မတ်မလီု၊ အံက်တဝ်ပါ ၂
အပ္ဍဲကဵုဍုၚ်ဇၞော်မဟာ တွဵုရးမန် ဍုၚ်မတ်မလီုဂှ် ထၜးဟိုတ်ကဵုတ္ၚဲဒပ်ဗၠာဲသၟိၚ်ဂးတုဲ နူကဵုဒပ်ဗၠာဲသၟိၚ် သၟဝ်တဲအလဵုအသဳပၞာန်တံ ဗက်အာတ်ကေတ်မံၚ် သြန်၊ အရက်၊ ဗဳယာ ပ္ဍဲကဵုဆေၚ်သတိုဝ်တံရဂှ် နူကဵုတၠဆေၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်တ္ၚဲဒပ်ဗၠာဲသၟိၚ်ဍုၚ်ဗမာ မရနုက်ကဵု ၆၂ ဝါ ဂိတုအံက်တဝ်ပါ ၁ ဏံဂးတုဲ နူကဵုဒပ်ဗၠာဲသၟိၚ် သၟဝ်တဲအလဵုအသဳပၞာန်တံ ဗက်အာတ်ကေတ်မံၚ် သြန်၊ အရက်၊ ဗဳယာ ပ္ဍဲကဵုဆေၚ်သတိုဝ်တံ မဒှ်ရ။
အဟိန်ဗက်အာတ်ကေတ်မံၚ်သြန်ဂှ်တှ်ေ အောန်အိုတ် နူကဵု ၅လက် ဒဵုကဵုကိုတ်တံ အာတ်လဝ်နွံကီု တန်တဴကဵုဆေၚ်သတိုဝ်တံ ဍောတ်ဇၞော်တုဲ ဗက်အာတ်မံၚ် အရက်၊ ဗဳယာ ၜါထုပ် ဒဵုကဵုပိထုပ် တံလေဝ် နွံမံၚ်ကီုရ။
ထၜးဟိုတ်ကဵု တ္ၚဲဒပ်ဗၠာဲသၟိၚ်တုဲ ဒပ်ဗၠာဲသၟိၚ်တံ ပရေၚ်ဗက်အာတ်ဒုၚ်ဒါန် ညံၚ်ရဴဗီုပြၚ် ဟရၚ်ကေတ်ကီုလေဝ် ပရေၚ်ဍေံတံအာတ်ဂှ် ဟွံကဵုမ္ဂး ဖေက်ဒးဒုၚ်ဂၠာဲပြဿနာတုဲ ဇၟာပ်ဆေၚ် ဒးစုတ်ကဵုလဝ်ရောၚ် ညးတၠဆေၚ်သတိုဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ရဲထိၚ်နေဝ်တံ ဒပ်ပရိုၚ်ဗၠာဲသၟိၚ်တံ သွက်ဂွံကၠောန် တ္ၚဲဒပ်ဗၠာဲသၟိၚ်နွံတုဲ ညံၚ်ကဵုပရေၚ်ဒုၚ်ဒါန် ဗက်အာတ်သြန်ရ။ သွက်ပေါဲပရေၚ်စသုၚ်အခိၚ်ဗတမ်ဂးတုဲ အာတ်လဝ် အရက် ဗဳယာတံရ။ ဆေၚ်သတိုဝ်ဗွဲမဂၠိုၚ်တံ လိုၚ်သေၚ်ပရေၚ်သွံရာန်ဓမ္မတာရနွံမံၚ်။ ပ္ဍဲလိုၚ်သေၚ်ပရေၚ်သွံရာန်ဓမ္မတာတံဂှ် အခေါၚ်သွံစအရက် ဗဳယာတံဟွံမွဲဂှ်တှ်ေ ဍေံတံဟီုဂှ် အတိုၚ်စိုတ်ဆန္ဒဗှ်ေတံနွံရ။ ဟွံကဵုသွက်ဍေံတံတှ်ေ ဒးဒုၚ်ဂၠာဲပရေၚ်ပြဿနာလေဝ် ဒှ်မာန်။ ဟွံမိက်ဒှ် ဒးဒုၚ်ဂၠာဲပရေၚ်ပြဿနာတှ်ေ အတိုၚ်ဍေံတံအာတ်ဂှ် ဇၟာပ်ပ်ဆေၚ်တံ ဒးကဵုဏာ” သာ်ဝွံ သ္ဂးရ။
