လံၚ်လုၚ် – အံက်တဝ်ပါ ၆
အပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် ကွာန်ညှေန်မဝ်ကဵုကဒက်င္ၚါထိၚ်ဂှ် ကရောၚ်ပၞာန်ဗမာ ထပက်လုပ်ကၠုၚ်တုဲ ညးဒေသလၟိဟ်ကဵုလ္ၚီတံ ဒးဂြိပ်ပါဲတိတ်အာဂှ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ်အံက်တဝ်ပါ ၄ ဏံ စနူအခိၚ်နူဂယးဂှ် ကောန်ပၞာန်ဗမာဇြဟတ် ၂၀၀ ပြၚ်တံ တိတ်ကၠုၚ်နူဍုၚ်လံၚ်လုၚ်တုဲ ထပက်လုပ်ကၠုၚ်ကရောၚ်ပၞာန် ပ္ဍဲကွာန်ညှေန်မဝ်ကဵု ကဒက်င္ၚါထိၚ်ရ။
ဟိုတ်နူ ကရောၚ်ပၞာန်ဗမာ ထပက်လုပ်ကၠုၚ်ဂှ်ရ ညးဍုၚ်ကွာန်တံ ဖေက်ဒးဒုၚ်ရပ်ဂစိုတ်ကီု၊ ဖေက်ဒးဒုၚ်တံၚ်ပဝ်တာ ဖေက်ဒးဒုၚ်ရပ် နကဵုဂဒံၚ်မၞိဟ်တံတုဲ ဒးဂြိပ်ပါဲတိတ်အာရောၚ် သ္ဂးရ။
ဟိုတ်နူ ကရောၚ်ပၞာန်ဗမာလုပ်ကၠုၚ်ဂှ်ရ ညးဒေသ နူကဵုကွာန် ညှေန်မဝ်၊ ကဒက်င္ၚါထိၚ်၊ ဂအ်အေၚ်၊ နှေဝ်တဝ်၊ ကဒက်ထိၚ်ဂျဳကဵု ကွာန်ဍာ်ဗုသၟဝ်တံ မၞိဟ်ဟွံအောန်နူကဵု ၃၀၀၀ ဒးဂြိပ်ပါဲတိတ်အာ ဒၞာဲဗၠးဘဲတံရ။
ပြဟ်ဟ်ဏံ ကရောၚ်ပၞာန်ဗမာ ဖျေံစွံလဝ်ဒပ် ပ္ဍဲကဵုကွာန်ညှေန်မဝ်ကဵု ကဒက်င္ၚါထိၚ်ကီုလေဝ် ပေါဲဗတိုက်အကြာၜါလပါ် ဟွံဒှ်ဏီပုဟ် သ္ဂးရ။
တုဲကၠုၚ်ဂိတုသိပ်တေမ်ပါ ၁၀ တေံလေဝ် ပ္ဍဲပွိုၚ်ဍုၚ်လံၚ်လုၚ် ကရောၚ်ပၞာန်ဗမာ ထပက်လုပ်ကၠုၚ် ကွာန်ဝေဒဳ၊ မဂျဝ်မဝ်ကဵု ကူဇြယာတ်တံတုဲ ရပ်ဂစိုတ်လဝ် ညးဗျုဗျုအာယုက် ၉၀ မပါလုပ် ကောန်ကွာန် ၅ တၠတံတုဲ စံၚ်ပလီုလဝ်သ္ၚိ ဟွံအောန် ၁၀ မ ဒှ်ရ။
ပရေၚ်ဘဲဍာ်ဇၞော် တိသရိုဟ်ဒဵုလိုက်မံၚ် ပ္ဍဲကဵုပွိုၚ်ဍုၚ်လံၚ်လုၚ်ဂှ် ညးဍုၚ်ကွာန်တံ နွံမံၚ်ပၟိက်ကဵု စၞစသုၚ်ဇွောံမနာနာ စနူကဵုဍာ်သုၚ်တံ နကဵုပရေၚ်ကာမံက်တိုန် မိက်ဂွံဂွံမံၚ် ပရေၚ်အရီုဗၚ်ရောၚ် ဂွံတီနူကဵုဂကောံရီုဗၚ်ဟံၚ်ပြာ်တံရ။
ပရိုၚ်-သြၚ်လောန်တိုၚ်မ်
Photo – Social Media