နေဗျဳဒဝ်၊ အံက်တဝ်ပါ ၃
အပ္ဍဲအကြာပရေၚ်သဳအဝဵု ၅ သၞာံဏံ ညးဍုၚ်ကွာန်ဟွံအောန်နူ ၁၀ တၠ ဒးဒုၚ်သ္ပပရေၚ်ကာဂစိုတ် ဂအုံဂအုံက္လောအ်အ် ၜိုတ် ၁၁၅ ဝါနွံတုဲ ကောန်ကွာန် ၂,၃၂၄ တၠ ချိုတ်အာလဝ်နွံရဂှ် နူကဵု အေၚ်သတဳကျု လ္ၚတ်ပရေၚ်မူဝါဒကေုာံ မဟာဗျူဟာဗမာ ISP – Myanmar လလောၚ်တြးလဝ်ရ။
အပ္ဍဲပရူဒဒှ်တံဏံ ပရေၚ်ဒးဒုၚ်ပန်ဗတိုက်လဝ်ကဵု လွဟ်မွဲမွဲဂကူကီု၊ ပရေၚ်ဒးဒုၚ်စံၚ်၊ ဟိုတ်နူဒးလဝ်ဘဲပၞာန်ကျာ၊ ပန်ဗတိုက်လဝ်တုဲ ကောန်ညးဍုၚ်ကွာန်တံ ဒးဒုၚ်သ္ပဏာကာဂစိုတ် ဂအုံဂအုံက္လောအ်အ် ဒှ်လဝ်ရောၚ် သ္ဂးရ။
ညးဒးချိုတ်အာလဝ် ၆၅ တၟံကၠံတံဂှ် ဟိုတ်နူဒးလဝ်ဘဲပၞာန်ကျာ ဗတိုက်လဝ်တုဲ ပ္ဍဲကဵုတွဵုရးရခေၚ် ပွိုၚ်ဍုၚ်ကျံက်တဝ် ဖျာအိန္ဒိယကဵု ကရပ်ဒဒန် ကစ္ဆပနဒဳတံ ဟိုတ်နူဒပ်ပၞာန်ဗမာပန်ဗတိုက်လဝ်ဂှ် ကောန်ကွာန် ဟွံအောန်နူ ၅၀ တၠ ဒးချိုတ်အာလဝ်တံလေဝ် ပါလုပ်ကီုရ။
ပၞောဝ်ကဵုပရေၚ်ဒဒှ်တံတုဲ ဟွံအောန်နူ ၁၁၀ ဝါဂှ် ဒပ်ပၞာန်ဗမာ ကၠောန်လဝ်ပွတံဏံတုဲ ကောန်ကွာန်ဟွံအောန်နူ ၂,၂၂၇ တၠတံ ဒးချိုတ်လဝ်ရောၚ်။
တုဲပၠန် ဒပ်ပၞာန်ဗမာကီု ရဲဂကောံလွဟ် ဟွံထံက်ဂလာန်ဍေံတံကီု ကၠောန်လဝ်ပရေၚ်ပွတံဏံ ၅ ဝါနွံတုဲ ကောန်ကွာန် ဟွံအောန်နူကဵု ၉၇ တၠ ချိုတ်အာလဝ်ရဂှ် ပ္ဍဲဂိတုသိပ်တေမ်ပါ ၃၀တေံ နူကဵုတၚ်နၚ် ISP – Myanmar လလောၚ်တြး ချူထမံက်လဝ်ရ။
ပ္ဍဲကဵုဒပ်ပၞာန်ဗမာ သ္ကိုပ်ပၞာန်ဇၞော် ယေဝ်ဝေန်ဥူ ဒှ်တိုန်ဂဥုပ်ဒပ်တုဲ ဗွဲကြဴဏံ အကြာမုက်ပၞာန် ကချေၚ်၊ ရခေၚ်ကဵု ကရေၚ်တံဂှ် နကဵုဇြဟတ်တီုတီုကၠီုကၠီု ကၠောန်လဝ်ပရေၚ်လဝေၚ်ပၞာန်တံကီု အသိၚ်ဗတိုက်ပၞာန်ကျာကဵုဒရုၚ်တံ သၠုၚ်တိုန်ကၠုၚ်တုဲ ပရေၚ်ဒးဒုၚ်သ္ပကာဂစိုတ် ဂအုံဂအုံက္လောအ်အ်တံ ဆက်ကတဵုဒှ်မံၚ် သ္ဂးရ။
