ကျာ်ထဝ်၊ အံက်တဝ်ပါ ၁၄
တွဵုရးမန် ပွိုၚ်ဍုၚ်ကျာ်ထဝ် ဟိုတ်နူဒပ်ပၞာန်ဗမာကြဳဗုမ် ပ္ဍဲကဵုကွာန်ကျံက်ဖျာကဵု နာတ်ဇြေန်တံဂှ်ရ ညးဍုၚ်ကွာန်ကောန်အရာပ် ဟွံအောန်နူကဵု ၄ တၠတံ ဒးအာလဝ်ဝပ်နွံမံၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲအံက်တဝ်ပါ ၁၃ အခိၚ်နူဂယးပြဟ် ၅ နာဍဳဂှ် မွဲဝါ၊ ၜိုတ်အခိၚ်နူဂယး ၉ နာဍဳဂှ် ထပ်မွဲဝါပၠန် ဒပ်ပၞာန်ဗမာ ကြဳဖျေံဗုမ်ဇၞော်ကဵုဇြဟတ် နကဵုၜၚ်ကျာဂျက်ဖိုက်တာ ၂ မရ။
ဒပ်ပၞာန်ကျာ ကြဳဖျေံဗုမ်တုဲ ဗွဲကြဴဂှ်တှ်ေ နူကဵုတမ်ဒပ်ဖျေံသ္ဇိုၚ် ကျာ်ထဝ် ထပ်ပန်ပလံၚ်နၚ်လွဟ်ဇၞော် ဟွံအောန်နူ ၁၀ မတုဲ ပရေၚ်ကြဳဗုမ်ဒရုၚ်တံလေဝ် ထပ်ကၠောန်လဝ်ကီုရ။
ဟိုတ်နူ ဒပ်ပၞာန်ကျာတံ ကြဳဖျေံဗုမ်ဂှ်ရ ကောန်ကွာန်ကျံက်ဖျာ ညးတြုံ ၂ တၠကဵု ညးဗြဴ ၂ တၠတံ ဒးအာဝပ်တုဲ ကွဳလိုန်ဓါတ် ၂ မလေဝ် ပၟတ်တဴ လီုလာ်အာလဝ်ကီု ညးဒေသတံ ဟီုရ။
ဟိုတ်နူဂွံလဝ်ပရိုၚ် ဒပ်ဂကောံပၠန်ဂတးတံ အာကၠုၚ်ဖျေံမံၚ်သ္ဇိုၚ်တုဲ ဒပ်ပၞာန်ကျာတံ ကၠုၚ်ဖျေံဗုမ်ရောၚ် ညးဒေသတံ သ္ၚဳဂၠိပ်ရ။
ဟိုတ်နူဒပ်ပၞာန်ကျာ ကြဳဖျေံဗုမ်ဂှ် နူကဵုကွာန် ကျံက်ဖျာ၊ နတ်ဇြေၚ်၊ ခမံက်ခွေ၊ ကဝ်ကာတ်၊ ချံၚ်သံက်၊ ပုၚ်နဲကုန်၊ ပျေၚ်ကတိုဝ်ကုန် ညးဍုၚ်ကွာန် ၂၀၀၀ ပြၚ် ဒးဂြိပ်ပါဲအာ ဒၞာဲဗၠးဘဲတံမာန်ရ။
အပ္ဍဲကဵုအံက်တဝ်ပါ ၁၂ ဂှ်လေဝ် ပ္ဍဲကွာန်ငပျဝ်တဝ် ပွိုၚ်ဍုၚ်ကျာ်ထဝ်ဂှ် ဟိုတ်နူဒပ်ပၞာန်ဗမာ ကြဳဗုမ်ဒရုၚ်ဂှ်ရ ညးဍုၚ်ကွာန် ၂ တၠချိုတ်တုဲ ၃ တၠဒးအာဝပ်ဂှ် ဂွံတီလဝ် နူကဵုညးဒေသတံရ။
ပရိုၚ်-သြၚ်လောန်တိုၚ်မ်
Photo – CJ