မတ်မလီု ၊ အံက်တဝ်ပါ ၃
အပ္ဍဲကဵုတွဵုရးမန် စပ်ကဵုစၞစ ကမၠောန်လွဳလွတ်တံကီု ဂဥုဲဇဗ၊ စရိတ်ကပေါတ်အပြောံနာနာတံ သၠုၚ်တိုန်အာဂၠိုၚ်ကဵုဆတုဲ ကမၠောန်ပရေၚ်လွဳလွတ်ဗွဲမဂၠိုၚ် စိုပ်မံၚ်ကိုန် ဒးဒေါအ်ဇူထောံရဂှ် တၠကမၠောန် ပရေၚ်လွဳလွတ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကပေါတ်အပြောံပရေၚ်လွဳလွတ်နာနာတံဂှ် ဟိုတ်နူအလဵုအသဳပၞာန် ပတေၚ်ဓရတ်ကၠုၚ် ကုတ်ထပိုတ်လဝ် ပရေၚ်လိုၚ်သေၚ် ပၠုပ်ကပေါတ်တံတုဲ ကပေါတ်အပြောံနာနာ လုပ်ကၠုၚ်အကြာဒေသ ရုံရုံဂပ်ပ်ဟွံမွဲဂှ်ရ ၚုဟ်မးတံထပ်သၠုၚ်အာ ကီုရောၚ်။
တုဲပၠန် နူကဵုဍုၚ်သေံ ကပေါတ်အပြောံ ပရေၚ်လွဳလွတ် လုပ်စိုပ်ကၠုၚ်အကြာဒေသတံမ္ဂး ထၜးဟိုတ် ကပေါတ်ဟွံလုပ်သၞောဝ် အလဵုအသဳပၞာန်တံရပ်စပ်မံၚ်ဂှ်တှ်ေ ကပေါတ်အပြောံလုပ်စိုပ်မံၚ်တံဏံ ဒေါအ်အာအိုတ်တုဲ ကပေါတ်လ္ၚဵုတံပိုတ်အာဂှ်ရ ၚုဟ်မးသၠုၚ်တိုန်အာ ဟွံတန်ကဵုဆဒှ်အာ မဒှ်ရ။
ဟိုတ်နူအလဵုအသဳပၞာန် ပတေၚ်ထောံပါမေတ်ပၠုပ်ကပေါတ်တုဲ ကပေါတ်အပြောံပရေၚ်လွဳလွတ်နာနာ ၚုဟ်မးသၠုၚ်တိုန်အာ ၃ တၟံကၠံနွံဂှ်ကီု ဒးပတိတ်တမ်ရိုဟ်ဂၠိုၚ်တုဲ ဂွံပရဲပရၚ်အောန်မံၚ်ဂှ်ရ သၟာပရေၚ်လွဳလွတ်တံ အောန်စှ်ေကၠုၚ်အာရဂှ် တၠကမၠောန် ပရေၚ်လွဳလွတ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အနှေန်ကပေါတ်တံ တိုန်အာ၊ ကပေါတ်အပြောံ ဆေၚ်စပ်ကဵုစၞတံ ဂဥုဲတံ ပါမေတ်ပၠုပ်နၚ် ခက်ခုဲကၠုၚ်။ ပါမေတ်အခေါၚ်ပၠုပ်နၚ် ပါမေတ်ပၠုပ်ကပေါတ်တံ ခက်ခုဲတုဲ ၚုဟ်လေဝ်တိုန်အာတၟာဟလိုၚ်။ ၜက်အာ ၃၀% လပါ်လတူဏီ တိုန်အာ။ ပရေၚ်ဒးပတိတ်တမ်ရိုဟ် ဂၠိုၚ်လောန်အာကွေံကွေံတုဲ ပရဲပရၚ်အောန်တုဲ သၟာလွဳလွတ်တံလေဝ် ယအ်စှ်ေအာ။ သွက်ပရေၚ်ဂျိုၚ်တဴညးတံလေဝ် ဝါတ်အာအိုတ်စောန်ရ” သာ်ဝွံ သ္ဂးရ။
တုဲပၠန် ကပေါတ်အပြောံသွက်ဂွံသုၚ်စောဲ ပရေၚ်လွဳလွတ်နာနာတံဂှ် တော်အာကဵုကာလ ဟွံသီအဝဵုဏီမ္ဂး သၠုၚ်တိုန်အာ ၁၂ ဆပြၚ်တုဲ ပၠုပ်ကေတ်နၚ်လောဲလောဲသွာသွာ ဗီုအခိၚ်ကၠာတေံလေဝ်ဟွံဂွံတုဲ ပရေၚ်ဂွံဂျိုၚ်တဴ ဒှ်ကၠုၚ်အခက်အခုဲရဂှ် ညးဆက်ဟီုရ။
