မတ်မလီု ၊ အံက်တဝ်ပါ ၁၀
အပ္ဍဲတွဵုရးမန် အကြာပွိုၚ်ဍုၚ်လ္ၚဵု စနူသၞာံဏံ ဂိတုဂျာန်နဝါရဳ ဒဵုကဵု ဂိတုသိပ်တေမ်ပါ ပွိုၚ် ၉ ဂိတုဏံဂှ် ဟိုတ်နူပဋိပက္ခပရေၚ်ပၞာန်တံတုဲ ကောန်ကွာန် ၂၅ တၠချိုတ်အာရဂှ် ဂွံတီလဝ် နူကဵုရာမညအေၚ်သတဳကျု ဌာနသုတေသန ပရေၚ်ဍုၚ်ကွာန် ဂကောံ RICE ရ။
အပ္ဍဲကဵုတွဵုရးမန်ကီု သီုကဵုဒေသ ဍုၚ်ဗမာသၠုၚ်ကျာ ၁၄ ပွိုၚ်ဍုၚ်ဆက်စပ်မံၚ်တံဂှ် အကြာဂိတုသိပ်တေမ်ပါ အကာဲအရာ ပရေၚ်ပေါဲဗတိုက်ဒှ်လဝ်တံ ပ္ဍဲကဵုအံက်တဝ်ပါ ၇ ဂှ် ပတိတ်လဝ်လိက်လလောၚ်တြးရ။
အတိုၚ်တၚ်နၚ်တံမ္ဂး ပ္ဍဲသၞာံဏံ အကြာပွိုၚ် ၉ ဂိတုဂှ် ပ္ဍဲကဵုပွိုၚ်ဍုၚ် ကျာ်ထဝ်ကဵုၜဳကလေၚ် သၟဝ်ကျာတွဵုရးမန်တေံ ပရေၚ်ဗတိုက်ပၞာန်ကျာ ၁၀၇ ဝါ၊ ပန်လဝ်ကဵုလွဟ်ဇၞော် ၃၆ ဝါနွံတုဲ ညးဍုၚ်ကွာန် ၂၅ တၠချိုတ်၊ ဒးလဝ်ဝပ် ၅၆ တၠ နွံရ။
အပ္ဍဲဂိတုတုဲကၠုၚ်တေံ တွဵုရးမန်၊ ရးတနၚ်သဳကဵု ပ္ဍဲတွဵုရးကရေၚ် ၃ ပွိုၚ်ဍုၚ်တံ ပေါဲဗတိုက်ဒှ်လဝ် ၅ ဝါနွံတုဲ ပန်လဝ်ကဵုလွဟ်ဇၞော် ၂၇ ဝါ၊ ပန်ဗတိုက်လဝ်ကဵု ပၞာန်ကျာ ၇ ဝါကဵု ဗတိုက်လဝ်ကဵုဒရုၚ် ၄ ဝါ နွံရ။
ရံၚ်အာအတိုၚ်လၟေၚ်ပွိုၚ်ဍုၚ်မ္ဂး ပ္ဍဲပွိုၚ်ဍုၚ်ဍာ်ဗု ရးတနၚ်သဳကဵု ပွိုၚ်ဍုၚ် ကအ်ကြိက် တွဵုရးကရေၚ်တံ ပေါဲဗတိုက်စုက်လုက် အကြာၜါလပါ် ဒှ်လဝ်တုဲ ပ္ဍဲပွိုၚ်ဍုၚ်ကျာ်ထဝ်ဂှ် ပန်လဝ်ကဵုလွဟ်ဇၞော် ၁၅ ဝါ ဒှ်ကၠုၚ် အလန်ဂၠိုၚ်အိုတ်ရောၚ်။
ပရေၚ်ထောံဖျေံဗုမ်ဒရုၚ်တုဲ ဗတိုက်မံၚ်ဂှ် ကၠောန်လဝ် ပ္ဍဲပွိုၚ်ဍုၚ် ကျာ်ထဝ်၊ ကအ်ကြိက်၊ ဍာ်ဗုတံကီု ပရေၚ်ပၞာန်ကျာဗတိုက် ဒှ်ကၠုၚ်လဝ် ပ္ဍဲပွိုၚ်ဍုၚ်ကျာ်ထဝ် ၆ ဝါ ဂၠိုၚ်အိုတ်ရဂှ် ပ္ဍဲကဵုတၚ်နၚ် ဂကောံ RICE တံ စၟတ်သမ္တီစွံလဝ်ရ။
