မတ်မလီု ၊ အံက်တဝ်ပါ ၆
အပ္ဍဲတွဵုရးမန် စပ်ကဵုပရေၚ် နူကဵုအလဵုအသဳတံ ရုဲစှ်လဝ် သ္ကိုပ်ပရေၚ်အုပ်ဓုပ် အရာပ်၊ ကွာန်တံ ဆအယာံမာတ် ဗွဲလ္တူကျာဂှ်တုဲ ပ္ဍဲကဵုကောံဓရီုလၟေၚ်ဍာံ အလန်စတုတ္ထ စၠတ်ထဝ်တွဵုရးမန်ကၠောန်ဗဒှ်လဝ် အံက်တဝ်ပါ ၅ ဏံ ပတိုန်ဏာဂလာန်ရ။
အပ္ဍဲတွဵုရးမန် ဒၞာဲအကာဲအရာ ပရေၚ်တိဍာ် ညိၚ်ဝပ်ၜိုဟ်သြိုဟ်မံၚ် ပ္ဍဲအရာပ်၊ ဂအုံကွာန်သီုဖအိုတ်တံဂှ် အတိုၚ်အာယုက်တာလျိုၚ် သမ္မတပေၚ်ၚ် အတိုၚ်ဥပဒေတန်ကြန်မွဲအခိၚ်ဓဝ် သွက်ဂွံကလေၚ်ရုဲစှ်အာ သ္ကိုပ်ပရေၚ်အုပ်ဓုပ်တံ မွဲအခိၚ်ဟေၚ် ခါန်ကၞက်ကဵုအာ မဒှ်ရ။
အမာတ်တွဵုရး မာံအံၚ်ထူ နူကဵု ညးစၞးစၠတ်ထဝ် ပွိုၚ်ဍုၚ်ကျာ်ထဝ် စၟတ်(၂) ပတိုန်ဏာဂလာန်ဏံတုဲ စၞးကမ္မတဳ ပရေၚ်စၟဳစၟတ်ပရေၚ်ဒုၚ်လျိုၚ် တၚ်ဒုၚ်ကတိပါၚ် ဂကောံအလဵုအသဳ ပ္ဍဲစၠတ်ထဝ်မန် ဒးပတိုန်ဏာဂလာန်ဏံ သ္ဂးရ။
စပ်ကဵုပရေၚ်ဂလာန်ဝွံတုဲ ပ္ဍဲကဵုကောံဓရီုစၠတ်ထဝ် တွဵုရးမန် အလန်ဒုတိယ ကၠောန်လဝ်ဂိတုဂျောန်တေံ ညးစၞးမွဲတၠ သၟာန်လဝ် စပ်ကဵုပရေၚ်ရုဲစှ် သ္ကိုပ်ပရေၚ်အုပ်ဓုပ် အရာပ်၊ ကွာန်တံဂှ် အတိုၚ်ပရေၚ်သၞောဝ်ဥပဒေ စၟဳစၟတ်ရုဲစှ်အာရောၚ် နူကဵုအလဵုအသဳ သှ်ဆာဲကဵုလဝ်ကီုလေဝ် ပ္ဍဲကဵုအခိၚ်ကာလလဵု ဖန်ဇန် ရေၚ်တၠုၚ်ကၠောန်အာဂှ် သောၚ်ၚ်ကၠးကၠး ပရေၚ်ဟီုကဵုလဝ်ဟွံမွဲပုဟ် ညးပတိုန်ဂလာန် ဟီုရ။
တုဲပၠန် ပ္ဍဲကဵုကောံဓရီုစၠတ်ထဝ် အလန်တတိယ ကၠောန်လဝ် ပ္ဍဲဂိတုအဝ်ဂါတ်တေံဂှ်လေဝ် စပ်ကဵုပရေၚ်ကိစ္စ ရုဲစှ် သ္ကိုပ်ပရေၚ်အုပ်ဓုပ် အရာပ် ဂအုံကွာန်တံတုဲ ညးစၞးမွဲတၠ သၟာန်ဏာကီုလေဝ် သ္ကိုပ်ပရေၚ်အုပ်ဓုပ် ကေတ်လဝ်တာလျိုၚ် နူကဵုသၞာံ ၂၀၂၁ အကြာ ၂၀၂၆ တံ ညးဆက်ကဵုအာတာလျိုၚ်ထေက်တံဂှ် ဆက်ခါန်ကၞက် ကဵုအာတာလျိုၚ်ပၠန်ရောၚ် နူကဵုအလဵုအသဳ ဟီုလဝ်ရ။
တုဲပၠန် ပ္ဍဲကဵုဂအုံကွာန် အရာပ် ထေက်ကဵုဒးကလေၚ်ရုဲပတိုန် သ္ကိုပ်ပရေၚ်အုပ်ဓုပ်တံဂှ် အတိုၚ်သၞောဝ်ဥပဒေ ကလေၚ်ရုဲစှ်အာတၟိရောၚ် ဟီုလဝ်တုဲ ဒၞာဲပရေၚ်ဂီုကၠီုဟွံမွဲတံဂှ် ခါန်ကၞက်ကဵုအာတာလျိုၚ် အတိုၚ်ဥပဒေ အရာပ်ကွာန်တံကီု ဒၞာဲပရေၚ်ဂီုကၠီုခိုဟ်မ္ဂး အတိုၚ်သၞောဝ်ဥပဒေ အရာပ်ကွာန်တံဂှ် ကလေၚ်ရုဲစှ်ကဵုရောၚ် ကဵုလဝ်ကတိ ပ္ဍဲကဵုစၠတ်ထဝ်ရောၚ်။
