ဘာအၚ်၊ အံက်တဝ်ပါ ၈
အခိၚ်ဒပ်ပၞာန်ဗမာ သီလဝ်အဝဵု အကြာကာလ ပွိုၚ် ၅ သၞာံဏံ ဟိုတ်နူဒပ်ပၞာန်ဗမာ ဗတိုက်လဝ်ကဵုပၞာန်ကျာကေုာံ ပန်လဝ်ကဵုလွဟ်ဇၞော်ဂှ်ရ ပ္ဍဲဒေသပရေၚ်အုပ်ဓုပ် KNU ဘာဗတောန်လိက် ၜိုတ် ၆၀ မ ဒးဒုၚ်ပန်ပလီုလဝ်တုဲ ကောန်ကွးဘာ ၄၀ ပြၚ် လမျီုဒးဆောံလေၚ်အာနွံရဂှ် နူကဵုဗဟဵု KNU လလောၚ်တြး လဝ်ရ။
စနူကဵုအခိၚ်ဒပ်ပၞာန်ဗမာ သီအဝဵုသၞာံ ၂၀၂၁ တေံ အကြာသၞာံ ၂၀၂၆ ဏံ ဟိုတ်နူကဵု ဗတိုက်လဝ်ကဵုပၞာန်ကျာကေုာံ ပန်လဝ်ကဵုလွဟ်ဇၞော် တံဂှ် ဘာဗတောန်လိက် လီုအာ ၅၉ နွံတုဲ ကောန်ကွးဘာ ၄၁ ချိုတ်အာ၊ ဒးဝပ် ၉၀ တၠ နွံလဝ်ဂှ် နူကဵုဗဟဵု KNU သ္ဂးရ။
ဂကောံပၞာန်ပကီုပရာတ် မေန်အံၚ်လှိုၚ်တံ ဖံက်ပကဝ်လဝ် လိက်ကသုက် ဂျဳနဳဗာကန်ဗၚ်ယှေန် သၟးဟွံက ပလီုပလိုက်မံၚ် ပရေၚ်ပညာဂကူကရေၚ်တံ ရန်တၟံနွံနွံရောၚ် ပ္ဍဲလိက်လလောၚ်တြး သ္ဂးလဝ်ရ။
တုဲကၠုၚ် ဂိတုသိပ်တေမ်ပါ ၁၉ တေံ အခိၚ်ဗတမ် ၁၁ နာဍဳဂှ် ၜၚ်ကျာဂျက်ဖိုက်တာပၞာန်ဗမာတံ ကြဳဗုမ်ဗတိုက်လဝ် ဂအုံကွာန် ကျတံၚ်သိက် ပွိုၚ်ဍုၚ်ၜဳကလေၚ် ဒၞာဲ KNU ခရိုၚ်သဓီုတုဲ ဘာဗတောန်လိက် ၅ မကဵု သ္ၚိဌာန်ညးဍုၚ်ကွာန်တံ ၃၈ မ လီုလာ် အာလဝ်ရ။
အပ္ဍဲကဵု လိက်ကသုက် ဂျဳနဳဗာကန်ဗၚ်ယှေန် အဓိက ၄ တၚ်ဂှ် သၞာံ ၁၉၉၂ ဂိတုအဝ်ဂတ် ၂၅ တေံ နူကဵုရးနိဂီုဍုၚ်ဗမာ ထပက်လဝ် စၟတ်တဲကီုလေဝ် ဒပ်ပၞာန်ဗမာတံဂှ် စွံပွန်ကဵု ဘာဗတောန်လိက် စမြိုၚ်ဌာန်ဒတန်သာသနာတံကဵု ဒၞာဲသ္ၚိဌာန်ညးဍုၚ်ကွာန်တံတုဲ ဖံက်ပကဝ်မံၚ် သၞောဝ်ရောၚ် နူကဵုဗဟဵု သ္ဂးရ။
ဗွဲတၟေၚ် စနူသၞာံ ၂၀၂၁ မေန်အံၚ်လှိုၚ်သီကေတ်အဝဵုတုဲ ဒပ်ပၞာန်ဗမာတံ စွံပွန်ကဵု ဒၞာဲညးဍုၚ်ကွာန်မံၚ်စံၚ်ဂှ်ကီု ဌာန်ဒတန်သာသနာ၊ ရုၚ်ဂဥုဲ ဗဒမ်ဂဥုဲတံ အဆက်က်ရောၚ် သ္ဂးလဝ်ရ။
သွက်ညးဍုၚ်ကွာန်နွံမံၚ် အကြာဒေသကဝ်တူလေတံ ပရေၚ်ပညာ ညံၚ်ဂွံတောတက်ဂှ် နူကဵု ဗော်သွးကရေၚ် KNU ဂစာန်ကၠောန်လဝ် ဆက်က်တုဲ ပ္ဍဲကဵုဂိတုသိပ်တေမ်ပါ ၂၁ တုဲကၠုၚ်ဏံ ဒက်ပတန်ပံက်လဝ် ကံၚ်သဳပရေၚ်ပညာအဆံၚ်သၠုၚ်ကဝ်တူလေ မဒှ်ရ။
ပရိုၚ်-သြၚ်လောန်တိုၚ်မ်
Photo – KNDF