နေဗျဳဒဝ်၊ အံက်တဝ်ပါ ၆
အပ္ဍဲအရာကော်မံၚ် ပရေၚ်ယိုက်ဝန်ပၞာန်တံမ္ဂး ဟွံကော်ကေတ် မၞိဟ်လုပ်အဝေါၚ်တံ ဆဵုမၞိဟ်လ္တူဂၠံၚ်တံဂှ်ရ ထပက်အဇာကော်ကေတ်မံၚ်နွံတုဲ အပ္ဍဲကဵုပရေၚ်ကၠောန်လိက်ထံက်ဂလာန် ပတောအ်တံဂှ်တှ်ေ နူကဵုရဲဌာနဆေၚ်စပ်တံပါလုပ်မံၚ်ရောၚ် နူကဵုဝန်ဇၞော်ပရေၚ်ကေၚ်ကာအပ္ဍဲဍုၚ် ဟီုပတိတ်ကၠုၚ်ရ။
တုဲကၠုၚ်ဂိတုသိပ်တေမ်ပါ ၂၉ တေံ အဟိန်အာဆဵုဂဗလဝ် ညးတာလျိုၚ်ဌာန လဝက ဍုၚ်တံၚ်ဂျဳ တွဵုရးသေံဂှ်
စပ်ကဵုပရေၚ် သွက်ရဲယိုက်ဝန်ပၞာန်တံ ကၠောန်ကဵုမံၚ် တၞးကာတ်ကောန်ဍုၚ်ကဵု စရၚ်သ္ၚိရဂှ် ဝန်ဇၞော် လဝက ဥူမျေအ်ကျိုၚ် ဟီုလဝ်ရ။
ပြဟ်ဟ်ဏံ ပ္ဍဲကဵုကော်ကေတ်မံၚ် ပရေၚ်ယိုက်ဝန်ပၞာန် အကြာကွာန် အရာပ် သၟတ်လုပ်အဝေါၚ် အာယုက်အကြာ ၁၈ သၞာံကဵု ၃၅ တံဂှ် ဟွံကော်ကေတ်၊ လိၚ်ကေတ် ညးစိုပ်ကၠုၚ် နူကဵုဍုၚ်ကွာန်တၞဟ်ဟ်တံ ဂှ်တုဲ လ္ၚဵုတံဂှ် ရပ်ကေတ်လဝ်နွံ သ္ဂးရ။
သွက်ရဲတံဏံ နူကဵုဍေံတံဂှ် ကာတ်ကောန်ဍုၚ်တမ်မူလကဵု စရၚ်သ္ၚိကၟိန်အိန်ထံၚ်တံ နွံမံၚ်တုဲတုဲဂှ်လေဝ် ပၟိက်ဆန္ဒမိက်ဂွံယိုက်ဂၠေၚ်ဝန်ပၞာန်ဟွံမွဲတုဲ လိက်ထံက်ဂလာန်ဟွံမွဲပုဟ် ဟီုကၠုၚ်မ္ဂး စုတ်ကဵုလဝ် စရၚ်ကၟိန်အိန်ထံၚ် ဒၞာဲအရာပ်ကွာန်ကြပ်ပ်တံနွံမံၚ်ရောၚ် ဟီုရ။
နူကဵုဏံ ကလေၚ်ပတိတ်ကေတ် လိက်ထံက်ဂလာန် ကၠောန်ပတောအ်လဝ်တံတုဲ စကာကမ္မတဳ ၅ တၠ နူကဵုပွိုၚ်ဍုၚ်ဆေၚ်စပ်တံ ပံက်ကဵုလဝ်ဂှ်တုဲ ကောန်ၚာ်ဟွံပေၚ်အာယုက်တံဂှ်လေဝ် စုတ်ကဵုဏာလဝ် ပ္ဍဲကဵုပရေၚ်ယိုက်ဝန်ပၞာန် နွံမံၚ်ကီု ညးသ္ဂးရ။
ကမ္မတဳ ၅ တၠတံဟီုဂှ်တှ်ေ သွက်ကောန်ဍုၚ်ရုဲဆုဲပြံၚ်မံၚ်စံၚ် လိက်ထံက်ဂလာန်ဟွံမွဲ ဟိုတ်နူပရေၚ်ဘဲပၞာန်၊ ပရေၚ်ဘဲဒဏ်သဘာဝတံတုဲ သွက်ဂွံကလေၚ်ဂွံ လိက်ထံက်ဂလာန်မွဲမွဲမာန် ပံက်စွံကဵုလဝ်ကမ္မတဳဏံရောၚ်။
သွက်ပရေၚ်ယိုက်ပၞာန် ကၠောန်လဝ်ကဵု လိက်ထံက်ဂလာန်ပတောအ်တံဏံဂှ် ညးတာလျိုၚ် နူကဵုဌာနပရၚ်ကေၚ်ကာအပ္ဍဲဍုၚ်၊ ဌာနသ္ကိုပ်က္ဍိုက်ပ် အုပ်ဓုပ်နာနာ၊ လဝက၊ ကိုန်အစဳဇန်၊ ပရေၚ်ထတ်ယုက်ကဵု ဒပ်ဗၠာဲသၟိၚ်တံ ပါလုပ်မံၚ်ရဂှ် ဥူမျေအ်ကျိုၚ် ဟီုပတိတ်လဝ်ရ။
