မတ်မလီု ၊ အံက်တဝ်ပါ ၈
ဗြဲမုတ်သုံ နူဒိုဟ်နေရတိ ကလေၚ်ဆုတ်တိတ်အာ နူကဵုဍုၚ်ဗမာတုဲ ကမၠောန်ပတိတ်ဓါတ်လလဳ ဟွံရုံဂပ်ကီု ပေါဲဗတိုက်နာနာတံကဵု ကပေါတ်ၚုဟ်မးဍၚ်မံၚ် ပ္ဍဲကဵုဍုၚ်ဏံ သွက်ဂွံတတ်အာ ဘဲဒဏ် ဥတုရာသဳ အေလ်နဳညိုမာန်ဂှ် ဒှ်မံၚ်တၚ်ကော်ဆော ဗွဲမဂၠိုၚ်ရ။
အတိုၚ်တၚ်နၚ် နူကဵုဌာနပရေၚ်ဗြဲကျာ အလဵုအသဳပၞာန် ပတိတ်လဝ် ဂှ်မ္ဂး နူကဵုအလုံဍုၚ်ဗမာမွဲ ဗြဲမုတ်သုံ ဒိုဟ်နေရတိ ကလေၚ်ဆုတ်တိတ်အာလဝ်တုဲ အခိၚ်ပယျာံတ္ၚဲ ဓါတ်ဂမ္တဴ သၠုၚ်တိုန်မာန်ရောၚ် တော်ဆလဝ်ဂှ် ဂွံဆဵုကေတ်ရ။
ဗြဲမုတ်သုံ နူဒိုဟ်နေရတိ စနူဂိတုသိပ်တေမ်ပါ ၁၅ နူကဵုဒေသ သၟဝ်ကျာတေံ ပ္ဍဲသိပ်တေမ်ပါ ၂၅ ဂှ် နူကဵုဒေသအဒေါဝ်၊ ပ္ဍဲအံက်တဝ်ပါ ၂ ဂှ် နူကဵုဒေသဧရာဝတဳ အံက်တဝ်ပါ ၂ ဂှ် ကလေၚ်ဆုတ်တိတ်အာ နူကဵုဍုၚ်ဗမာ မဒှ်ရ။
ဟိုတ်ဂှ်ရ အတိုၚ်တၚ်နၚ် ဌာနပရေၚ်ဗြဲကျာမ္ဂး သွက်အံက်တဝ်ပါ ၇ ဂှ် ပ္ဍဲကဵုမာန္တလေဝ်၊ မဂွေ၊ ဘာသီ၊ လွိုၚ်ကဝ် ကဵု ဘာအၚ်တံ ဓါတ်ဂမ္တဴ ဒဵုကဵု ၃၆ ဒဳကရဳသေလ်သဳယာတ် သၠုၚ်တိုန်မာန်တုဲ ဒဵုကဵုအံက်တဝ်ပါ ၁၀ ဂှ် ဓါတ်ဂမ္တဴတံ ဆက်သၠုၚ်တိုန်မာန်ရောၚ် ကဵုလဝ်သတိရ။
အပ္ဍဲတွဵုရးမန် မဟာဍုၚ်ဇၞော်မတ်မလီု ပ္ဍဲအံက်တဝ်ပါ ၆ ဂှ် ဓါတ်ဂမ္တဴဒဵုကဵု ၃၅ ဒဳကရဳသေလ်သဳယာတ် စိုပ်အာလဝ်ရောၚ် ဂွံတီလဝ်တၚ်နၚ် နူကဵုဌာနပရေၚ်ဗြဲကျာတံရ။
လ္တူအသိၚ်ဓါတ်ဂမ္တဴ သၠုၚ်တိုန်အာဏံ သွက်သၟာကမၠောန်တံ ဂွံဂွံပရေၚ်စဵုဒၞာမာန် စနူအခိၚ်လၟုဟ်ဒစးဒုၚ်တုဲ ဒးဖန်ဇန်လဝ်ရောၚ် တၠကမၠောန်ဖဴၜဵုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“စပ်ကဵုပရေၚ်ထတ်ယုက်မၞိဟ်တံတုဲ ဒၞာဲသၞိၚ်ခိုဟ်ဟ် ဂွံဂွံအာ စနူလၟုဟ် ဒစးဒုၚ် ဒးဖန်ဖက်လဝ်။ ခံက်ၜဵုဟီုကီုလေဝ် ဒၞာဲသၟာကမၠောန်တံ ဂွံဇူဒီု ပိုဲတံ ဒးဖန်ဖက်လဝ်ဏောၚ်။ ပရေၚ်ဇွောံမတံ ၜိုတ်သ္ပမာန် ပိုဲတံ ပကောံစွံကဵုလဝ်ဏောၚ်” သာ်ဝွံ သ္ဂးရ။
