံက်ဖျာ၊ ခမောက်ခွေ ကေုာံ ကွာန်ငပျဝ်တဝ် ဟွံအောန်နူကဵု ၆ ကွာန်တံ ဒးဂြိပ်ပါဲဒဴတိတ်အာရ။
တုဲကၠုၚ်ဂိတုသိပ်တေမ်ပါ ၂၅ တေံလေဝ် ပ္ဍဲကွာန်ကဝ်ကာတ် ပွိုၚ်ဍုၚ်ကျာ်ထဝ်ဂှ် ဟိုတ်နူဒပ်ပၞာန်ဗမာ ကြဳဗုမ် ညးတြုံၜါတၠ ဒးဝပ်တုဲ သ္ၚိကဵု ကွဳစက်မွဲမ လီုလာ်အာရ။
ပရိုၚ်-သြၚ်လောန်တိုၚ်မ်
Photo – CJ