ပလဝ်၊ အံက်တဝ်ပါ ၁၄
အပ္ဍဲကဵုရးတနၚ်သဳ ပွိုၚ်ဍုၚ်ပလဝ် ကၚ်ဒၞာဂတမုက်ဗဒိုပ် ဒပ်ပၞာန်ဗမာ နွံပ္ဍဲကွာန်မဂျဳကုၚ်ဂှ် ဒပ်ပၞာန်ဗၠးၜးကရေၚ် KNLA ကဵု ဒပ်စဵုဒၞာညးဍုၚ်ကွာန် PDF တံ သီဂွံဏာလဝ်ရဂှ် လလောၚ်ပတိတ်လဝ် ပရိုၚ်ရ။
အပ္ဍဲကဵုအံက်တဝ်ပါ ၁၂ ၜိုတ်အခိၚ်နူဂယး ၇ နာဍဳဂှ် နူကဵု KNLA မဟာဒပ် (၄) ဂကောံဒပ်ဗတိုက်တၟေၚ်ကဵု တမ်ဒပ်လၟိဟ်(၁) ဒပ် PDF ခရိုၚ်ဗိက် ပံၚ်တောဲတံ လုပ်ပန် ကၚ်စဵုဒၞာဂတမုက် ဗဒိုပ်ဒပ်ပၞာန် ဂှ်ရ။
ပေါဲဗတိုက် အကြာၜါလပါ် ကတဵုဒှ်အာ ၜိုတ်ပွိုၚ်မွဲဍဳပြၚ်တုဲ ဒပ်ပံၚ်တောဲ KNLA/PDF တံ သီဂွံဏာ ကၚ်ဒၞာဂတမုက်ဗဒိုပ်ဂှ်ရ။
ပ္ဍဲကဵုပေါဲဗတိုက် ကၚ်စဵုဒၞာဂတမုက်ဗဒိုပ် ကွာန်မဂျဳကုၚ်ဂှ် လပါ်ဒပ်ပၞာန်ဗမာတံ ၈ တၠ ချိုတ် ၊ ဒးဝပ် ၁ တၠ သီဂွံလွဟ် ၅ ဇကိုအ်ကဵု ကပေါတ်ဆက်စပ်တံနွံ ညးတာလျိုၚ် တမ်ဒပ်လၟိဟ်(၁) ခရိုၚ်ဗိက် ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲပေါဲဗတိုက်ဏံ ဟိုတ်နူကောန်ပၞာန်သှ်ေမံၚ်တံ ဂြိပ်တိတ်အာ အိုတ်တုဲ ဒပ်ပံၚ်တောဲ KNLA/PDF တံ စံၚ်ပလီုထောံရ။
ကၚ်စဵုဒၞာဂတမုက်ဗဒိုပ် ကွာန်မဂျဳကုၚ်ဂှ်တှ်ေ ဒှ်ဒၞာဲကၚ်စဵုဒၞာ သွက်ဍုၚ်ပလဝ် နွံမံၚ်လ္တူဂၠံၚ် ဗိက်-ထဝါဲတုဲ ဒှ်မံၚ် ကၚ်စဵုဒၞာဂတမုက် ဗဒိုပ်အဓိကမွဲ မဒှ်ရ။
ဟိုတ်နူပေါဲဗတိုက် အကြာၜါလပါ်ဒှ်တုဲ အပ္ဍဲကဵုသ္ကုတ်ဂၠံၚ်ဇၞော် ကၟိန်ဍုၚ် ဗိက်-ထဝါဲ ပရေၚ်ကၟာတ်ဆိုအ်ဂၠံၚ် ဒှ်အာပွိုၚ်မွဲဍဳပြၚ်တုဲ စိုပ်ၜိုတ်အခိၚ်နူဂယး ၉ နာဍဳဂှ်မှ ကလေၚ်အာကၠုၚ် အတိုၚ်လၟေၚ်ဓမ္မတာဂွံမာန်ရဂှ် ဂွံတီကၠုၚ် နူကဵုညးအာတရဴတံရ။
ပရိုၚ်-သြၚ်လောန်တိုၚ်မ်
Photo – PDF