ဖာပန်၊ အံက်တဝ်ပါ ၂
အပ္ဍဲတွဵုရးကရေၚ် ပွိုၚ်ဍုၚ်ဖာပန် ကွာန်ဂြၚ်စိၚ် နွံမံၚ်ဂၠံၚ်ကမမံၚ်-ဖာပန်ဂှ် အပ္ဍဲဂိတုသိပ်တေမ်ပါအိုတ်ဏံ ကရောၚ်ပၞာန်ဒပ်ပၞာန်ဗမာ တံ ကလေၚ်ထိၚ်ချုက်ဂွံအာယျဂှ် နူကဵုအလဵုအသဳပၞာန် လလောၚ်ပတိတ်ပရိုၚ်ရ။
သွက်ဂွံကလေၚ်ထိၚ်ချုက်ကေတ် မွဲဒမြိပ်ဂၠံၚ်ကွဳစက် ကမမံၚ်-ဖာပန်မာန်ဂှ် စနူဂိတုမေ ၅ လောန်ကၠုၚ်တေံ ကရောၚ်ပၞာန်ဗမာ လုပ်ချဳဒရာၚ်မံၚ်ပရေၚ်လဝေၚ်ပၞာန်ဂှ် စိုပ်ဂိတုသိပ်တေမ်ပါ ၂၇ အခိၚ်သဝ်တ္ၚဲဂှ်တှ်ေ ကလေၚ်သီဂွံ ဒဵုကဵုကွာန်ဂြၚ်စိၚ်တုဲ ထိၚ်ချုက်မာန်အာယျရောၚ် သ္ဂးရ။
နူကဵုကမမံၚ် ဒဵုစိုပ်ကွာန်ဂြၚ်စိၚ် ကလေၚ်ထိၚ်ချုက်မာန် ဟီုမံၚ်ကီုလေဝ် နူကဵု ဒပ် KNU မဟာဒပ် ၅ ကြတ်ဗတိုက်လဝ် ကရောၚ်ပၞာန်ဗမာ အလုံမွဲဒမြိပ်ဂၠံၚ် မွဲဏှမွဲဏှတုဲ လပါ်ဒပ်ပၞာန် ဒးလဝ်ဘဲဂိမံၚ်ရောၚ် နူကဵုမဟာဒပ် ၅ လလောၚ်တြးလဝ်ရ။
စနူကဵုဂိတုမေ ဒဵုစိုပ်ဂိတုသိပ်တေမ်ပါဏံ အကြာဒပ် KNU ကဵု ဒပ်ပၞာန်ဗမာတံ ဒှ်လဝ်ပေါဲဗတိုက် အလုံမွဲဒမြိပ်ဂၠံၚ်ကွဳစက် ကမမံၚ်-ဖာပန် ဗွဲမဂၠိုၚ်တုဲ နူလပါ်ဒပ်ပၞာန်ဗမာ သီုကဵုညးတာလျိုၚ်တံ မပါလုပ် ၁၀၀ တၠပြၚ်ၚ် ချိုတ်လဝ်တုဲ ၂၀၀ ပြၚ်ဒးလဝ်ဝပ်၊ ညးဂြိပ်ဒဴတိတ်အာ လၟိဟ်ကဵုစှော်တံ နွံမံၚ် ပ္ဍဲလိက်လလောၚ်တြး မဟာဒပ် ၅ ဂှ် ချူလဝ်ရ။
နူကဵုဒပ်ပၞာန်ဗမာတံဂှ် သီဂွံလဝ်လွဟ်မကမ်တံ မွဲဏှမွဲဏှနွံတုဲ ပြဟ်ဟ်ဏံ သွက်ဂွံကဵုပရေၚ်အရီုဗၚ်ပၞာန် သွက်ဍုၚ်ဖာပန်ဂှ် ဒပ်ပၞာန်ဗမာတံ ကၠောန်မံၚ်ပရေၚ်ထပက်ပၞာန် ဆက်က်နွံမံၚ်တုဲ ဒှ်မံၚ်ပေါဲဗတိုက်ကဵု ဒပ်ပံၚ်တောဲပၠန်ဂတး ဒပ်ပၞာန်ဗၠးၜး ကောန်ဂကူကရေၚ် KNLA က္ဍိုပ်က္ဍိုပ်တံ ဇၟာပ်ပ်တ္ၚဲရောၚ်။
အကြာပေါဲဗတိုက်ဒှ်လဝ် ပ္ဍဲခရိုၚ်ဍုၚ်ဖာပန် မွဲဒမြိပ်ဂၠံၚ်ကွဳစက် ကမမံၚ်-ဖာပန် ဟိုတ်နူဒပ်ပၞာန် ပရေၚ်ဒးဝပ် ချိုတ်လဝ် လၟိဟ်ကဵုကၠမ်နွံတုဲ နူကဵုဒပ်ပၞာန် ကြဳဗုမ်ဗတိုက်လဝ် အကြာကွာန် နွံမံၚ်ပွိုၚ်ဍုၚ်ဖာပန်တံဂှ် ကောန်ကွာန်ဟွံအောန်နူ ၄ တၠ ချိုတ်အာတုဲ ဗွဲမဂၠိုၚ် ဂြိပ်ဒဴပါဲအာလဝ် ဒၞာဲတၞဟ်ဟ်တံရ။
ပရိုၚ်-သြၚ်လောန်တိုၚ်မ်
Photo – Social Media