ဗွဲတၟေၚ်မ္ဂး ဒှ်တိုန်ပရေၚ်အပြံၚ်အလှာဲဂဥုပ်ဒပ် အကြာပွိုၚ် ၆ ဂိတု ဂှ်တုဲ အပ္ဍဲအလုံမွဲဍုၚ် ပရေၚ်ဒးဒုၚ်သ္ပကာဂစိုတ် ဂအုံဂအုံက္လောအ်အ် ဟွံအောန်နူကဵု ၇ ဝါဒှ်ကၠုၚ်ဂှ်တှ်ေ ကောန်ကွာန်အရာပ် ၁၇၀ ပြၚ် ချိုတ်အာလဝ်ကီု အပ္ဍဲကဵုဏံဂှ် ဟွံအောန်နူ ၁၁၁ တၠတံဂှ် ဟိုတ်နူ ဒပ်ပၞာန်ကျာတံပန်ဗတိုက်လဝ် ဒးချိုတ်အာတုဲ အပ္ဍဲကဵုတွဵုရး ရခေၚ် မွဲဒၞာဲဓဝ် ၆၄ တၠ ဒးချိုတ်အာလဝ် မဒှ်ရ။
မွဲလပါ်တေံ ဒၞာဲဒေသထဝါဲ ဒှ်မံၚ်ပရေၚ်ဘဲဒဒိုက် ဒဵုလိုက်ဍာ်ဇၞော် တံဂှ်လေဝ် ဒပ်ပၞာန်ဗမာကြဳဗုမ်ဗတိုက်မံၚ်ဂှ်ကီု ပြဟ်ဟ်ဏံလေဝ် ဒၞာဲဒပ်ဍေံတံဒးဗလးလဝ်တဲ ပ္ဍဲအကြာပွိုၚ်ဍုၚ် တွဵုရး ရခေၚ် ဗွဲမဂၠိုၚ်တံမ္ဂး စွံပွန်ကဵု ကောန်အရာပ်ညးဍုၚ်ကွာန်တံတုဲ ဒပ်ပၞာန်ကြဳမံၚ်ဗုမ် ကြပ်အရိုဟ်ဟ်တ္ၚဲရောၚ်။
ဒၞာဲညးဍုၚ်ကွာန်တံနွံမံၚ် အကြာတိဍာ်ဒပ်ပၠန်ဂတးတံဂှ် ညံၚ်မံၚ်စံၚ်တန်တဴအာဟွံဂွံဂှ် ညံၚ်ရဴ ကၠောန်ပသောၚ်သအးပတိတ်မံၚ်ဂှ်ကီု နူကဵုညးဍုၚ်ကွာန်တံမွဲအဆံၚ် ကဵုဇြဟတ်ဟရိုဟ်တုဲ သွက်ဂွံကၠုၚ်စိုပ် ဝိုၚ်တက်ကျာ ပရေၚ်ၜိုတ်လလမ်ဂှ်လေဝ် ကၠောန်မံၚ်ပရေၚ်ရတ်ဓရတ်တံကီုရောၚ် အကြာပ်ဇၞော် CDM ဇေယျ ဒပ်ပၞာန်ကျာ သ္ၚဳဂၠိပ်ရ။
“ညးဍုၚ်ကွာန်တံဏံ နွံမံၚ်တှ်ေ မၞိဟ်ဒစဵုဒစးဍေံတံ(ဒပ်ပၞာန်) ထပ်မံက်မံၚ်ဏီ mindset (ပရေၚ်ဒုၚ်ဂိုၚ်ကေတ်) ပ္ဍဲအကြာဍေံတံနွံမံၚ်။ ဟိုတ်ဂှ်တုဲ ဒှ်မံၚ်ဗီုပြၚ် ဍေံတံမိက်ဂွံပသောၚ်ကၠေံထောံ ညးဍုၚ်ကွာန်တံဏောၚ်။ ပ္ဍဲဒေသတံဏံ ညံၚ်ဟွံဂံၚ်မံၚ်၊ ညံၚ်မံၚ်တန်တဴအာဟွံဂွံ ဗီုပြၚ်ကၠောန်ပသောၚ်ပတိတ်မံၚ်ဏောၚ်။ မွဲတၚ်ပၠန် အခိၚ်ဍေံတံ ကော်ဘိက်ဝိုၚ်တက်ကျာ ပရေၚ်ၜိုဟ်လလမ်ဂှ် အတိုၚ်ဗီုဍေံတံကၠောန်မံၚ်ရ။ တဲမွဲလပါ်တေံ ကၠောန်ပရေၚ်ဗတိုက် ဍိုက်ကဵုဇြဟတ်ဓဇန်ဓဇန် လၟုဟ်လေဝ်အတိုၚ်ဂှ်ပၠန်ရ။ နူကဵုညးဍုၚ်ကွာန်တံမွဲအဆံၚ် ကဵုဇြဟတ်ဟရိုဟ်တုဲ ဗီုပြၚ်ရတ်ဓရတ်မံၚ် ဂကောံပၠန်ဂတးတံဏောၚ် ကၠောန်မံၚ်” သာ်ဝွံ သ္ဂးရ။
