မတ်မလီု ၊ အံက်တဝ်ပါ ၁၀
အပ္ဍဲကဵုတွဵုရးမန် ကေတ်လဝ်အရေဝ် သၞာဲဒါလဝက ဒဂေတ်လီုလီု ၈၄ တၠ နွံမံၚ်ရောၚ်ဂှ် ဂကောံအလဵုအသဳပၞာန် တွဵုရးမန် ဝန်ဇၞော်ပရေၚ်ဂီုကၠီုကဵုဒေသပယျဵု ဝန်ဇၞော် သ္ကိုပ်ဗိုလ်ဇၞော် ကျဝ်ဇွာမျေအ် ဟီုရ။
ပ္ဍဲအံက်တဝ်ပါ ၈ ကၠောန်ဗဒှ်လဝ် ကောံဓရီုစၠတ်ထဝ် တွဵုရးမန်ဂှ် စပ်ကဵုဂလာန်တၚ်သၟာန် ပရေၚ်သၞာဲဒါလဝက ဒဂေတ်လီုလီုတံတုဲ လ္တူညးစၞးအမာတ် ပွိုၚ်ဍုၚ်ၜါသွာၚ် လၟိဟ် ၂ ဥူအံၚ်ဝေန်တာန် သၟာန်လဝ်ဂှ် သှ်ဆာဲကဵုလဝ်ရောၚ်။
ပ္ဍဲသၞာံဏံ စနူဂိတုဂျာန်နဝါရဳ ဒဵုစိုပ်ဂိတုသိပ်တေမ်ပါ ၂၀ ဏံ အပ္ဍဲကဵုသၞာဲဒါလဝက ရဲဒဂေတ်လီုလီု ညးတာလျိုၚ် ၂၉ တၠ၊ ကောန်ရုၚ် ၅၅ တၠတံဂှ် ကေတ်ကၠုၚ်လဝ်အရေဝ် နကဵုဥပဒေ ယိုက်ဝန်ဍုၚ် သ္ကိုပ်ဗိုလ်ဇၞော် ကျဝ်ဇွာမျေအ် သ္ဂးရ။
တုဲပၠန် ရဲကၠောန်စ အကြာရုၚ်လဝက ၇၆ တၠဂှ်လေဝ် ဖျေံလဝ်ဒုဟ်ဒဏ်တုဲဒှ်မံၚ်တုဲ ညးစအကြာ ၃၃ တၠဂှ် ပံက်လဝ်အမှုစောဲလဝ်ဒုဟ်ရောၚ် ဟီုရ။
သၞာဲဒါလဝက ဒဂေတ်လီုလီုတံ ၐိုန်ရ အလဵုအသဳပၞာန် ကေတ်အရေဝ်ကၠောန်မံၚ် ဟီုကီုလေဝ် ပ္ဍဲဗလးတိဍာံဍာံမ္ဂး သၞာဲဒါလဝကတံ ထ္ၜးဟိုတ်ပရူပရာနာနာသာ်တုဲ အာတ်စမံၚ်သြန်တံဂှ် ဆက်ကၠောန်မံၚ်နွံရ။
နူရုၚ်သ္ကိုပ်ဌာနလဝက တွဵုရးမန်လေဝ် ယဝ်ရ သၞာဲဒါလဝက ကၠောန်မံၚ် ပရေၚ်အာတ်သြန် လ္တူညးဍုၚ်ကွာန်တံနွံမ္ဂး တေၚ်စပ်မာန်ရောၚ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – MOI