ကျာ်ထဝ်၊ အံက်တဝ်ပါ ၃
တွဵုရးမန် ပွိုၚ်ဍုၚ်ကျာ်ထဝ် ပ္ဍဲကဵုကွာန်ဇြဳကုၚ်ကဵု မေဝ်ယုၚ်ကျဳ ဟိုတ်နူလွဟ်ဇၞော်စှ်ေတုဲ ကောန်ၚာ်အဝဲ ၃ သၞာံမွဲတၠချိုတ်အာ၊ မွဲတၠဂှ် ဒးလဝ်ဝပ်ရောၚ် ဂွံတီနူကဵု ညးတာလျိုၚ် KNU ခရိုၚ်သဓီုတံရ။
ပ္ဍဲအံက်တဝ်ပါ ၜိုတ်အခိၚ်နူဂယး ၁၁ နာဍဳပြၚ်ၚ် နူကဵုၝောံဒပ် ၄၄ ပန်ဖျေံလွဟ်ဇၞော် ၁၂၀ ၜါမဂှ် ဒးအာကရပ်သ္ၚိ ဥူမံၚ်ဧ ကွာန်ဇြဳကုၚ်တုဲ နူကဵု အမတ ၃၁၀ ဖျေံသ္ဇိုၚ် ဍုၚ်တိၚ်ဇယာတ်ဂှ် ပန်ဏာလွဟ်ဇၞော် ကွာန်မေဝ်ယုၚ်ကျဳဂှ် ဒတုံစှ်ေခတိုဟ်အာ ပ္ဍဲအကြာကၠအ်တာဒဵု ကရပ်ဗဒါဲကွာန် သ္ဂးရ။
ဟိုတ်ပရူပရာဟွံမွဲမွဲသာ် ပန်မံၚ်ကဵုလွဟ်ဇၞော် အတိုၚ်ဗီုဏံတုဲ အလန်ဏံဒတုံစှ်ေအကြာကရပ်သ္ၚိ မၞိဟ်တံမံၚ်စံၚ်တုဲ ဒှ်ကၠုၚ်ပရေၚ်ဒးဝပ်ချိုတ်တံရောၚ် ညးအုပ်ကာ ခရိုၚ်သဓီု KNU ပဒို သဝ်ဧနိုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကမ်လွဟ်ဇၞော် ဒတုံခတိုဟ်အာဂှ် ကောန်ဥူမံၚ်အေ ချေတ်ကျဝ်လေန် အာယုက် ၃ သၞာံ ချိုတ်အာအပ္ဍဲဒၞာဲဂှ် မွဲလန်ဓဝ်တုဲ သ္ၚိဌာန်ညးတံလေဝ် လီုလာ်အာရ။
တုဲပၠန် ဥူကျဝ်သိုဝ် အာယုက် ၄၀ သၞာံ အဟိန်ကၠောန်မံၚ်ကမၠောန် ပ္ဍဲကဵုကၠအ်တာဒဵုဂှ် ဒးအာကဝေက်မကမ် အကြာဒဳတုဲ တၞံတာဒဵုတံလေဝ် လီုလာ်အာရဂှ် ဂွံတီရ။
တုဲကၠုၚ်ဂိတုသိပ်တေမ်ပါ ၂၆ တေံလေဝ် ပ္ဍဲကွာန်ငပျဝ်တဝ် ကမ်လွဟ်ဇၞော် ဒတုံခတိုဟ်အာဂှ် ညးဗြဴချိုတ်အာမွဲတၠတုဲ ဒးအာဝပ် ၂ တၠဂှ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media