သဓီု၊ အံက်တဝ်ပါ ၉
တွဵုရးမန် ဍုၚ်သဓီု အရာပ်လုက်အေၚ် ကရပ်သၞေဟ်ၜၚ်ကျာ ပ္ဍဲကဵုဆေၚ်စသုၚ် IC ဂှ် ဟိုတ်နူဓါတ်ဂမ္တဴသၠုၚ်တုဲ ညးဗြဴဍောတ်တ်မွဲတၠ ဒေါမ်စှ်ေတုဲ ချိုတ်အာဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုအံက်တဝ်ပါ ၇ အခိၚ်နူဂယးၜိုတ် ၁၁ နာဍဳပြၚ်ၚ်ဂှ် ရဲမံၚ်ကွာန် ပဝ်တဝ်မူ ဂၠံၚ်ကျာ် မကျဳပျာဧ အာယုက် ၂၈ သၞာံ အဟိန်တိုန်လ္တူကွဳလိုန်ဓါတ်ဂှ် ဟိုတ်နူဓါတ်ဂမ္တဴသၠုၚ်တုဲ ဒေါမ်စှ်ေ ချိုတ်အာရ။
အတိုၚ်ညးဒေသတံဟီုလဴမ္ဂး မကျဳပျာဧ တိတ်ကၠုၚ်နူဖျာတုဲ အဟိန်တိုန်လ္တူကွဳလိုန်ဓါတ်ဂှ် ဗၜူတုဲ ဒေါမ်စှ်ေအာရောၚ် ဂွံတီရ။
တုဲပၠန် ညးဒေသတံ အာပလံၚ်ရုၚ်ဂဥုဲ ညးဍုၚ်ကွာန်သဓီု နကဵုကွဳစက်အိုဝ်ဝေ စိုပ်ရုၚ်ဂဥုဲဂှ်တှ်ေ ချိုတ်အာဟဂှ်ရောၚ် သ္ဂးရ။
အတိုၚ်ဌာနပရေၚ်ဗြဲကျာ လလောၚ်ပတိတ်လဝ် အံက်တဝ်ပါ ၇ ဂှ်မ္ဂး ပ္ဍဲကဵုတွဵုရးမန် ဓါတ်ဂမ္တဴစိုပ်မံၚ် ၃၆ ဒဳဂရဳသေလ်သဳယာတ်တုဲ ဓါတ်ဂမ္တဴ ထပ်သၠုၚ်တိုန်မာန်ဏီပၠန်ရောၚ် ကဵုလဝ်သတိရ။
ဟိုတ်နူသူပါအေလ်နဳညို ကတဵုဒှ်တုဲ ဒးဆဵုဂဗကဵုဓါတ်ဂမ္တဴသၠုၚ်တိုန်အာဂှ်ရ မၞိဟ်တံလၟိဟ်ကဵုကိုတ် ချိုတ်မာန်ရောၚ် တၠပညာဥတုရာသဳဂၠးကဝ်တံ တော်ဆလဝ်ရ။
သၞာံ ၂၀၂၆ အကြာဂိတုနဝ်ဝေမ်ပါကဵု ဒဳဇြမ်ပါ ပရေၚ်ဒဒှ် သူပါအေလ်နဳညို အကာဲအရာသၠုၚ်အိုတ်စိုပ်မာန်တုဲ ပရေၚ်ဇီုကပိုက် ဒဵုကဵုဂိတုဖေဖဝ်ဝါရဳ သၞာံ ၂၀၂၇ တေံ ဆက်ဒှ်အာမာန်ရောၚ် သ္ၚဳဂၠိပ်လဝ်ရ။
ဟိုတ်နူဓါတ်ဂမ္တဴ သၠုၚ်တိုန်မံၚ်ဂှ်ရ စနူအခိၚ်နူဂယး ၁၀ နာဍဳ ဒဵုအခိၚ်သဝ်တ္ၚဲ ၄ နာဍဳ ညံၚ်ဂွံဝေၚ်ပါဲအာ ဓာတ်လျးပရာန်တ္ၚဲတံကီု၊ နူကဵုဓါတ်ဂမ္တဴဂၠိုၚ်ၚ်ဂှ် မွဲအလန်ဓဝ် ညံၚ်ဟွံလ္ပလုပ်ဒၞာဲဂံက်က်တံကီု ပရေၚ်တိတ်မ္ၚးအာကၠုၚ်တံ စွံသတိအိုတ်ညိဂှ် နူကဵုဌာနပရေၚ်ထတ်ယုက် ဗတိုက်ဖအောဝ်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media