ထဝါဲ၊ အံက်တဝ်ပါ ၂
အပ္ဍဲကဵုရးတနၚ်သဳ ဒၞာဲဒးလဝ်ဘဲဒဏ်သဘာဝ ဍာ်ဇၞော် ပွိုၚ်ဍုၚ်ထဝါဲ ကွာန်ယေဝိုၚ် ဒေသဂြိုပ်ဗၟံက်ဂှ် နူကဵုၜၚ်ကျာဒပ်ပၞာန်ဗမာတံ ကၠုၚ်ကြဳဖျေံလဝ်ဗုမ်နွံမံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဂိတုသိပ်တေမ်ပါ ၃၀ ၜိုတ်အခိၚ်သဝ်တ္ၚဲ ၃ နာဍဳ နူကဵုဗဒိုပ်ပၞာန်ကျာ ဍုၚ်ဗိက်ဂှ် ၜၚ်ကျာပၞာန်ဂျက်ဖိုက်တာမွဲမ ပဝ်တိုန်ကၠုၚ်တုဲ ပ္ဍဲကဵု ကွာန်ယေဝိုၚ်ဂှ် ကၠုၚ်ကြဳဖျေံဏာဗုမ် ၂ မရ။
ဟိုတ်နူပရေၚ်ကြဳဗုမ်ဏံ ညးဒေသ ပခါတ်အေန်ကဵု ကွာန်ယေဝိုၚ်တံ ထောံသ္ၚိဌာန်တုဲ ဒးဂြိပ်ပါဲတိတ်အာ လပါ်ကွာန်ပကာရဳရ။
အပ္ဍဲကဵုပရေၚ်ဒပ်ပၞာန်ကြဳလဝ်ဗုမ် ကွာန်ယေဝိုၚ်ဏံ ဗုမ်ၜါမဂှ် ဒတုံခတိုဟ်လဝ်မ္ၚးကွာန်ဂှ်တုဲ ပရေၚ်မၞိဟ်ဒးဝပ်ဘဲဒဏ်တံ မွဲသာ်လေဝ်ဟွံမွဲပုဟ် သ္ဂးရ။
အကြာဂအုံကွာန်ပကာရဳဏံ ကွာန်ယေဝိုၚ် ပါလုပ်မံၚ်ကီုတုဲ၊ စနူဂိတုသိပ်တေမ်ပါ ၂၆ ဂှ် ဟိုတ်နူကွာန်နွံမံၚ် ဂအုံကွာန်ပကာရဳတံ ဒှ်မံၚ်ဘဲပရေၚ်ဍာ်ဇၞော်ဗၠိုက်ဂှ်ရ ညးဒေသတံ ဒးဆဵုဂဗမံၚ်ကဵု အန္တရာဲဘဲဒဏ်ဍာ် မဒှ်ရ။
ဒၞာဲဒးလဝ်ဘဲဒဏ်သဘာဝဍာ်ဇၞော် လပါ်ဒေသထဝါဲဂှ် ဟိုတ်နူဒပ်ပၞာန်ဗမာ ကြဳဗုမ်ဗတိုက်လဝ်သာ်ဏံတုဲ အကြာညးဍုၚ်ကွာန်တံ ပရေၚ်ပါ်ပါဲ သၠုၚ်တိုန်မံၚ်ရ။
အပ္ဍဲကဵုရးတနၚ်သဳ ခရိုၚ်ထဝါဲ ပွိုၚ်ဍုၚ်ထဝါဲ၊ လံၚ်လုၚ်ကဵုတယိတ်ချံၚ်ဂှ် ဒှ်လဝ်ဘဲအန္တရာဲ ပရေၚ်ဍာ်ဇၞော် ဒဵုလာ်စှ်ေလဝ်ဂှ် မၞိဟ်ချိုတ်လဝ်ဒဵုကဵု ၃၂ တၠနွံတုဲ မၞိဟ်ဟွံအောန်နူကဵု ၄၀ တၠတံ ကၠေံမံၚ်ဏီရောၚ်။
ပရိုၚ်-သြၚ်လောန်တိုၚ်မ်
Photo – CJ