ကွာလာလမ်ပူ၊ အံက်တဝ်ပါ ၇
ဟိုတ်နူပရေၚ်ပၞာန်အပ္ဍဲဍုၚ် ညးတၠဒဒိုက် ဂြိပ်စိုပ်ကၠုၚ်လဝ်တံဂှ် ကလေၚ်ပလံၚ်ဖျဴဏာလဝ် ဍုၚ်မိတိမညးတံ ကောန်ဍုၚ်ဗမာ ၜိုတ် ၁၀၀၀၀ နွံမံၚ်ရောၚ် သ္ကိုပ်ဝန်ဇၞော် အာန်ဝါ အေဗရာဟေၚ် ဟီုလဝ် ပ္ဍဲအံက်တဝ်ပါ ၆ ဂှ်ရ။
ဟိုတ်နူပရေၚ်သီအဝဵု သၞာံ ၂၀၂၁ တုဲ ပၞာန်အပ္ဍဲဍုၚ် ဒှ်ကၠုၚ်လဝ်တုဲဗွဲကြဴ ဟိုတ်နူအကာဲအရာပရေၚ်ရုသံၚ် ပ္ဍဲရးနိဂီုဍုၚ်ဗမာတုဲ လၟိဟ်မၞိဟ်ကဵုလ္ၚဳတံဗွဲမဂၠိုၚ် တတ်ကၠောံပယျဵုတုဲ စိုပ်အာဍုၚ်ဇိုၚ်ဝုတ်ဒိုဟ်တံရ။
နူကဵုဍုၚ်မလေဝ်ယှာ ဒုၚ်ကေတ်လဝ်တဲ ညးတၠဒဒိုက်ကောန်ဍုၚ်ဗမာ ၁၉၃၀၀၀ ရောၚ် ပ္ဍဲကဵုတၚ်နၚ် ကုလသမဂ္ဂတံ ချူလဝ်ရ။
ဟိုတ်နူဒးဒုၚ်လဝ်တဲ ဗီုတံဏံဂှ် ပရေၚ်စိုတ်လီုတံ ဂၠိုၚ်တိုန်တုဲ ဟိုတ်နူညးတၠဒဒိုက်တံဂှ် လျိုၚ်ပရေၚ်ဘဏ္ဍာတံ ဍိုက်ဇြိုၚ်တိုန်တုဲ ဒှ်ကၠုၚ် အန္တရာဲပရေၚ်ဂီုကၠီုတံနွံမံၚ် နူမလေဝ်ယှာ ဟီုရ။
လိက်ကသုက် တင်တုပ်စိုတ် စပ်ကဵုတၠဒဒိုက် ကုလသမဂ္ဂဂှ် နူကဵုမလေဝ်ယှာ ထပက်လဝ်စၟတ်တဲဟွံမွဲတုဲ လ္တူညးအာတ်မိက် ပရေၚ်စ္ၜုဲစ္ၜော်တံမ္ဂး သ္ပလဝ် ရဲဆုဲပြံၚ်ဟွံလုပ်သၞောဝ်တံ မဒှ်ရ။
ရဲဒးပလံၚ်ဖျဴလ္ၚဵုတံဂှ် အတိုၚ်အလဵုအသဳဗမာစဳဇန်ကဵုလဝ် ပတိုန်ကဵုဏာၜၚ်ကျာတံတုဲ မၞိဟ်ၜိုတ် ၁၄၀၀ တံဂှ် တုဲကၠုၚ်သတ္တဟဏံ ကလေၚ်ပလံၚ်ဖျဴဏာ ဂၠံၚ်ဍာ်ရဂှ် သ္ကိုပ်ဝန်ဇၞော် အာန်ဝါ ဟီုလဝ်ပ္ဍဲကဵုစၠတ်ထဝ်ရ။
ညးဒးပလံၚ်ဖျဴတံ ဒှ်ပရေၚ်အန္တရာဲဘဲနွံမာန်တုဲ ပရေၚ်ဂွိၚ်ဂွါဲရဲဂကောံအခေါၚ်အရာမၞိဟ်တံကဵု အမာတ်စၠတ်ထဝ်လ္ၚဵုတံဂှ် အာန်ဝါ သ္ပစၟတ်ကီုလေဝ် အန္တရာဲသွက်ရဲတၠဒဒိုက်ကလေၚ်စိုပ်ကၠုၚ်တံ ဟွံမွဲပုဟ်ဂှ် ညးတာလျိုၚ်ဗမာတံ ကဵုလဝ်ကတိရောၚ် ဟီုရ။
အတိုၚ်ညးတံသ္ပလဝ်ပရေၚ်စၟတ်သမ္တီ ကောန်ဍုၚ်ဗမာတံဂှ် ညးတံ ဒးကလေၚ်ကော်ဖျဴဏာရောၚ် အာန်ဝါ ဟီုလဝ်ကဵု ဍုၚ်ဗမာရ။
နကဵုပရေၚ်ဒုတိယမ္ဂး ပရေၚ်ရပ်ဓရတ်ဍဵုဍိုက်တံ ပရေၚ်ဖံက်ပကဝ်အခေါၚ်မၞိဟ်တံ ညံၚ်ဟွံဂွံဒှ်အာ ညးတံသွက်ဂွံဆက်ဆောံအာကောန်ဍုၚ်ညးတံညဳညဳရောၚ် ညးထပ်ဟီုဗပေၚ်လဝ်ရ။
ခြာဟွံလံ က္ဍိုပ်သ္ကိုပ်ဗမာ သမ္မတ မေန်အံၚ်လှိုၚ် စိုပ်ကၠုၚ်ဍုၚ်ကွာလာလမ်ပူမ္ဂး ညးဆက်သဳကၠဳအာ ပရေၚ်ကိစ္စဏံရောၚ် အာန်ဝါ ဟီုဂးလဝ်ရ။
Ref:Bernama