ကအ်ကြိက်၊ အံက်တဝ်ပါ ၉
တွဵုရးကရေၚ် ပ္ဍဲကအ်ကြိက်သၟဝ်ကျာ ကွာန်ထဳဖိုဝ်သာန်ဂှ် အကြာဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပၞာန်ဗမာတံ ပေါဲဗတိုက်သ္ကာတ်မြဟ်မံၚ်တုဲ နူကဵုဒပ်ပၞာန်ဗမာ ပန်ကဵုလွဟ်ဇၞော်၊ ကြဳဖျေံဗုၚ်ကဵုၜၚ်ကျာ ကၠောန်မံၚ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒၞာဲတိဍာ် ဗော်သွးကရေၚ် KNU မဟာဒပ် ၇ အပ္ဍဲကအ်ကြိက် သၟဝ်ကျာ ပွိုၚ်ဍုၚ်နဗူ၊ ပ္ဍဲကွာန် ကွာန်ထဳဖိုဝ်သာန်ဂှ် အကြာဒပ် KNLA ကဵု ဒပ်ပၞာန်ဗမာတံ ပေါဲဗတိုက်သ္ကာတ်မြဟ်မံၚ် အိုတ်အစောန်ရောၚ်။
ပေါဲဗတိုက်ဏံ ပ္ဍဲဂိတုအံက်တဝ်ပါ ၇ အခိၚ်သဝ်တ္ၚဲကဵု အံက်တဝ်ပါ ၈ အခိၚ်နူဂယးတေံ အကြာၜါလပါ် ပေါဲဗတိုက်သ္ကာတ်မြဟ်မံၚ်တုဲ နူကဵုဒပ်ပၞာန်ဗမာ ပန်မံၚ်ကဵုလွဟ်ဇၞော်၊ ကြဳဖျေံဗုၚ်ၜၚ်ကျာတံ အဆက်က်ရ။
အကြာပေါဲဗတိုက် နူကဵုတမ်ဒပ် ခလရ ၉၇ ဍုၚ်ကအ်ကြိက်ကီု စကခ ၁၂ ကီု ထဍာၚ်ပန်စုတ်မံၚ်လွဟ်ဇၞော် ပ္ဍဲကွာန် ကွာန်ထဳဖိုဝ်သာန် သၟဝ်ကျာကအ်ကြိက်ဂှ်သၟးဟွံက နကဵုၜၚ်ကျာပၞာန် Y-12 တံလေဝ် ကြဳဗုမ်ဗတိုက်တုဲ သ္ၚိဌာန်ညးဍုၚ်ကွာန်လ္ၚဵုတံ တူအာပၟတ်ဂှ် ညးဒေသတံ သ္ဂးရ။
တုဲပၠန် အကြာတ္ၚဲတံဏံပၠန် နူကဵုဒပ်ပၞာန်ဖျေံလဝ်ဒပ် ဒၞာဲကွာန်ကအ်ဖာန်ဂှ် ဗလးဒရုၚ်တုဲဗက်ကြဳဗုမ် အပ္ဍဲကွာန်မျပတိုၚ်တုဲ ဒးအာသ္ၚိဌာန်ညးဍုၚ်ကွာန်တံနွံမံၚ်ရောၚ် ညးဒေသတံ သ္ဂးရ။
ဒပ်ပၞာန်ဗမာတံ ၐိုန်ရကလေၚ်ထိၚ်ချုက်ဂွံလဝ် ဍုၚ်ကအ်ကြိက်ကီုလေဝ် ဒၞာဲ KNU မဟာဒပ် ၆ ဒေသ ကအ်ကြိက်သၠုၚ်ကျာကဵု ဒၞာဲမဟာဒပ် ၇ KNU ဒေသကအ်ကြိက်သၟဝ်ကျာကီု ဂၠံၚ်ကအ်ကြိက်-လှာဒကှ်ဂှ်လေဝ် ထိၚ်ချုက်ဟွံမာန်ဏီတုဲ ပန်စုတ်မံၚ်လွဟ်ဇၞော် အပ္ဍဲဒေသတံဏံကီု သီုကဵုကြဳဖျေံမံၚ်ဗုမ်တံ နွံရ။
တွဵုရးကရေၚ် ပ္ဍဲပွိုၚ်ဍုၚ်ကအ်ကြိက်သၟးဟွံက အကြာပွိုၚ်ဍုၚ်ဗြဝတဳ ကရပ်ဒေသကျံက်ခက် ကွာန်ဗတဳဗု ဒၞာဲတိဍာ် KNU မဟာဒပ် ၆ ဂှ်လေဝ် နူကဵုဒပ်ပၞာန်ဗမာ ကြဳဖျေံဗုမ်ကီု ပန်မံၚ်ကဵုလွဟ်ဇၞော်တံကၠောန်မံၚ်တုဲ ပေါဲဗတိုက်အကြာၜါလပါ်တံ သ္ကာတ်မြဟ်မံၚ်အိုတ်စောန်ဂှ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media