ဟိုတ်နူ ဘဲဒဏ်အေလ်နဳညိုဂှ် ကှ်ကတဴကၠုၚ်ဂှ်ကီု၊ ဓါတ်ဍာ်သၟဝ်တိတံ ကှ်ကေဲအာကီု အပ္ဍဲပွိုၚ်ဍုၚ်တၞဟ်ဟ်တံ စနူအခိၚ်လၟုဟ် ဓါတ်ဂမ္တဴ သၠုၚ်မံၚ်ဂှ် ဂွံဆဵုကေတ်မံၚ်ရောၚ် သမ္မတ ခါန်ကၞက်လဝ်ကေတ်တ် ဥူမေန်အံၚ်လှိုၚ် သ္ဂးရ။
သွက်ဂွံတတ်ကၠောံအာ ဘဲဒဏ်အေလ်နဳညိုတံမာန် အရာထေက်ကဵု ဒစးဒုၚ်ဒးပလေဝ်စလဝ်တံ ဖန်လဝ်အိုတ်ညိဂှ် ပ္ဍဲကဵုကောံဓရီု အံက်တဝ်ပါ ၅ ကၠောန်လဝ် ပ္ဍဲနေဗျဳဒဝ်ဂှ် ညးဟီုလဝ်ရောၚ်။
သွက်ဂွံထိၚ်ဒဝ်သုၚ်စောဲအာ ဍာ်သုၚ် ဍာ်တဵုလွဳတံ ပံက်အာဗဒိုပ်ပါဲဒၞာဲ ဓါတ်ဂမ္တဴကီု၊ သွက်ဂွံမၚ်မွဲထိၚ်ကြာပ်အာ ဍာ်ကၟိန်၊ စၞစဇွောံမ စဍာ်ဇမၠိၚ်ဂွံတံ ညံၚ်ဂွံပကောံစွံလဝ် မဒှ်ရ။
တုဲပၠန် အတိုၚ်ရန်တၟံလဝ် ခၞေဝ်ကေဝ်အခိၚ်ကၞောတ်ဗြဲဏံ ညံၚ်ဂွံတဵုလဝ်၊ ကမၠောန်ဝဳဝတ်တံ ညံၚ်ဂွံပြုပြေၚ်စဳရေၚ် ပလေဝ်စ လဝ်ဂှ် ဥူမေန်အံၚ်လှိုၚ် ကဵုလဝ်စၞောန်ပ္ညုၚ်ကဵု ဝန်ဇၞော်တံကဵု သ္ကိုပ်ဝန်ဇၞော်ရးဒေသကဵု တွဵုရးတံရ။
ၚုဟ်မးကပေါတ်စၞစသုၚ်နာနာသာ် ၚုဟ်ဍၚ်မံၚ်တုဲ ညးသြန်နွံနွံတံ သွက်ဂွံပကောံစွံလဝ်ဟီုဂှ် ပြဿနာဟွံမွဲကီုလေဝ် သွက်မၞိဟ်အဆံၚ်သ္ဇိုၚ်တံဂှ်တှ်ေ ဟွံပြေပြံၚ်မာန်ပုဟ် ညးဍုၚ်ကွာန် မွဲတၠ ဟီုရ။
သွက်ရဲကၠောန်မွဲတ္ၚဲ စမွဲတ္ၚဲတံ ဂွံပကောံစွံအာ ကပေါတ်စၞစသုၚ် ဇွောံမတံဟီုဂှ် ဒှ်ဟွံမာန်ပုဟ် ညးဍုၚ်ကွာန်မွဲတၠပၠန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပိုဲညးဍုၚ်ကွာန်တံ ပကောံစွံအာဟွံမာန်ပုဟ်။ မိက်ဂွံပကောံကီုလေဝ် သွက်ရဲကၠောန်အာမွဲတ္ၚဲ စမွဲတ္ၚဲတံ ဗီုလဵုဍေံတံ ဂွံစအာရော။ အာမံၚ်အတိုၚ်ဏံ ဟဂှ်ရ သွက်ရဲကၠောန်စအာမွဲမွဲတံ။ ရဲသြန်နွံတံရ ပကောံအာ(စၞစဇွောံမ) မာန်ဏောၚ်။ ဆဂး ကိစ္စ (ဥတုရာသဳအေလ်နဳညို) တံ သွက်ဂွံပကောံစွံအာ ဇွောံမစၞစဟီုဂှ် မုလေဝ်ဟွံဆေၚ်ပုဟ် အဲညာတ်” သာ်ဝွံ သ္ဂးရ။
