ကွာလာလမ်ပူ-အံက်တဝ်ပါ ၃
အပ္ဍဲဍုၚ်မလေဝ်ယှာ အကြာသၞာံဏံ စနူဂျာန်နဝါရဳ ၁ ဒဵုစိုပ်သိပ်တေမ်ပါ ၂၉ ကၠောန်လဝ်ပရေၚ်လဝေၚ်ပၞာန် အလုံဍုၚ်မွဲ ၁၀,၃၇၄ ဝါတုဲ ရပ်ဂွံလဝ် ကောန်ဍုၚ်သအာၚ်ဟွံလုပ်သၞောဝ် ၃၇,၃၁၃ တၠဂှ် ဝန်ဇၞော်ပရေၚ်ကေၚ်ကာအပ္ဍဲဍုၚ် ဒါတောတ် သရဳ သိုင်ဖူဒေၚ် နူသူယှေန်ဟီုရ။
အပ္ဍဲအကြာဏံပၠန် ဌာနဝန်ဇၞော်ပရေၚ်ကေၚ်ကာအပ္ဍဲဍုၚ် ကဵု ဌာနလဝကတံ ကၠောန်ပရေၚ်ပံၚ်တောဲ ဗက်ဂၠိုက်ဂၠာဲလဝေၚ်ပၞာန်ဗလးတိတံတုဲ ကၠောန်ဏာပရေၚ်စၟဳစၟတ်မၞိဟ် ၁၃၇,၆၀၃ တၠတံ မဒှ်ရ။
သွက်ဂွံသောၚ်ကလးအာ ပရေၚ်ကောန်ဍုၚ်သအာၚ် ဟွံလုပ်သၞောဝ်တံမာန် နူကဵုဌာနၜါဏံ ဆက်ကၠောန်အာမံၚ် ပရေၚ် လဝေၚ်ပၞာန် ဇၟာပ်ပ်တ္ၚဲဂှ် ဝန်ဇၞော်ပရေၚ်ကေၚ်ကာအပ္ဍဲဍုၚ် ဟီုရ။ ဟိုတ်နူ တၚ်ဍိုန်လျပရေၚ်အုပ်ဓုပ် နူကဵုသၞောတ်တမၠာတေံ ယုတ်ဒေက်လဝ်တုဲ ပြသၞာပရေၚ်ဏံ တန်ကၠုၚ်လဝ်အခိၚ်လံရဂှ် ညးသ္ဂးရ။
ဟိုတ်နူကဵု ခါန်ကၞက်စုတ်လဝ်ကမၠောန် ကောန်ဍုၚ်သအာၚ် ဟွံလုပ်သၞောဝ်တံ၊ ဆက်စပ်ကဵု ပရေၚ်ကဵုလဝ်စဵုဒၞာတံတုဲ ရပ်ကၠေၚ်လဝ် တၠကမၠောန် ၁,၈၀၉ တံနွံတုဲ အပ္ဍဲဏံ ကောန်ဍုၚ်မလေဝ်ယှာတံ ပါမံၚ် ၁,၆၉၂ တၠ မဒှ်ရ။
ကေတ်အာအရေဝ် ကောန်ဍုၚ်သအာၚ်တံသၟး ကၠောန်ဟွံထေက်တုဲ ညးခါန်ကၞက်ကဵုလဝ် ကမၠောန်တံ၊ ညးကဵုလဝ်ပရေၚ်စဵုဒၞာတံ ကေုာံ ကေတ်အခေါၚ်ခိုဟ် အကာဲအရာတုဲ ညးပတိတ်လဝ်ပရဲတံဂှ်လေဝ် ကေတ်အာအရေဝ်ကီုရောၚ် ဝန်ဇၞောန်ပရေၚ်ကေၚ်ကာအပ္ဍဲဍုၚ် သ္ဂးရ။
ဆက်ကဵုမံၚ်ကဵု ပရေၚ်ခါန်ကၞက်ကဵုလဝ်ကမၠောန် ကောန်ဍုၚ်သအာၚ်ဟွံလုပ်သၞောဝ်တံတုဲ ရပ်ဂွံလဝ်လၟိဟ်တၠကမၠောန်တံဂှ် ပ္ဍဲသၞာံ ၂၀၂၃ ဂှ် ၃၄၆ တၠ၊ သၞာံ ၂၀၂၄ ဂှ် ၁,၈၅၉ တၠ၊ သၞာံ ၂၀၂၅ ဂှ် ၂,၂၀၂ နွံမံၚ် လလောၚ်တြးလဝ်ရ။
ကၠုၚ်ကၠောန်ကမၠောန်ဒှ်ဒှ်၊ ကၠုၚ်ဝေၚ်ဒှ်ဒှ် ကောန်ဍုၚ်သအာၚ် စိုပ်ကၠုၚ်ဍုၚ်မလေဝ်ယှာတံ ဒးဒဂတ်ဗက်အာသၞောဝ်တုဲ တတ်လုပ်ဍုၚ် နကဵုပရေၚ်လုပ်သၞောဝ်ဟွံသေၚ်တံ၊ ကၠောန်ပတောအ်လိက်ထံက်ဂလာန်တံ၊ ၜက်အခေါၚ်တုဲ မံၚ်စံၚ်အာတံ ညံၚ်ဟွံဂွံကၠောန်ညိဂှ် ကဵုလဝ်သတိရ။
သွက်သ္ဂောံပရဲလောဲလောဲမာန် ကဵုကမၠောန်ခါန်ကၞက်လဝ် ကောန်ဍုၚ်သအာၚ်ဟွံလုပ်သၞောဝ်တံ ဟွံသေၚ်မ္ဂး ကဵုလဝ်ပရေၚ်စဵုဒၞာတံ လ္ပကၠောန်အိုတ်ညိ ဝန်ဇၞော်ကဵုလဝ်သတိကု ညးတၠကမၠောန်တံရ။
ပရေၚ်ပြဿနာ ကောန်ဍုၚ်သအာၚ်ဟွံလုပ်သၞောဝ်တံဂှ် ဆေၚ်စပ်မံၚ်ကဵု ပရေၚ်ဌာနလဝကမွဲဟၚ် ဟွံသေၚ်တုဲ တန်တဴအာကဵု ပရေၚ်ဇီုကပိုက် ပရေၚ်ပိုန်ဒြပ်၊ ပရေၚ်ဂီုကၠီု ကေုာံ သၞောတ်ပရေၚ်မၞိဟ်တံရောၚ် ဝန်ဇၞော် အေတ်သမေလ် ဟီုရ။
ဟိုတ်ဂှ်တုဲ အလုံဍုၚ်မလေဝ်ယှာမွဲ သွက်ဂွံကၠောန်အာ ပရေၚ်လဝေၚ်ပၞာန် လ္တူကောန်ဍုၚ်သအာၚ် ဟွံလုပ်သၞောဝ်တံ ဇၟာပ်ပ်တ္ၚဲဂှ် ကဵုလဝ်စၞောန်ကု ဌာနဝန်ဇၞော် ပရေၚ်ကေၚ်ကာအပ္ဍဲဍုၚ်ကဵု ဌာနလဝကတံဂှ် ဂွံတီရ။
Ref:Bernama