မတ်မလီု ၊ အံက်တဝ်ပါ ၁၄
တွဵုရးမန် အပ္ဍဲကဵုဍုၚ်မတ်မလီု အပ္ဍဲမွဲတ္ၚဲ ပွိုၚ် ၈ နာဍဳ ဗဂေတ်အခိၚ်ပရအ်ကဵုလဝ် ပၟတ်ဓါတ်လလဳကီုလေဝ် တန်တဴကဵု ဂွံဇြဟတ် ဓါတ်လလဳတုဲ အခိၚ်အောန်စှ်ေအာမာန်ရောၚ် နူကဵုဌာန တြးဇြဟတ်ဓါတ်လလဳ ပွိုၚ်ဍုၚ် လလောၚ်တြးရ။
သွက်ဂွံတြးအာပၟတ်ဓါတ်လလဳ ပ္ဍဲဍုၚ်မတ်မလီုဂှ် ပါ်လဝ် ၄ ဂအုံ ဂကောံ A1,A2,B1,B2 တံတုဲ အခိၚ်ကဵုပၟတ်ဂှ်တှ်ေ ကဵု ၂ နာဍဳ ထပိုတ် ၆ နာဍဳ၊ ကဵု ၄ နာဍဳ ထပိုတ် ၆ နာဍဳ၊ ကဵု ၂ နာဍဳ ထပိုတ် ၄ နာဍဳ စကာအာ သၞောတ်တံဏံရောၚ်။
တုဲပၠန် တန်တဴကဵု ဂွံဇြဟတ်ဓါတ်လလဳတံတုဲ ဂအုံ A1, A2 တံဂှ် မွဲအခိၚ်ဓဝ် (ဟွံသေၚ်မ္ဂး) ဂအုံ B1,B2 တံဂှ် မွဲအခိၚ်ဓဝ် ကဵုအာဇြဟတ်ပၟတ်အပဵုတုဲ နူကဵုဒၞာဲရုၚ်ဌာန ထိၚ်ဓါတ်လလဳ ဍုၚ်လဂုၚ်တေံ ပရေၚ်ကာမံက်တိုန် ဓါတ်လဳယအ်စှ်အာမ္ဂး ဂွံပၟတ်ယအ်စှ်ေအာ နူကဵုဗီုလၟုဟ်ဏံမာန်ရောၚ် သ္ဂးရ။
နူကဵုဌာနဓါတ်လလဳ ကဵုပၟတ်ပွိုၚ် ၂ နာဍဳ ထပိုတ်ပွိုၚ် ၆ နာဍဳ ဟီုကီုလေဝ် အခိၚ်မိက်ဂွံပိုတ်ဂှ်ပိုတ်အာ၊ အတိုၚ်ချိၚ်လဝ်အခိၚ်ဂှ်လေဝ် ပၟတ်ဟွံကၠုၚ်တုဲ မုလေဝ်သွက်ဂွံစၟဳစဟွံမွဲပုဟ် ရဲလ္တူဍုၚ်မတ်မလီုမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“အတိုၚ်ဍေံတံ လလောၚ်လဝ် ၂ နာဍဳကၠုၚ်တုဲ ပိုတ် ၆ နာဍဳဂှ် ဟီုတှ်ေဟီုရ။ ဆဂး အခိၚ်မိက်ဂွံပိုတ်ဂှ် ပိုတ်ရ။ ဟီုသောၚ်ၚ်မ္ဂး ညးဍုၚ်ကွာန်တံ စိုတ်အိုတ်မံၚ်ယျ။ လၟုဟ်ကဵု ၂ နာဍဳ ကဵုပၟတ်ဏောၚ် ဟီုလဝ်။ မွဲနာဍဳဟွံပေၚ်ပုဟ် ပၟတ်ပိုတ်အာပၠန်ယျ။ မုလေဝ်ဟွံစၟဳစပုဟ်” သာ်ဝွံ သ္ဂးရ။
တုဲပၠန် ပြဟ်ဟ်ဏံ နူကဵုဌာနဓါတ်လလဳ အခိၚ်ကဵုပၟတ်တံဂှ် အတိုၚ်ဖျေံလဝ်ခံက်အၚ် လလောၚ်တြးလဝ်ကီုလေဝ် ပ္ဍဲဗလးတိမ္ဂး အခိၚ်မိက်ဂွံကဵုတှ်ေ ကဵု၊ အခိၚ်မိက်ဂွံထပိုတ်ဂှ် ထပိုတ်ဒှ်မံၚ်ဂှ်တုဲ အတိုၚ်ခံက်အၚ်ဏံ ကၠောန်ကမၠောန်ဟွံဂွံပုဟ် ညးဆက်ဟီုရ။
အပ္ဍဲပွိုၚ်မွဲတ္ၚဲ ၈ နာဍဳ ကဵုအာပၟတ်ဓါတ်လလဳရောၚ် နူကဵုဌာနဓါတ်လလဳပွိုၚ်ဍုၚ် လလောၚ်တြးလဝ်ကီုလေဝ် နတဲမ္ဂးတ္ၚဲလ္ၚဵုတံ ပွိုၚ်မွဲတ္ၚဲ ဂွံဆၜိုတ် ပွိုၚ် ၅-၆ နာဍဳဓဝ်ဟေၚ် ဒှ်မံၚ်ရောၚ်။
ပရေၚ်ဂွံပၟတ်ဓါတ်လလဳ အောန်စှ်ေမံၚ်တုဲ ပ္ဍဲဒေသ သွက်ဂွံကၠောန်အာကမၠောန်ကီု ကမၠောန်အဇာဍောတ် အဇာအဒေါဝ် အဇာဇၞော်ဇၞော်တံ ဒှ်ကၠုၚ်တၚ်ယုတ်ဒေက်ဂှ်တှ်ေ စရိတ်ပတိတ် ကပေါတ်နာနာတံ သၠုၚ်တိုန်ကၠုၚ်အာ မဒှ်ကီုရ။
ဟိုတ်နူအေလ်နဳညို ဓါတ်ဂမ္တဴတံသၠုၚ်တိုန်တုဲ ပရေၚ်သုၚ်စောဲဓါတ်လလဳ ဂၠိုၚ်တိုန်၊ ဟိုတ်နူတၚ်နွံပၟိက်ဓါတ်လလဳ ပဵုတိုန်တုဲ ပါ်တြးပရအ်အာကဵုဓါတ်လလဳ သၞောတ်ဂေတ်အလန်တံရောၚ် နူကဵုအလဵုအသဳပၞာန် လလောၚ်တြးလဝ် ပ္ဍဲကဵုအံက်တဝ်ပါ ၅ တေံရ။
ပရိုၚ်-သြၚ်လောန်တိုၚ်မ်
Photo – Social Media