ကာတ်ကောန်ဍုၚ်လေဝ်ဟွံမွဲ လိက်စရၚ်ကၟိန်သ္ၚိဌာန်လေဝ်ဟွံမွဲ မွဲသာ် ဆဵုညာတ်မၞိဟ်လ္တူဂၠံၚ်တံဂှ် ကော်ကေတ်တုဲ ကၠောန်ကဵု လိက်ထံက်ဂလာန်ပတောအ် စုတ်ကဵုဏာပရေၚ်ယိုက်ဝန်ပၞာန်တံ လ္ပကၠောန်ညိဂှ် ညးအာတ်ဒုၚ်လဝ် မေတ္တာရောၚ်။
ပရေၚ်ယိုက်ဝန်ပၞာန် ညးဍုၚ်ကွာန်တံ ပံၚ်တောဲပါလုပ်ဟွံမွဲ အတိုၚ်စၞောန်ပ္ညုၚ်ဟေၚ် လၟိဟ်မၞိဟ်ညံၚ်ဂွံပေၚ်ရ ကၠောန်အာမံၚ်အတိုၚ်ဏံမ္ဂး ပ္ဍဲအဆံၚ်သၟဝ်ဏံ ပြဿနာဗီုဗီုတံဏံ ဆက်ဒှ်အာမံၚ်ရောၚ် ညးဒေသမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အတိုၚ်ရန်လဝ်လၟိဟ်မၞိဟ်ဂွံပေၚ် ပ္ဍဲအဆံၚ်သၟဝ်ဏံကၠောန်မံၚ်ဂှ်တှ် ပရေၚ်ကၠိုဟ်ခၠၚ်တံ ပရေၚ်ဟွံကၠိုဟ်ခၠၚ်တံ ပရေၚ်ပ္ညဳပ္ညပ် ဒၞာဲဍာံဍာံကီု ဟွံဍာံကီု သရောပ်စုတ်ကၠောန်အာလဝ်သီုဖအိုတ် ဒှ်မံၚ်ပြၚ်ဏံ။ အဓိက ကိစ္စပရေၚ်ကမၠောန် ညးဍုၚ်ကွာန်တံ စိုတ်ပံၚ်တောဲပါလုပ်ကၠောန်ဟွံသေၚ်တှ်ေ ပရေၚ်ပြဿနာတံ ဆက်ဒှ်အာမံၚ်ဟဂှ်ရ။ ဟီုမံၚ်ကၠောန်မံၚ်အတိုၚ်ဥပဒေကီုလေဝ် ပ္ဍဲဗလးတိဂှ် ဟွံဒှ်အတိုၚ်ဥပဒေပုဟ်။ အတိုၚ်ဥပဒေပၠန် သၟတ်တံ ဂွံလုပ်အာယိုက်ပရေၚ်ဝန်ပၞာန် ဆေင်စပ်ကဵုကိစ္စဏံတုဲ ညးမွဲမှဟွံမိက်အာပုဟ်။ အဆံၚ်သၟဝ်ဏံ ပရေၚ်ပြဿနာတံ ဆက်ဒှ်အာမံၚ်ဏောၚ်” သာ်ဝွံ သ္ဂးရ။
သွက်ရဲဂကောံဇြဟတ်ပၠန်ဂတး လုပ်မံၚ်ပေါဲဗတိုက်သၞောတ်တၠအဝဵုပၞာန်တံ ဒးဇီုကပိုက်မံၚ်ကဵု ပရေၚ်ပံၚ်တောဲဗတိုက် ဇြဟဟ်ပံၚ်ကောံဒပ်ပၞာန်ဗမာ ပရေၚ်တိုက်၊ ဍာ်၊ ကျာတံမ္ဂး နွံမံၚ်ပၟိက်ကဵု ဇြဟတ်ပရေၚ်ဗတိုက်ဗလးတိ ကွေံကွေံဏီ မဒှ်ရ။
သွက်ပရေၚ်ဏံ သ္ပဟိုတ်ပၠုပ်လဝ်လမျီု ပရေၚ်ယိုက်ဝန်ပၞာန်ဂှ်တုဲ ပ္ဍဲကဵုဒးကော်ကေတ် သွက်ဂွံယိုက်ဝန်ပၞာန်တံမ္ဂး ကော်ကေတ်မၞိဟ်တံကီု ကဵုဂၠံက်ကေတ်မာဲထပက်အဇာမၞိဟ် ကေုာံ ဒဵုကဵုတံၚ်ရပ်ကေတ်မၞိဟ်တံ ကတဵုဒှ်ကၠုၚ်လဝ် နာနာသာ်တံနွံရ။
