သိုလ်- အံက်တဝ်ပါ ၃
အပ္ဍဲကဵုယူခရုၚ် ကိစ္စပရေၚ်ရပ်ဂွံလဝ်ဂၠုဲပၞာန် ကိုဝ်ရဳယာသၟဝ် ၂ တၠတံ သွက်ဂွံသၠောဲပြံၚ်ပအပ်ကဵု ဇရေၚ်ကိုဝ်ရဳယာသၠုၚ်ကျာ ညးဂမၠိုၚ်ဂွံတီမိၚ် ဟိုတ်နူဟီုပတိတ်လဝ်တုဲ ပရေၚ်ဆက်ဆောံအမာတ်ကလုတ် အကြာယူခရုၚ်ကဵု ကိုဝ်ရဳယာသၠုၚ်ကျာတံ ကြံၚ်မ္ၚိုဟ်တိုန်မံၚ်ရ။
ပရေၚ်ဒဒှ်ဍာံဍာံဂှ် သ္ပစၟတ်သမ္တီတုဲ သွက်ညးဂမၠိုၚ်တံဂွံတီညာတ်အာ ပရေၚ်ဒုၚ်ဂုဏ်ဟွံမွဲမ္ဂး ထပ်ကၠောန်အာ ပရေၚ်ကေတ် အရေဝ်ပၠန်ရောၚ် သမ္မတကိုဝ်ရဳယာသၠုၚ်ကျာ လဳဂျေမျံၚ် ကဵုဏာလဝ်သတိ ပ္ဍဲကဵုအံက်တဝ်ပါ ၂ တေံရ။
ဗီုပြၚ်လဵု ကၠောန်အာပရေၚ်ကေတ်အရေဝ်တံဂှ် ဟီုဂးလဝ်ချိုတ်တ်ပၠိုတ်တ် ဟွံသေၚ်ဏီပုဟ်။
ဒဒှ်ရ ညးတံရပ်ဂွံလဝ်ကောန်သဂံၚ်ကိုဝ်ရဳယာသၟဝ်ကျာ ၂ တၠ အဟိန်ဘိုၚ်ရီုဗၚ်ဗတိုက်ကဵုလဝ်လပါရတ်ယှာတံဂှ် သၠောဲပြံၚ်ပအပ်ကဵုလဝ် ကိုဝ်ရဳယာသၠုၚ်ကျာ တုဲဒှ်အာယျ သမ္မတယူခရုၚ် ဗလိုဒဳမာ ဇဳလန်သကဳ အပ္ဍဲဟီုလဝ်ဂလာန် သဘၚ်သဳကၠဳဇၞော်ကုလသမဂ္ဂတေံတုဲ ပရေၚ်အရေဝ်ဒးဂၠိုၚ်ညးသ္ကံဏံ စဒှ်ကၠုၚ်လဝ် မဒှ်ရ။
ပရေၚ်သၠောဲပြံၚ်ဏံ ညံၚ်ဂွံစွံအာပရေၚ်ကာပၞုက်အကြာၜါဍုၚ် တုပ်လဝ်စိုတ်ရောၚ် အလဵုအသဳလပါ်သိုလ်တံ သ္ဂးရ။
အပ္ဍဲကဵုစွံလဝ်ပရေၚ်ကာပၞုက်မ္ဂး ပရေၚ်ပရေၚ်ဂီုကၠီုဒှ်ဒဝိၚ် သွက်ကၟိန်ကောန်သ္ဂံၚ်ၜါတၠဏံ သှ်ေမံၚ်ပ္ဍဲကိုဝ်ရဳယာ သၟဝ်ကျာတေံလေဝ် ပါလုပ်ကီုရောၚ် လပါ်ကိုဝ်ရဳယာသၠုၚ်ကျာ သောၚ်ကလးလဝ်ရ။
ပရေၚ်တုပ်လဝ်စိုတ်ကာပၞုက်ဏံ နွံမံၚ်ဂှ် လပါ်ယူခရုၚ် သ္ပထောံပရေၚ်စောဒကတုဲ အကြာၜါဍုၚ် ပရေၚ်အရေဝ်ဂၠိုၚ်ညးသ္ကံ သၠုၚ်တိုန်ရ။
