မတ်မလီု ၊ အံက်တဝ်ပါ ၉
အပ္ဍဲကဵုစၠတ်ထဝ်မန် ဒပ်ပၞာန်ကဵုညးစၞး ဗော်ဗျဳခိုၚ်ဖျိုဝ်တံ အုပ်လဝ်ဂတာတဲဏံ အပ္ဍဲဂလာန်ပါ်မာဲ နကဵုဥပဒေ သွက်ဂွံကလေၚ်ရုဲ သ္ကိုပ်ပရေၚ်အုပ်ဓုပ်တံဂှ် မာဲကျအာရ။
အပ္ဍဲကဵုကၠောန်လဝ်ကောံဓရီု စၠတ်ထဝ်တွဵုရးမန် အံက်တဝ်ပါ ၅ ဏံ ညးစၞးအမာတ် ပွိုၚ်ဍုၚ်ကျာ်ထဝ် လၟိဟ် ၂ မာံအံၚ်ထူ ပတိုန်ပၠုပ်လဝ် ဂလာန်ဏံရ။
အတိုၚ်ပတိုန်လဝ်ဂလာန် နကဵုဥပဒေ သွက်ဂွံကလေၚ်ရုဲစှ် သ္ကိုပ်ပရေၚ်အုပ်ဓုပ်အရာပ်ကွာန်တံဂှ် ပ္ဍဲအံက်တဝ်ပါ ၈ ကၠောန်ဗဒှ်လဝ် ကောံဓရီုစၠတ်ထဝ်တွဵုရးမန်ဂှ် ညးစၞးစၠတ်ထဝ် ၄ တၠတံ ထံက်ဂလာန်သဳကၠဳကီုလေဝ် လညာတ်ဒကးအာကဵု ဂကောံအလဵုအသဳပၞာန်တံတုဲ ဒးပါ်မာဲဖျေံအာသ္ဂုတ်သွာတ်ရ။
အတိုၚ်ပါ်ဂွံလဝ်မာဲမ္ဂး ညးနွံအခေါၚ်ကဵုမာဲ ၂၈ တၠနွံတုဲ အပ္ဍဲကဵုဏံ မာဲထံက်ဂလာန်ဂှ် ၈ တၠ၊ မာဲဒစဵုဒစး ၁၅ တၠ၊ သှ်ေမံၚ် ၅ တၠတံ ဟွံကဵုမာဲတုဲ ဂလာန်ကဵုမာဲဒစဵုဒစးတံ ကျအာမဒှ်ကီုရ။
ညးတၠပတိုန်လဝ်ဂလာန် မာံအံၚ်ထူ ကျအာမာဲတုဲ ပ္ဍဲမုက်လိက် မဟာဇန်ညး ချူလဝ် “ တၚ်ဂုဏ်ကဵု သ္ဂံၚ်တံရအဴ” ပျုတ်ဗြံက် ပတိုန်လဝ်ပိုအ် မွဲကီုရ။
အပ္ဍဲစၠတ်ထဝ်တွဵုရးမန် ညးစၞးနွံမံၚ် ၃၁ တၠတံဂှ်တှ်ေ နူကဵုဗော်ဗျဳခိုၚ်ဖျိုဝ် ၁၁ တၠ၊ ညးစၞးဒပ်ပၞာန် ၈ တၠ၊ ဗော်ညဳသၟဟ်မန် ၇ တၠ၊ သှ်ေမံၚ် ၅ ဗော်တံ ဂွံလဝ်ညးစၞးမွဲမွဲတၠကီုတုဲ နူဒပ်ပၞာန် ဟွံတုပ်စိုတ်မ္ဂး မုဂလာန်ပတိုန်ဟဍေံ အကာဲအရာ သွက်ဂွံအံၚ်ဇၞး ဟွံမွဲပုဟ်။
အတိုၚ်သၞောဝ်ဥပဒေ သ္ကိုပ်ပရေၚ်အုပ်ဓုပ်အရာပ်ကွာန်တံမ္ဂး နူကဵုအလဵုအသဳတၟိ အတိုၚ်ဆန္ဒညးဍုၚ်ကွာန်တံ ဒးကလေၚ်ရုဲစှ် ပတိုန်အာ သ္ကိုပ်အုပ်ဓုပ်အရာပ်ကွာန် ဆေၚ်စပ်တံတုဲ အာယုက်သ္ကိုပ်အုပ်ဓုပ်တံဂှ် ဒးတုပ်ကဵုအာယုက်သမ္မတရောၚ် ချူခၞံလဝ်ရ။
ဆဂး အလဵုအသဳပၞာန်တွဵုရးမန်ဂှ် သ္ကိုပ်အုပ်ဓုပ်အရာပ်ကွာန် ဗွဲမဂၠိုၚ်တံဂှ် ဟွံကလေၚ်ရုဲတုဲ ရဲကြပ်ကဵုဗော်ဗျဳခိုၚ်ဖျိုဝ်၊ ရဲထံက်ဂလာန်ဒပ်ပၞာန်တံကဵု ရဲကၠောန်စမံၚ်ကဵု ပရေၚ်အုပ်ဓုပ်ပၞာန်တံဂှ် ရုဲစှ်ခါန်ကၞက်လဝ်သ္ၚိတ်တ်ရ။
လၟုဟ်ဒးကျလဝ်ဂလာန် အတိုၚ်ဥပဒေပေၚ်ၚ် ဒးကလေၚ်ရုဲစှ် သ္ကိုပ်အုပ်ဓုပ်အရာပ်ကွာန်တံဟီုဂှ် သွက်ဥပဒေတန်ကြန်မံၚ်တံထမံက်ထၜးဏာ ရုပ်အလဵုအသဳပၞာန်တံ ဍာံဍာံရောၚ်ဂှ် ညးလ္ၚတ် ပရေၚ်ဍုၚ်ကွာန်တံ ပါ်ပါဲလဝ်ရ။
ပရိုၚ်-သြၚ်လောန်တိုၚ်မ်
Photo – MOI