သွက်ဂွံတက်ကျာသဳကၠဳ ပရေၚ်ၜိုဟ်လလမ်ဂှ် အလဵုအသဳပၞာန် ကော်ဘိက်လဝ် ဂကောံကောန်ဍုၚ်အရၚ်ရပ်လွဟ်တံကီု မွဲလပါ်တေံပၠန် နူကဵုဗလးကျာတံဂှ် ထောံဗုမ်ကြဳဖျေံမံၚ် ဒၞာဲဂကောံကောန်ဍုၚ်အရၚ်ကဵု ဒပ်ပၠန်ဂတးပန်မံၚ် ဒပ်ပၞာန်ဗမာတံတုဲ နူဗလးတိဂှ်လေဝ် ထပက်မံၚ်ကရောၚ်ပၞာန်ရောၚ်။
ဒၞာဲတိဍာ် ဒပ်ပၠန်ဂတးတံထိၚ်ချုက်လဝ်ကီု ကောန်ဍုၚ်ကွာန်နွံမံၚ် အကြာဒၞာဲမုက်ပၞာန်တံ သွက်ဂွံဒးအာဘဲဒဏ်အန္တရာဲဂှ် ဒှ်မံၚ်အကာဲအရာ ဂၠိုၚ်အိုတ်ရောၚ် နူကဵု ISP – Myanmar သ္ဂးရ။
ပရေၚ်ဒးဒုၚ်စွံပွန်တံဂှ် သ္ၚိဌာန်ညးဍုၚ်ကွာန်တံသၟးဟွံက စမြိုၚ်ဒၞာဲ ဌာန်ဒတန်ပရေၚ်သာသနာတံကီု ရုၚ်ဂဥုဲ ကဵု ဘာဗတောန်လိက်တံလေဝ် ဟွံသှ်ေတုဲ အကြာပ္ဍဲပရေၚ်ပဋိပက္ခတံ အစောန်စရာဲစဵုဒၞာကဵုအာ သွက်ညးဍုၚ်ကွာန် ကောန်အရာပ်တံဟီုဂှ်တှ်ေ ဒှ်မံၚ်အကာဲအရာ ဍိုန်လျ သဝ်စှ်ေအိုတ်မံၚ်ရောၚ် ထံက်ထၜးလဝ်ရ။
တုဲပၠန် စွံလဝ်တၚ်ရန်တၟံ မိက်ဂွံဇၞးပၞာန်တုဲ ပွန်ဒၞာဲဟွံဆေၚ်စပ်ကဵုပရေၚ်ပၞာန် ဒၞာဲကောန်အရာပ် ညးဍုၚ်ကွာန်တံမံၚ်စံၚ်ဂှ် ပတဝ်စွံပွန်ပရေၚ်ပၞာန်တံဟီုဂှ် သွက်ရဲကၠောန်တံကီု သွက်ရဲဒးဒုၚ်ကၠောန်အာတံဂှ်ကီု ဒှ်ပရေၚ်လလေၚ် ဖဵုဂုဏ်ပရေံကွေံ သ္ဂးရ။
ဟိုတ်နူ စွံပွန်ကဵုပရေၚ်ပၞာန်တုဲ ပန်ဗတိုက်မံၚ်ဂှ်ရ ပရေၚ်ညးဍုၚ်ကွာန်တံချိုတ်ကီု ပရေၚ်သ္ၚိဌာန်လီုလာ်တံ သၠုၚ်အာတုဲ ဂကောံကၠောန်လဝ်ပရေၚ်ပွတံဏံလေဝ် ပရေၚ်ဖံက်ပကဝ် အမှုရာဇာဝတ်ပၞာန် ပဵုဂၠိုၚ်တိုန်မာန်ရောၚ် နူကဵု ISP – Myanmar ကဵုသတိ လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media