ပြဟ်ဟ်ဏံ အတိုၚ်နူက်ုစၠတ်ထဝ် လ္ၚတ်ဂွံလဝ်မ္ဂး ပ္ဍဲကဵုတွဵုရးမန် ဒၞာဲဒေသ ပရေၚ်ဂီုကၠီုခိုဟ်မံၚ်တံ ကလေၚ်ရုဲစှ် သ္ကိုပ်ပရေၚ်အုပ်ဓုပ် မာန်တံမ္ဂး ကလေၚ်ရုဲစှ်ပတိုန်လဝ် သ္ကိုပ်ပရေၚ်အုပ်ဓုပ်တြေံ ကဵုယိုက်ဂၠေၚ်အာ တာလျိုၚ်ၜါအဆက်တံဂှ် ဂွံဆဵုလဝ် သ္ဂးရ။
ပရေၚ်ဂီုကၠီုဟွံမွဲတုဲ ရုဲစှ်ခါန်ကၞက်ပတိုန် သ္ကိုပ်ပရေၚ်အုပ်ဓုပ်ဟွံမာန်ဟီုဂှ် စှ်ေမံၚ်သဘာဝကီုလေဝ် သွက်ရဲဂကောံ ဟွံမိက်ကလေၚ်ရုဲစှ် သ္ကိုပ်ပရေၚ်အုပ်ဓုပ်တံဂှ် ညံၚ်ဟွံဂွံဒှ်အာ ပရေၚ်ထၜးစဟိုတ်မွဲမွဲသာ်ဂှ် ဒးစွံအာသတိရောၚ် ညးပတိုန်ဂလာန်ဂှ် ထံက်ထၜးရ။
ဟွံဆက်ရုဲစှ် သ္ကိုပ်ပရေၚ်အုပ်ဓုပ်တုဲ ဒၞာဲဂှ်တုဲဒၞာဲဂှ်ပၠန် ဆက်ခါန်ကၞက်အာဂွံမာန် ဗီုပြၚ်ပရေၚ်ထၜးဟိုတ်နာနာနွံတုဲ သ္ကိုပ်ပရေၚ်အုပ်ဓုပ်လ္ၚဵုလ္ၚဵုတံ ဟိုတ်နူကၠောန်ဒးအာ ပရေၚ်ဒစဵုဒစး ညးဍုၚ်ကွာန်တံတုဲ နူကဵုညးမွဲမွဲ ကလေၚ်ဟီုဂးထံက်ထ္ၜးကၠုၚ်မ္ဂး နူကဵုဗွိုၚ်မ္ၚးသၞောဝ် ကလေၚ်ပလန် ကၠောန်တိုန်မံၚ် ပရေၚ်ဆဆဵုကြာန်န်တံဂှ်လေဝ် ဂွံဆဵုညာတ်လဝ်ရောၚ် သ္ဂးရ။
ပြဟ်ဟ်ဏံ စပ်ကဵုသ္ကိုပ်ပရေၚ်အုပ်ဓုပ်တံမ္ဂး ပရေၚ်ကမၠောန်ရုဲစှ်ခါန်ကၞက် ထေက်ကဵုဒးကၠောန်တံဂှ် ကၠောန်အာမာန်ကီုလေဝ် ဟွံကၠောန်ကဵုမ္ဂး ပူဂဵုအစောန်စရာဲစိုတ်ဓါတ် သွက်ရေၚ်တၠုၚ်ပတုဲဖဵု ပရေၚ်ညးဍုၚ်ကွာန် ဂွံခိုဟ်စတံ ဟွံဂွံအခေါၚ်ယိုက်ဂၠေၚ်တုဲ သွက်ဍုၚ်ကွာန် ဒးဂိအာဒှ်မာန်ရောၚ် မာံအံၚ်ထူ ထံက်ထၜးလဝ်ရ။
အပ္ဍဲကဵုတွဵုရးမန် ၁၀ ပွိုၚ်ဍုၚ်ဂှ် နွံမံၚ် ၁၀၆ အရာပ်၊ ဂအုံကွာန် ၃၆၇ ဂှ် နွံမံၚ် ၁၁၄၃ ကွာန်တုဲ ပ္ဍဲကဵုပွိုၚ်ဍုၚ်ၜဳကလေၚ် ဂအုံကွာန် ဗဝ်နဝ်ခဳ မွဲဟေၚ် နူကဵု KNU မဟာဒပ် ၅ ထိၚ်လဝ်တုဲ ခါန်ကၞက်စုတ် သ္ကိုပ်ပရေၚ်အုပ်ဓုပ်ဟွံမာန်ဏီ ဒှ်မံၚ်ရောၚ် အလဵုအသဳပၞာန်ပတိုန်ထ္ၜးလဝ် ပ္ဍဲကဵုကောံဓရီုစၠတ်ထဝ် တွဵုရးမန်ရ။
ပရိုၚ်-သြၚ်လောန်တိုၚ်မ်
Photo – MOI