ဘာအၚ်၊ အံက်တဝ်ပါ ၁၃
အကြာပေါဲဗတိုက်တံကဵု ပရေၚ်ကြဳဗုမ်ၜၚ်ကျာတံ ဒှ်မံၚ် ပရေၚ်တံၚ်ရပ်ပဝ်တာသွက်ယိုက်ဝန်ပၞာန်ကဵု ဗက်ရပ်မံၚ် ကွဳစက်လိုၚ်သေၚ်ဟွံမွဲတံ ဒှ်မံၚ်ပ္ဍဲကဵုတွဵုရးကရေၚ်ဂှ် စိုပ်အခိၚ်ကာလလိုက်ဝှ်သှ်ပဝါဏံ ညံၚ်ဂွံကၠောန်အာ ပေါဲသ္ဘၚ်မိပ်လဟိၚ်စဳစဳတံဂှ် အလဵုအသဳတွဵုရးကရေၚ် စဳဇန်ကၠောန်မံၚ်ရောၚ် ဂွံတီရ။
စိုပ်တ္ၚဲသဳဂိတုဝှ်ပေၚ် အံက်တဝ်ပါ ၂၆ ဏံမ္ဂး ဥက္ကဌကမ္မတဳ ပရေၚ်အာတရဴဒေသတွဵုရးကရေၚ် သ္ကိုပ်ဝန်ဇၞော်တွဵုရးကရေၚ် ဥူသဝ်မျေအ်ဥူ သ္ကိုပ်သ္ကတုဲ ပ္ဍဲကဵုသၠာတ်သဳရိ ဍုၚ်ဘာအၚ်ဂှ် စဳဇန်လဝ် သွက်ဂွံကၠောန်အာပေါဲဗလးဂီု မိပ်ပ်စဳစဳရောၚ်။
အပ္ဍဲကဵုပေါဲဗလးဂီုဏံ ဂီုဇၞော်ဇၞော်ဍောတ်တ် ၂၀၀ မပြၚ် သွက်ဂွံဗလးအာနွံတုဲ စိုပ်အခိၚ်ဗတမ်ဝှ်ပေၚ်ဂှ်လေဝ် အပ္ဍဲကဵုကျာ်ဇၞော် သေဌမာန်အံၚ် ဍုၚ်ဘာအံၚ် ကၠောန်သဘၚ်ပူဇဴ ဍေၚ်ပၟတ်သ္ဍဴ ၉၀၀၀ ရောၚ် နူကဵုအလဵုအသဳပၞာန် တွဵုရးကရေၚ် လလောၚ်ပတိတ်လဝ်ပရိုၚ်ရ။
တုဲပၠန် ပေါဲလိုက်ဝှ်သှ်ပဝါဏံတုဲမ္ဂး စိုပ်ဂိတုနဝ်ဝေမ်ပါ ၇ ဂှ် ဒှ်တ္ၚဲတွဵုရးကရေၚ်တုဲ သွက်ဂွံကၠောန်အာ ပေါဲလှ်ေဒိၚ်အခိုက်ကၞာ၊ ပေါဲလံက်ပၠုဲတံ မိပ်ပ်ဇြိပ်ပ်ရောၚ် သ္ကိုပ်ဝန်ဇၞော်တွဵုရးကရေၚ် ဥူသဝ်မျေအ်ဥူ ကဵုလဝ်စၞောန်ပ္ညုၚ်ရ။
အပ္ဍဲဏံ ပေါဲမိပ်လဟိၚ်တံသၟးဟွံက ပ္ဍဲအကြာဍုၚ်ဘာအၚ် ဒၞာဲယၟုဒယှ်ပြာကတ်မံၚ်တံဂှ် ကၟုဲအာတရဴ ညံၚ်ဂွံဂၠိုၚ်တိုန် စဳဇန်ကၠောန်အိုတ်ညိဂှ် ဥူသဝ်မျေအ်ဥူ ကဵုလဝ်စၞောန်ပ္ညုၚ် ဂွံတီရ။
အပ္ဍဲတွဵုရးကရေၚ် ဍုၚ်ဗြဝတဳ ဍုၚ်ဘာအၚ်ကဵုအကြာဍုၚ်လ္ၚဵုတံမ္ဂး သွက်ပရေၚ်ယိုက်ဝန်ပၞာန်ဂှ် နူကဵုဒပ်ပၞာန်ဗမာ ဗက်ရပ်ကေတ်မံၚ်ပဝ်တာ အတေၚ်အဓ္ဓမတံနွံတုဲ သီကေတ်မံၚ် ကွဳစက်လိုၚ်သေၚ် ဟွံမွဲကီု သီကဵုရပ်သီကေတ်မံၚ် ကပေါတ်ကၠုၚ်နူဍုၚ်သေံတံတုဲ ဗွဲတၟေၚ်အပ္ဍဲဍုၚ်ဗြဝတဳဂှ် ဗက်ရပ်ကေတ်မံၚ်ပဝ်တာကြာန်န်ရောၚ် ညးဒေသတံ သ္ဂးရ။
ပ္ဍဲတွဵုရးကရေၚ် ကောန်ပၞာန်တၟိ သွက်ဂွံတိုန်ဘာယိုက်ဝန်ပၞာန် လၟေၚ် (၂၉) ဂှ် ပ္ဍဲအံက်တဝ်ပါ ၁၀ သ္ကိုပ်ဝန်ဇၞော်တွဵုရးကရေၚ် အာဆဵုဂဗလဝ် ပ္ဍဲကဵုဍုၚ်ဘာအၚ်ရ။
ကောန်ပၞာန်တၟိ နူကဵုတွဵုရးကရၚ်တံ သွက်ဂွံတိုန်ဘာယိုက်ဝန်ပၞာန် လၟေၚ် (၂၉) ဗွဲမဂၠိုၚ်ဂှ် ဒှ်ရဲဒးဒုၚ်ရပ်လဝ်ပဝ်တာ နကဵုအတေၚ်အဓ္ဓမတံတုဲ အပံၚ်ဖအိုတ် ၜိုတ် ၇၀ တၠနွံမံၚ် ဂွံတီရ။
နူကဵုအလဵုအသဳပၞာန် တွဵုရးကရေၚ် ကော်ဘိက်ဥက္ကဌတြေံ KNU ပဒိုသဝ်မူတူသေဖိုဝ်ကဵု ဂကောံရပ်လွဟ်ထပက်လဝ် NCA တံတုဲ ထၜးဟိုတ်ပရေၚ်ၜိုဟ်လလမ် ကၠောန်လဝ်ဖိုရမ်ၜိုဟ်လလမ် ပ္ဍဲကဵုဍုၚ်ဘာအၚ်ရ။
ဗွဲကြဴဏံ အပ္ဍဲတွဵုရးကရေၚ် နူကဵုဒပ်ပၞာန်ဗမာ ပန်ဗတိုက်လဝ်ဘာဗတောန်လိက်ကီု သ္ၚိဌာန်ညးဍုၚ်ကွာန်တံ နကဵုၜၚ်ကျာတုဲ သၠုၚ်ပတိုန်လဝ်အသိၚ် ပရေၚ်ထပက်ပၞာန်ပေါဲဗတိုက်တံ ဆက်ဒှ်မံၚ် ဟွံဒေါအ်ရ။
ပရိုၚ်-သြၚ်လောန်တိုၚ်မ်
Photo – MOI