သွက်ဂွံပကောံစွံလဝ် ဇွောံမစၞစ ဥူမေန်အံၚ်လှိုၚ် ကဵုလဝ်စၞောန် ကီုလေဝ် သွက်ၚုဟ်ကပေါတ်ဂွံစှ်ေအာ၊ သွက်ဂွံထံက်ပံၚ်ကဵု ညးဍုၚ်ကွာန်တံ သွက်ကမၠောန်တဵုလွဳ ကမၠောန်ဝဳဝတ်တံဂှ် မုလေဝ်စဳဇန် ဖန်ဖက်ကဵုလဝ် ဟွံဂွံဆဵုဏီပုဟ်။
မွဲလပါ်ပၠန် ဟိုတ်နူအသိၚ်ဥတုရာသဳအေလ်နဳညိုဇၞော်ဇၞော်ဂှ် ဓါတ်ဂမ္တဴသၠုၚ်အာတုဲ ဓါတ်လလဳဟွံရုံဂပ်ဒှ်အာဂှ်တှ်ေ ဒးပါ်အခိၚ်တုဲ ပရအ်ကဵုအာ ဓါတ်လလဳတံရ။
ဟိုတ်ဂှ်ရ ရဲသ္ပပဓာန်ကဵု ပၟတ်ဓါတ်လလဳတုဲ တောမ်တပ်မံၚ် ပုၚ်သွတံကီု ကိစ္စသ္ၚိဌာန်ကီု စနူကဵုကမၠောန် အဇာဍောတ် အဇာအဒေါဝ်တံ ပရေၚ်ဇီုကပိုက် ဒှ်တိုန်ကၠုၚ် သွက်ပရေၚ်ပိုန်ဒြပ် မၞိဟ်တံမာန်ရောၚ် ညးဍုၚ်ကွာန်တံ ဟီုပတိတ်မံၚ်ယျ။
သွက်ဂွံစဵုဒၞာအာ အဝဵုမေန်အံၚ်လှိုၚ်ဂှ်ဟေၚ် ကဵုဖျူန် ကၠောန်မံၚ်အိုတ်တုဲ သွက်ညးဍုၚ်ကွာန်တံဂှ် မုလေဝ် ဟွံကေတ်ကဵု တာလျိုၚ်ပုဟ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ပါ်ပါဲလဝ်ရ။
“သွက်ညးဍုၚ်ကွာန်တံဂှ် လလောၚ်ပတိတ်လဝ်ကဵု ဗီုအကာဲအရာဥတုရာသဳ ဒှ်ကၠုၚ်မာန်တံ။ ဟိုတ်ဂှ်ရ ဇကုညးကဵုညး ကၠောန်လဝ်ပရေၚ်စဵုဒၞာကေတ်တ်ညိ ဟီုလဝ်ဗီုဏံဏောၚ်။ ဟိုတ်ဂှ်တုဲ ပရေၚ်မေန်အံၚ်လှိုၚ် ကၠောန်မံၚ်ဂှ် အဝဵုအဲရ အဲစဵုဒၞာအာဏောၚ်၊ ညးဍုၚ်ကွာန်တံ ဟွံမိက်ချိုတ်တှ်ေ လမျီုဇကုတံ ဇကုတံစဵုဒၞာအာကေတ်တ်ညိ အလဵုအသဳဟွံကေတ်တာလျိုၚ် ကၠောန်လဝ်ဗီုဏံရ” သာ်ဝွံ သ္ဂးရ။
အတိုၚ်တၠပညာ ပရေၚ်ဗြဲကျာ ဥတုရာသဳဂၠးကဝ်တံ ဟီုလဝ်မ္ဂး ဟိုတ်နူပရောဒဒှ် သူပါအေလ်နဳညို ဇၞော်ကဵုဇြဟတ်ဒှ်တုဲ ဘဲအန္တရာဲ ဓါတ်ဂမ္တဴသၠုၚ်အာဂှ် မၞိဟ်လၟိဟ်ကဵုကိုတ်တံ ချိုတ်မာန်ရောၚ် တော်ဆလဝ်ရ။
ပ္ဍဲကဵုဍုၚ်ဗမာ သၞာံဏံ စနူကဵုဂိတုနဝ်ဝေမ်ပါကဵု ဒဳဇြေမ်ပါဂှ် ဒးဒုၚ်အာဘဲဂမ္တဴ ကၠးကၠးမးမးတံ ဒဵုကဵုဂိတု ဖေဖဝ်ဝါရဳ သၞာံ ၂၀၂၇ တေံ ပရေၚ်ဇီုကပိုက် အေလ်နဳညို ဆက်နွံအာရောၚ် သ္ၚဳဂၠိပ်လဝ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media