တုဲပၠန် ဒပ်ဗၠာဲသၟိၚ် သၟဝ်အလဵုအသဳပၞာန်တံဂှ် အာတ်လဝ်ပရေၚ်ၚုဟ်မး နကဵုဗီုပြၚ်လိုၚ် သွက်လၟေၚ်ဂိတုနွံကီုလေဝ် ပြဟ်ဟ်ဏံ ထၜးလဝ်ဟိုတ်ကဵု တ္ၚဲဒပ်ဗၠာဲသၟိၚ်တုဲ ထပ်အာတ်ထပဵုလဝ်သြန် ဒှ်မာန်ရောၚ် ညးဆက်ဟီုရ။
အခန်ကၞာ တ္ၚဲဒပ်ဗၠာဲသၟိၚ်ဍုၚ်ဗမာ မရနုက်ကဵု ၆၂ ဝါ အံက်တဝ်ပါ ၁ ဂှ် ကၠောန်ဗဒှ်လဝ် ပ္ဍဲကဵုၝောံခန်တွဵုရး ဍုၚ်မတ်မလီုတုဲ နကဵုဒပ်ဗၠာဲသၟိၚ်တံ သ္ဂောံဂွံဂလာန်ပတေဟ် စွံအဲပရဲ နူညးဍုၚ်ကွာန်တံမ္ဂး မ္ဒးသောၚ်ၜးမံၚ်ကဵု ပရေၚ်စအဂတိတံရောၚ် နူကဵုသ္ကိုပ်ဝန်ဇၞော် တွဵုရးမန် အလဵုအသဳပၞာန် ဟီုလဝ်ဂလာန် မဒှ်ရ။
တုဲပၠန် စပ်ကဵုပရေၚ်ဆက်ဆောံ ညးဍုၚ်ကွာန်တံမ္ဂး ညံၚ်ဂွံဆက်ဆောံဟီုဂး ဗွဲမယေန်သၞာၚ်ကီု၊ ညံၚ်ဟွံဂွံဒှ် ပရေၚ်ဒုဟ်ဒဏ်တံ ဒစးဒုၚ်ပံၚ်တောဲအာကဵု ညးဍုၚ်ကွာန်တံတုဲ သၞောတ်ပရေၚ်ကမၠောန်ဗၠာဲသၟိၚ် ညးဍုၚ်ကွာန်တံပါလုပ်ကၠောန်အာဂှ် စွံပရေၚ်ဇြိုဟ်နက်တုဲ ညံၚ်ဂွံကၠောန်အာညိဂှ် ကဵုလဝ်စၞောန်ပ္ညုၚ်တံရ။
အပ္ဍဲအကာဲအရာ ဗလးတိဏံမ္ဂး နူကဵုပရေၚ်ဝိုၚ်ဝေၚ်တံကဵု ကမၠောန် ဟွံလုပ်သၞောဝ်တၞဟ်ဟ်တံဂှ် ဒပ်ဗၠာဲသၟိၚ် သၟဝ်အလဵုအသဳပၞာန်တံ ကေတ်လဝ်သြန်တုဲ ကဵုလဝ်အခေါၚ်ကီု၊ ရပ်ကေတ်သၟတ်ဍောတ်တ်တံတုဲ သွံစကဵု သွက်ပရေၚ်ယိုက်ဝန်ပၞာန်တံကီု စနူကဵု ပရေၚ်ရတ်ဓရတ်အာတ်ကေတ် နူကဵုညးဍုၚ်ကွာန်တံ နကဵုနဲကဲနာနာ ဒပ်ဗၠာဲသၟိၚ်တံ ကၠောန်လဝ် မဒှ်ကီုရ။
ပရိုၚ်-သြၚ်လောန်တိုၚ်မ်
Photo – Social Media