ညံၚ်ဟွံဂွံပါလုပ်အာ ပ္ဍဲကဵုဒပ်ပၞာန်ဗမာ ကၠောန်မံၚ်ပရေၚ်လဝေၚ်ပၞာန်လပှ်မၞိဟ်တံတုဲ သၟတ်တံဂှ်လေဝ် နဲဂွံကဵုဂွံ တိတ်အာဍုၚ်မ္ၚး ပါဲတိတ်အာတိဍာ်ဗၠးၜးတံကီု သောၚ်ကလးကဵုသြန်တံ ထပက်အဇာမၞိဟ် စကာလဝ်နဲကဲနာနာသာ်ကီုရ။
ဟိုတ်ဂှ်တုဲ လၟိဟ်အတိုၚ်ရန်လဝ် ညံၚ်ဂွံပေၚ်အာ ဒပ်ပၞာန်၊ ဗၠာဲသၟိၚ်ကဵု ညးတာလျိုၚ် ပရေၚ်အုပ်ဓုပ် နွံမံၚ်သၟဝ်အလဵုအသဳပၞာန်တံ နကဵုဥပဒေကော်ကေတ်မၞိဟ်ကီု ရပ်ကေတ်မၞိဟ်တုဲ ထပက်အဇာ ပရေၚ်သွံရာန်မၞိဟ်တံ သၠဲလးတိုန် မဒှ်ရ။
အပ္ဍဲပေါဲဗက်ရပ်မၞိဟ်တံမ္ဂး စနူကဵုလ္တူဍုၚ် စဵုကဵုကွာန်ရး အလုံဍုၚ်မွဲ ကတဵုဒှ်မံၚ်တုဲ ပရေၚ်ယိုက်ဝန်ပၞာန်ဝွံ ဒှ်မံၚ်ဗွဝ်ဖျာပရေၚ်ပိုန်ဒြပ်ဂှ်တုဲ မၞိဟ်မွဲတၠမ္ဂး ပတန်လဝ်ၚုဟ်မး နူကဵုစှော်ကိုတ်ဒကေဝ် ပြၚ်စိုပ်အာ ဒဵုကဵုကၠမ်ကိုတ်တံ နွံမံၚ်ရောၚ် နူကဵု BNI – Myanmar Peace Monitor သ္ဂးရ။
တော်ဆလဝ်လၟိဟ်မၞိဟ်အောန်ဂၠိုၚ် အကြာအရာပ် ကွာန်၊ ပွိုၚ်ဍုၚ် ဆေၚ်စပ်တံ တန်တဴကဵု ပရေၚ်ဒေသၜိုဟ်သြိုဟ် အကာဲအရာဂၠံၚ်ဍာန်တံတုဲ ကော်မံၚ်ပရေၚ်ယိုက်ဝန်ပၞာန်ရောၚ် ဒုဝန်ဇၞော် ဌာနပရေၚ်စဵုဒၞာ ဟီုလဝ်ရ။
အပ္ဍဲကဵုဗလးတိမ္ဂး ပ္ဍဲသၞာံဏံ စနူဂိတုဂျာန်နဝါရဳ စိုပ်ဂိတုအဝ်ဂတ် အကြာ ၃၃ ပွိုၚ်ဍုၚ် ပ္ဍဲကဵုရးဒေသလ္ဂုၚ်ဂှ် သၟတ်ကောန်ညးဍုၚ်ကွာန် ၅၇၀ ပြၚ်တံ ဒးဒုၚ်ရပ်ဏာ ဟွံမွဲကဵုပရေၚ်ဓဝ်ဍာံတုဲ အပ္ဍဲဏံ မၞိဟ်ကဝက်ပြၚ်ၚ်တံဂှ် အတိုၚ်ဆဵုညာတ် ဗက်ခြော်ရပ်ကေတ်လဝ်ရောၚ် ဂွံတီလဝ် နူကဵုတၚ်နၚ် Yangon Scout Network တံရ။
အကာဲအရာသွက်ဂွံဒးဒုၚ်ရပ် ပရေၚ်ယိုက်ဝန်ပၞာန်ဒှ်ကၠုၚ်မ္ဂး သွက်ဂွံတိတ်အာတိဍာ်ပၠန်ဂတးဒှ်ဒှ် ဍုၚ်မ္ၚးဒှ်ဒှ် နူကဵုအလဵုအသဳ ညဳသၟဟ်ကောန်ဂကူ NUG ကဵုလဝ်ကသပ်ရောၚ်။
တုဲပၠန် သွက်ဂွံပါဲဓလေတ်အာ ပရေၚ်ရပ်ပဝ်တာတံမ္ဂး အခိၚ်ဗတမ် ညးမွဲဓဝ်တိတ်မ္ၚးအာကၠုၚ်တံဂှ် ၜိုတ်သ္ပမာန်ဒေါအ်ထောံတုဲ ပရေၚ်ရပ်ပကောံ ယိုက်ဝန်ပၞာန်အဓ္ဓမတံဂှ် ပါဲဟွံဗၠးကီုလဝ် ဂွံအခေါၚ်ခိုဟ်မ္ဂး ညံၚ်ဂွံဂြိပ်တိတ်အာဂှ်လေဝ် ဗတိုက်ဖအောဝ်လဝ် ကီုရ။
ပရိုၚ်-သြၚ်လောန်တိုၚ်မ်
Photo – MOI