ဟိုတ်နူပဋိပက္ခ ပရေၚ်ပၞာန်တံတုဲ ကောန်ကွာန် ၄ တၠချိုတ်အာ၊ ဒးဝပ် ၈ တၠနွံတုဲ သ္ၚိဌာန်ညးဍုၚ်ကွာန်တံ ၜိုတ် ၄၂ မ လီုလာ်အာလဝ်ကီုရ။
တုဲပၠန် မၞိဟ်ဟွံမွဲကဵုဒုဟ်ဒဏ်တံဂှ် ရပ်လဝ် ၅၄ တၠနွံတုဲ အပ္ဍဲကဵုရပ်ပလံၚ်လဝ် သွက်ယိုက်ဝန်ပၞာန် ၃၆ တၠဂှ်တှ်ေ မၞိဟ်ဂှ် ၁၂ ဟေၚ် ကလေၚ်ဗၠးကၠုၚ်လဝ် မဒှ်ရ။
ပရေၚ်ရပ်စပ်မၞိဟ်တံဂှ် ပ္ဍဲကဵုပွိုၚ်ဍုၚ်သဓီု၊ မုဟ်ဍုၚ်ကဵု ဇြပ်ဗုတံ အပံၚ်ဖအိုတ် ၃၈ တၠ ဂၠိုၚ်အိုတ်ဒှ်တုဲ ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက်ကဵု လှာဒကှ်ဂှ် ၁၂ တၠ ကေုာံ ပွိုၚ်ဍုၚ်ဍာ်ဗုဂှ် ၄ တၠ ပါလုပ်မံၚ်ရ။
အပ္ဍဲကဵုတွဵုရးမန် အကြာဂိတုတုဲကၠုၚ်ဏံ ပရေၚ်ဒှ်ပေါဲဗတိုက်ဟွံဆဵုကီုလေဝ် ဒပ်ပၞာန်ဗမာတံ ပရေၚ်ပန်မံၚ်ကဵုပၞာန်ကျာဂှ် ဆက်ဒှ်မံၚ်ဖိုဟ်ရောၚ်။
ဗွဲတၟေၚ် ပွိုၚ်ဍုၚ်ကျာ်ထဝ်ကဵု ၜဳကလေၚ်တံဂှ် ဒှ်ကၠုၚ်ပရေၚ်ပန်လွဟ်ဇၞော်ကဵု ပၞာန်ကျာဂၠိုၚ်အိုတ်တုဲ ညးဍုၚ်ကွာန် ၃ တၠ ချိုတ်၊ ဒးလဝ်ဝပ် ၅ တၠ မဒှ်ရ။
ဟိုတ်ဂှ်ရ ညးဍုၚ်ကွာန်တံ သွက်ဂွံစွံအာသတိ ဒၞာဲပေါဲဗတိုက်ဒှ်မံၚ်တံကီု ဒၞာဲပန်လဝ်ဇၞော် ပၞာန်ကျာ ကတဵုဒှ်ကၠုၚ်မာန်ဂှ် ညံၚ်ဂွံနွံကဵု သတိဂီုကၠီုကီု ရဲဖျေံမံၚ်မူဝါဒတံလေဝ် သွက်ပရေၚ်ဂီုကၠီု ညးဍုၚ်ကွာန်တံဂှ် ထေက်ကဵုဒးကဵုအာဖျုန်ရောၚ် နူဂကောံ RICE ထံက်ထ္ၜးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media