မတ်မလီု၊ အံက်တဝ်ပါ ၇
အပ္ဍဲတွဵုရးမန် နူကဵုဌာနဂကောံပရေၚ်ဗဂဵုလဟဵု ဍုၚ်မတ်မလီု သွက်ဂွံပလေဝ်အာ ကွဳစက် ၁၀ မ ပရေၚ်ကိစ္စဇၞော်ဇၞော်ဂှ် အာတ်ပတိုန်လဝ် စရိတ်သြန် ၁၁၅၀ ကိုတ်နွံမံၚ်ရောၚ် ဂွံတီလဝ် နူကဵုတၚ်နၚ် လိက်ဒုၚ်စဳရေၚ်ပရေၚ်သြန် စၠတ်ထဝ် တွဵုရးမန်ရ။
သွက်ဘဏ္ဍာသၞာံ ၂၀၂၇-၂၀၂၈ စပ်ကဵုတော်ဆရန်လဝ် သြန်လုပ်တိတ် တွဵုရးမန်တုဲ နူကဵုကမ္မတဳသ္ၚဳဂၠိပ်ကိစ္စ ပရေၚ်စၟဳစၟတ်သြန် ညးဍုၚ်ကွာန်၊ ပရေၚ်ဘဏ္ဍာကိုန်အစဳဇန်ကေုာံ ပရေၚ်ပိုန်ဒြပ်တံဂှ် ပတိုန်လဝ် လိက်ဒုၚ်စဳရေၚ် စၠတ်ထဝ် တွဵုရးမန်ရဂှ် ချူထမံက်လဝ်ရ။
အတိုၚ်လိက်ဒုၚ်စဳရေၚ်မ္ဂး သွက်ဘဏ္ဍာသၞာံ ၂၀၂၇-၂၀၂၈ ဂှ် စရိတ်သုၚ်စောဲ ပရေၚ်ဓမ္မတာ ဂကောံဌာနပရေၚ်ဗဂဵုလဟဵု တွဵုရးမန် အာတ်ပတိုန်လဝ်သြန်ဂအုံ ဌာန ဂၠိုၚ်အိုတ် ၁၅ ဒသမ ၃၆၁ ဗဳလဳယာန် မဒှ်ရ။
အပ္ဍဲပရေၚ်ဏံဂှ်တှ်ေ စရိတ်သွက်ဂွံပလေဝ်အာ ကွဳစက် ၁၀ မ ပရေၚ်ကိစ္စဇၞော်ဇၞော် အာတ်ပတိုန်လဝ်သြန် ၁၁၅၀ ကိုတ်ဂှ် ဂၠိုၚ်လောန်အာတုဲ ညံၚ်ဂွံကလေၚ်စၟဳစၟတ်အာ နူကဵုကမ္မတဳ ပရေၚ်စၟဳစၟတ်သြန် ညးဍုၚ်ကွာန်တံ ထံက်ထၜးလဝ်ရ။
သွက်ဘဏ္ဍာသၞာံ ၂၀၂၇-၂၀၂၈ ဂှ် ဂကောံဗဂဵုလဟဵု တွဵုရးမန်၊ ဂကောံအလဵုအသဳ တွဵုရးမန်၊ ဂကောံအုပ်ဓုပ်နာနာ တွဵုရးမန်ကေုာံ ဌာနပရေၚ်ဍာန်ဂၠံၚ်တံဂှ် ဒှ်ဌာန အာတ်မိက်လဝ်သြန်ဂအုံ ဂၠိုၚ်အိုတ်ရောၚ် ဂွံတီရ။
ဂကောံဗဂဵုလဟဵု တွဵုရးမန် နွံသၟဝ်တဲဒပ်ပၞာန်ဂှ် သွက်ပရေၚ်ဘဏ္ဍာ သၞာံ ၂၀၂၆- ၂၀၂၇ တေံ ဒှ်ဌာန ဂွံလဝ်အခေါၚ်သုၚ်စောဲ သြန်ဂအုံဗာတ်ဂျက် ဂၠိုၚ်အိုတ်ကီုလေဝ် ပရေၚ်ဖန်ဖက်ရေၚ်တၠုၚ် ပရေၚ်ကမၠောန် တၚ်ယုတ်ဒေက်ဂၠိုၚ်လောန်တုဲ ညးဍုၚ်ကွာန်တံ ဟီုဂး ပါ်ပါဲမံၚ်နွံရ။
နူကဵုဌာနဂကောံပရေၚ်ဗဂဵုလဟဵု သၟဝ်တဲအလဵုအသဳပၞာန်ဂှ် ပါမောက္ခတြေံ တက္ကသိုလ်မတ်မလီု ဒံက်တာ အံၚ်မျာတ်ကျဝ်သိၚ် ကေတ်လဝ်တာလျိုၚ် ဝန်ဇၞော်တုဲ သ္ကိုပ်စၞောန်ပ္ညုၚ် အာယုက်ဂၠိုၚ် ဥူတေန်ကိုကို က္ဍိုပ်လဝ်က္ဍိုပ်ရ။
ပရိုၚ်-သြၚ်လောန်တိုၚ်မ်
Photo – CJ