တၚ်တုပ်စိုတ် ပရေၚ်ကာပၞုက်နွံမံၚ်ရောၚ် လပါ်ကိုဝ်ရဳယာသၠုၚ်ကျာဟီုလဝ်တုဲ အတိုၚ်ပရိုၚ်မံက်တိတ်ကၠုၚ် လက်ကရဴအိုတ် အံက်တဝ်ပါ ၂ ဂှ်မ္ဂး သွက်ပရေၚ်ဏံ လိက်သက်သဳနွံမံၚ် ချိုတ်တ်ပၠိုတ်တ်ရောၚ် လပါ်သိုလ် ဟီုလဝ်ရ။ မွဲလပါ်ဂှ်ပၠန် စပ်ကဵုပရေၚ်အမာတ်ကလုတ် ဒှ်အာပရေၚ်ဓဝ်ကၠိုဟ်ခၠၚ်ဗၠေတ်မှာရာရောၚ် ဝန်ဇၞော်ပရေၚ်ဍုၚ်သအာၚ်ယူခရုၚ် အာန်ဒရဳသိုက်ဗဳဟာ သွက်ဂွံပသောၚ်အာပရေၚ်ဏံ ကၠောန်မံၚ်တုဲ ကိုဝ်ရဳယာသၠုၚ်ကျာဂှ် သွက်ယူခရုၚ် ကိစ္စဇၞော်မံၚ်ကီုရောၚ် ဟီုရ။
ဆဂး ပရေၚ်လၟုဟ်ဂှ် ပဵုအာနူကဵု ပရေၚ်ဓဝ်ကၠိုဟ်ခၠၚ်ဗၠေတ်မှာရာ ပရေၚ်ဓမ္မတာဏီတုဲ ကိစ္စဆေၚ်စပ်မံၚ် ပရေၚ်ဂုဏ်သိက္ခာ ဍုၚ်နိဂီုကိုဝ်ရဳယာသၠုၚ်ကျာကဵု ညးဍုၚ်ကွာန်တံရောၚ် သမ္မတလဳ ကလေၚ်ဟီုလဝ်ရ။
တုဲပၠန် အပ္ဍဲကဵုတ္ကအ် အကြာကိုဝ်ရဳယာသၟဝ်ကျာကဵု သၠုၚ်ကျာၜါဍုၚ်ဏံ ဒှ်ကၠုၚ်ပရေၚ်ပဋိပက္ခပၞာန်မာန်ရောၚ် နူလပါ်ယူခရုၚ်တံ ဟီုဂးမံၚ်ဂှ်လေဝ် သမ္မတလဳ ဟွံပေၚ်စိုတ်ကွေံကွေံတုဲ တၚ်တုပ်စိုတ်နွံကၠုၚ်လဝ်ဂှ် သ္ပပရေၚ်စၟတ်သမ္တီတုဲ အခိၚ်လၟုဟ်ဏံ ဒးဒုၚ်ဂုဏ်ရောၚ် သ္ဂးရ။
ကောန်ပၞာန်ကိုဝ်ရဳယာ ၂ တၠတံ နူကဵုလပါ်ရတ်ယှာ အဟိန်ဘိုၚ်ကဵုရီုဗၚ် ပေါဲဗတိုက်ယူခရုၚ်တံ ပ္ဍဲသၞာံ ၂၀၂၅ ဂိတုဂျာန်နဝါရဳဂှ် ဒပ်ယူခရုၚ်တံ ရပ်ကၠေၚ်ဂွံတုဲ ဗွဲကြဴဏံ ထမံက်ပတိတ်လဝ်ဆန္ဒညးတံ မိက်ဂွံအာဍုၚ်ကိုဝ်ရဳယာသၠုၚ်ကျာရ။
စနူကဵု အခိၚ်ရတ်ယှာတံ ၜက်ၜေတ်ဗတိုက်မံၚ် ယူခရုၚ်ဂှ်ရ နူကဵုကိုဝ်ရဳယာသၠုၚ်ကျာ ကဵုကၠုၚ်ပရေၚ်အရီုဗၚ် ဓဝ်ဗစာရဏာမၞိဟ်တံကဵု ပရေၚ်ဂစိုတ်မၞိဟ်တံဟွံသေၚ်ကီုလေဝ် ရပ်စပ်လဝ် မူဝါဒ သွက်ဍုၚ်နိဂီုပၞာန်ဒှ်မံၚ်တံ လွဟ်လက်နက်မၞိဟ်တံဟွံချိုတ် ဟွံကဵုတိုက်ရိုက်ရ။
Ref:BBC
ယူခရုၚ်ဟွံဒုၚ်ဂုဏ်မ္ဂး ထပ်ကၠောန်အာပရေၚ်ကေတ်အရေဝ်ရောၚ် ကိုဝ်ရဳယာသၠုၚ်ကျာကဵုသတိ
By
sanlontai