ပရေၚ်ၚုဟ်မး စရိတ်ကပေါတ်အပြောံနာနာတံ သၠုၚ်တိုန်အာဂၠိုၚ်ကဵုဆဂှ် ခြာဟွံလံမ္ဂး သွက်ဂွံဒးဒေါအ်ထောံ ပရေၚ်ကမၠောန် သီုဖအိုတ်တံဒှ်မာန်ရောၚ် တၠကမၠောန်ပရေၚ်လွဳလွတ် မွဲတၠတၞဟ်ပၠန်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“သၟာလွဳလွတ်စတံ ဟွံပြေပြံၚ်ပုဟ်။ ဒၟာနူသာ်လဵု ၚုဟ်မးတံ ဒးထပက်တိုန်အာမံၚ် ဂလိုၚ်ဏံရော ဟွံတီပုဟ်။ စိုတ်မိက်ဂွံဂြိပ်ထောံ တိတ်ကၠုၚ်ရ။ ပတိတ်လဝ်တမ်တုဲ ဟွံပြေပြံၚ်ပုဟ်။ သြန်ညိလေဝ် ဟွံသှ်ေပုဟ်။ ဂိတုဂတတေံ သှ်ေမာန်ဟာ။ မံၚ်ရံၚ်အာ ၚုဟ်ကလေၚ်စှ်ေဟာ။ ၚုဟ်ဟွံထပ်စှ်ေကၠုၚ်ပုဟ်။ ၜိုတ်ပိပန်ဂိတုပၠန် သြန်ဟွံသှ်ေမ္ဂး ကမၠောန်ဏံသီုဖအိုတ် ဒးဒေါအ်ထောံဏောၚ် ဇကုမွဲဓဝ်ဂှ်ဟွံသေၚ်ပုဟ်။ သီုညးဖအိုတ်တံဂှ် ယှအ်ဖျေံမံၚ်ယျဏောၚ်” သာ်ဝွံ သ္ဂးရ။
ပြဟ်ဟ်ဏံ သၟာဝဳဝတ်တံ ဒးဂဗဆဵုမံၚ်ကဵု ပရေၚ်အခက်အခုဲ စရိတ်ကပေါတ်အပြောံနာနာတံဂှ် ပတိုန်ထၜးကဵု အလဵုအသဳကီုလေဝ် ပရေၚ်ကဵုအရီုဗၚ်လေဝ်ဟွံမွဲ၊ သ္ပမာန်တှ်ေ ဝဳအာ၊ ဟွံပမာန်တှ်ေ လ္ပဝဳ သ္ပလဝ်ဗီုပြၚ်မတ်ဇျှဟ် ညိလေဝ်ဟွံကလေၚ်ရံၚ်ကဵုပုဟ် ညးဆက်ဟီုရ။
မွဲလပါ်ဂှ်ပၠန် ပ္ဍဲအံက်တဝ်ပါ ၃ တေံ သ္ကိုပ်ဝန်ဇၞော်တွဵုရးမန် အလဵုအသဳပၞာန် ဥူအံၚ်ဝေၚ်တာန် အဟိန်ဂေတ်အာဝေၚ်လဝ် ခြိုၚ်ဝဳစာၚ် ပ္ဍဲပွိုၚ်ဍုၚ်ပံၚ်ဂှ် ပ္ဍဲအကြာဒေသ သွက်ဂွံကပေါတ်ပရေၚ်ဝဳဝတ်တံ ဂၠိုၚ်ၚ်ဂးတုဲ ကဵုလဝ်စၞောန်ပ္ညုၚ်ကီုရ။
တုဲပၠန် ကပေါတ်ပရေၚ်ဝဳဝတ်တံဂှ်လေဝ် ပ္ဍဲကဵုဗွဝ်ဖျာတံ ညးဂွံတြးကဵုၚုဟ်မးဂပ်ဝ်ထေက်ကြိုက်ဂှ်လေဝ် ကဵုလဝ်စောန်ပ္ညုၚ်ရောၚ်။
အကာဲအရာဗလးတိဟီုတှ်ေ ကပေါတ်သွက်ဒးစကာ ပရေၚ်ဝဳဝတ်တံဂှ် စရိတ်ၚုဟ်မးသၠုၚ်တိုန်အာမံၚ် ဂၠိုၚ်ကဵုဆကီု ဂဥုဲဇဗကဵု စရိတ်နာနာတံ အိုတ်ဂၠိုၚ်ကီု စရိတ်ပလံၚ်ကေတ်နၚ်သၠုၚ်တိုန်မံၚ်တုဲ ပရေၚ်ၚုဟ်မးသွက်ဂွံကၠောန်ပတိတ် သၠုၚ်တိုန်အာတုဲ ယှအ်ထောံလျိုၚ် ကမၠောန်ဝဳဝတ်တံဂၠိုၚ်တိုန် မဒှ်ရ။
အပ္ဍဲကဵုတွဵုရးမန်ဝွံ ကမၠောန်ဝဳစာၚ်၊ ကၠိက်ၢ အဒါ ကဵု ကတံ စွံအဓိက ဝဳဝတ်ကၠောန်အာမံၚ်တုဲ ဝဳဗၜေအ်၊ ဂၠဴ၊ ဂစောံဟဂိတ်တံဂှ် ၜိုတ်သ္ပမာန် ကၠောန်မံၚ်ကီုရောၚ် ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo – Social Media