မတ်မလီု ၊ သိပ်တေမ်ပါ ၂၉
နူကဵုကံၚ်သဳဖိတ်ဒရေဝ်ဍုၚ်မန် MSFC ချူခၞံလဝ် ဒဂေတ်ပဋိပတ်ကောန်သ္ဂံၚ်ကေုာံ ဥပဒေပၞာန်တံဂှ် အတိုၚ်နွံပၟိက် သွက်ဂွံထပ်ပလေဝ်ဗပေၚ်စုတ်အာမာန် ပ္ဍဲသိပ်တေမ်ပါ ၂၆ ဂှ် လလောၚ်ပတိတ်လဝ် ပရိုၚ်ရ။
တုဲကၠုၚ် သိပ်တေမ်ပါ ၂၃ တေံ ပ္ဍဲကဵုတိဍာ်ဒၞာဲဗၠးၜးမွဲဒၞာဲဂှ် MSFC သ္ပကမကထတုဲ ဒပ်နွံသၟဝ်တဲ ဌာပရေၚ်စဵုဒၞာတံ ကေုာံ ဒပ်ဗၠာဲသၟိၚ် နွံသၟဝ်တဲဌာနပရေၚ်ကေၚ်ကာအပ္ဍဲဍုၚ်တံ ကၠောန်ပေါဲကောံဓရီု ကလေၚ်သ္ၚဳဂၠိပ် ဒဂေတ်ပဋိပတ်ကောန်သ္ဂံၚ်ကေုာံ ဥပဒေပၞာန်တံရ။
ဗွဲကြဴ စိုပ်ကၠုၚ်မွဲအခိၚ်မ္ဂး ဒပ်နွံအပ္ဍဲတွဵုရးမန် သီုဖအိုတ်တံ ဒှ်ကၠုၚ်ညံၚ်ရဴ ဒပ်ပၞာန် ယူနေတ်ဖိတ်ဒရေဝ်/ တွဵုရး သ္ကုတ်ဒပ်ပၞာန်ဖိတ်ဒရေဝ်ကၟိန်ဍုၚ်တုဲ ဒပ်တံသီုဖအိုတ် ဒှ်ကၠုၚ်ဒပ် မံၚ်မွဲအခေါၚ်အရာမၞိဟ်တံကဵု ဥပဒေတံမှ ဂွံကၠုၚ်ပရေၚ်ဂလာန်ပတေဟ် ထံက်ဂလာန်ညးဍုၚ်ကွာန်တံမာန်ရောၚ် သဘာပတိ MSFC သ္ဂးရ။
တုဲပၠန် ဒပ်တံဂှ် ဗွဲတၟေၚ်ညံၚ်ဂွံမၚ်မွဲအာ ဒဂေတ်ပဋိပတ်ကောန်သ္ဂံၚ် Code of Conduct တံကီု အတိုၚ် မူ၊ သၞောတ်ဗၜတ်ဂၠးကဝ်တံ သွက်ဂွံကၠောန်ဗက်အာတုဲ ညံၚ်ဂွံဒှ်ဥပဒေပၞာန် ဗက်ကဵုခေတ်မာန်တံဂှ် ချပ်ဗစာအာညိဂှ် ဟီုလဝ် ပ္ဍဲကဵုကောံဓရီုရ။
တုဲပၠန် ညးတာလျိုၚ် CDM သွာၚ်ပၞာန်တံ ကေုာံ ညးစီုသကီုပရေၚ်ပၞာန်တံ ဗီုဒးတတ်ကၠောံ ဆဵုဂဗလဝ်ပရေၚ်ပၞာန်တံကီု ဥပဒေ ပရေၚ်ဒဂတ်ပဋိပတ်ပၞာန်တံဂှ် သွက်ဂွံသၠာဲဂတးအာပရေၚ်ဆဵုဂဗကဵု ညးတိုန်စိုပ်တံညိကီုဂှ် သၠာဲဂတး ကဵုကသပ် သဳကၠဳလဝ်ညးသ္ကံရ။
အတိုၚ်ကံၚ်သဳဖိတ်ဒရေဝ်ဍုၚ်မန် MSFC ချူခၞံလဝ် ဒဂေတ်ပဋိပတ်ကောန်သ္ဂံၚ်ကေုာံ ဥပဒေပၞာန်တံဂှ် အတိုၚ်နွံပၟိက် နူကဵုဏံချပ်ဗစာအာတုဲ သွက်ဂွံဆက်ပလေဝ်ဗပေၚ်စုတ်အာဂှ် ဖျေံလဝ်သ္ဂုတ်သွာတ်ရ။
ဆဂး စပ်ကဵုပရေၚ်တၚ်နၚ် ဒးပလေဝ်ဆက်ဗပေၚ်အာတံတုဲ တၚ်နၚ်ဗွဲတြးဂှ်တှ်ေ ပ္ဍဲကဵုလိက်လလောၚ်တြး MSFC ဂှ် ချူစုတ်လဝ် ဟွံဂွံဆဵုလဝ်ပုဟ်။
ပ္ဍဲကောံဓရီုဏံဂှ် သဘာပတိ MSFC ဥက္ကဌကမ္မတဳပရေၚ်အုပ်ဓုပ် နာဲမန်သာၚ် ကေုာံ ညးတာလျိုၚ် ဌာနပရေၚ်စဵုဒၞာ၊ ဌာနပရေၚ်ကေၚ်ကာအပ္ဍဲဍုၚ်၊ သ္ကိုပ်ဒပ် နူကဵုဒပ်ပၠန်ဂတးဍုၚ်မန် MSRF၊ ဒပ်ရေဝ် ပရေၚ်စဵုဒၞာညးဍုၚ်ကွာန် YPDF တံ၊ ညးတာလျိုၚ်ဒပ်ဗၠာဲသၟိၚ် တွဵုရးဍုၚ်မန် နူကဵုသၟဝ်တဲဌာနဝန်ဇၞော် ပရေၚ်ကေၚ်ကာအပ္ဍဲဍုၚ်တံ တိုန်စိုပ်လဝ်ရ။
ပရိုၚ်-သြၚ်လောန်တိုၚ်မ်
Photo – MSFC