ဗဂေါ ၊ သိပ်တေမ်ပါ ၂၉
ပ္ဍဲကဵုဂိက်သၞေဟ်ကၚ်စၟဳစၟတ်လၟိုန် X-Ray ညံၚ်ခါယှေ ပွိုၚ်ဍုၚ်ဝဝ် ရးဗဂေါဂှ် လ္တူညးအာတရဴတံကီု ကွဳစက်ကပေါတ်တံကီု ညံၚ်ဟွံဂွံအာတ်ကေတ်သြန်ဂှ် သ္ကိုပ်ဝန်ဇၞော် ရးဗဂေါ ဥူမျိုဝ်သွိုဲဝေၚ် ကဵုဏာစၞောန်ပ္ညုၚ်ရ။
တုဲကၠုၚ် သိပ်တေမ်ပါ ၂၇ တေံဂှ် နကဵုပရေၚ်ထ္ၜးဟိုတ် ပရေၚ်အာကၠုၚ် ကပေါတ်ဗၞိက် ဂွံကလိတ်ကလောတ်ဗွဲမလောဲသွာဂးတုဲ အဟိန်ကၠုၚ်စၟဳစၟတ် ဂိက်သၞေဟ်ကၚ်ညံၚ်ခါယှေဂှ် သ္ကိုပ်ဝန်ဇၞော် ရးဗဂေါ ဥူမျိုဝ်သွိုဲဝေၚ် ကဵုလဝ်စၞောန်ပ္ညုၚ်ရောၚ်။
ဒဒှ်ရပံက်စွံလဝ် ဂိက်သၞေဟ်ကၚ်တံဟီုဂှ် သွက်ပရေၚ်ဂီုကၠီု၊ ပရေၚ်ဗတိုက်သရိုဟ်ကပေါတ်ဗၞိက်ဟွံလုပ်သၞောဝ်၊ ပရေၚ်ဂဥုဲၜူမာဲကဵု ပရေၚ်တာဒၞာလဝ်တၞဟ်ဟ်တံ ညံၚ်ဟွံဂွံတတ်ကၠောံအာ ပံက်လဝ်ဂိက်သၞေဟ်ကၚ်ဏံဒှ်တုဲ အတိုၚ်ပရေၚ်ဥပဒေသၞောဝ်ဓရ်တံဂှ် ဆက်ကၠောန်အာညိ ကဵုလဝ်စၞောန်ပ္ညုၚ်ရ။
တုဲပၠန် လ္တူညးဍုၚ်ကွာန်အာတရဴတံကီု ကပေါတ်ဗၞိက်ကဵုလဝ်အခေါင်တံကီု ညံၚ်ဟွံဂွံကံက်သြန်တုဲ ပရေၚ်အာကၠုၚ် ကပေါတ်ဗၞိက် ဂွံကလိတ်ကလောတ်အာ ဗွဲမလောဲသွာ ဖန်ဇန်ရေၚ်တၠုၚ်ကဵုညိဂှ် ကဵုလဝ်စၞောန် မဒှ်ရ။
လ္ပအာတ်သြန် လ္တူညးဍုၚ်ကွာန်အာတရဴတံ လ္ပကံက်အကံက် ကပေါတ်ဗၞိက်တံဂှ် သ္ကိုပ်ဝန်ဇၞော် ရးဗဂေါ ကဵုလဝ်စၞောန်ပ္ညုၚ်ကီုလေဝ် ပ္ဍဲအကာဲအရာဗလးတိဍာံဍာံမ္ဂး ပရေၚ်အာတ်သြန်ကံက်အကံက်တံ ဆက်ဒှ်မံၚ်ဖိုဟ်ရေၚ် ညးဒဳကွဳစက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ် ဂိတုသိပ်တေမ်ပါ ၂၃ တေံ အခိၚ်ဆဵုဂဗလဝ်ကဵု ဥက္ကဌ ကံၚ်သဳနေဗျဳဒဝ်၊ သ္ကိုပ်ဝန်ဇၞော် ရးဒေသတွဵုရးတံဂှ် သမ္မတအလဵုအသဳပၞာန် ဥူမေန်အံၚ်လှိုၚ် ကဵုလဝ်စၞောန်ပ္ညုၚ်ရောၚ်။
စပ်ကဵုပရေၚ်ဂီုကၠီုကီု ပရေၚ်ဗတိုက်သရိုဟ်ကပေါတ်ဗၞိက်ဟွံလုပ်သၞောဝ် ထၜးဟိုတ် ပံက်လဝ်ဂိက်သၞေဟ်ကၚ်တုဲ စကာပရေၚ်အဝဵု ဟွံစှ်ေဒၞာဲပုဟ် ဥူမေန်အံၚ်လှိုၚ် ဒုၚ်လဝ်ဝန်ကီုရ။
ပရေၚ်စကာအဝဵုအာဏာ ဟွံစှ်ေဒၞာဲတုဲ ကပေါတ်ပရေၚ်ဟွံလုပ်သၞောဝ်တံ လုပ်စိုပ်ကၠုၚ်၊ ဖဵုအဆက်ဍေံ ပရေၚ်ကပေါတ်ဍၚ်တိုန်ကၠုၚ်တံဂှ် ညးဍုၚ်ကွာန်တံ ဒးဒုၚ်စသိုၚ်မံၚ်ဂှ် ဟီုဂးလဝ်ရ။
သွက်ဂွံကေတ်အာအရေဝ် ရပ်စပ်အာ ပရေၚ်အခေါၚ်အဝဵု ဂွံလဝ်တုဲတုဲ စကာဟွံစှ်ေမံၚ်ဒၞာဲတံကီု ပရေၚ်ဖံက်ပကဝ် သၞောဝ်ဥပဒေတံဂှ်လဝ် ညံၚ်ဂွံကေတ်အရေဝ်ပိုတ်တ်ဂှ် ကဵုလဝ်စၞောန်ပ္ညုၚ်ကီုရ။
ဂိက်သၞေဟ်ကၚ်စၟဳစၟတ်လၟိုန် X-Ray ညံၚ်ခါယှေဂှ် နွံမံၚ်အကြာပယျဵုအဆက်စပ် တွဵုရးမန်ကဵု ရးဗဂေါတံတုဲ ကပေါတ်တိတ်နူ ဒေသမန်၊ ကရေၚ်ကဵု ရးတနၚ်သဳတံဟွံက ကပေါတ်ကၠုၚ်နူကဵုဍုၚ်သေံတံ တတ်ကၠောံအာမံၚ် ပ္ဍဲကဵုဂိက်သၞေဟ်ကၚ်ဇၞော်ဏံမွဲ မဒှ်ရ။
ပရိုၚ်-သြၚ်လောန်တိုၚ်မ်
Photo – HOS